ޝަރުތުކޮށްފައި އަނެއްކާވެސް ލަމްހާ ބަންދުން ދޫކޮށްލައިފި
ލަމްހާ ދޫކޮށްލީ، ޝަރީއަތް ދިގުލައިގެން ދާތީ އާއި ލަމްހާގެ ގިނަ ހައްގުތަކެއް ގެއްލިގެންދާ ކަމަށް ބަޔާންކޮށެވެ.
ސަރުކާރުގެ މައި ހޮސްޕިޓަލު އައިޖީއެމްއެޗްގައި މަސައްކަތް ކުރި ފިލިޕިންސް ނަރުސް، މޭރީ ގްރޭސްގެ މަރުގެ މައްސަލާގައި ބަންދު ކޮށްފައިވާ ހަލީމަތު ލަމްހާ ބަންދުން ދޫކޮށްލަން ކްރިމިނަލް ކޯޓުން މިއަދު އަމުރު ކޮށްފި އެވެ.
މީގެ ތިން އަހަރު ކުރިން، މޭރީ މަރާލި ކަމަށް ބުނެ ދައުވާ ކޮށްފައި ވަނީ އޭނާގެ ފިރިމީހާ، މާވިން އެސްވައި ވާގަސް އަދި ލަމްހާގެ މައްޗަށެވެ.
މި މައްސަލައިގެ ޝަރީއަތް ލަސްވެފައިވާތީ، ބަންދުން ދޫކޮށްލައިދިނުމަށް ލަމްހާގެ ފަރާތުން މިދިޔަ ހަފްތާ ވަނީ އެދިފަ އެވެ. ލަމްހާ ދޫކޮށްލީ، ޝަރީއަތް ދިގުލައިގެން ދާތީ އާއި ލަމްހާގެ ގިނަ ހައްގުތަކެއް ގެއްލިގެންދާ ކަމަށް ބަޔާންކޮށެވެ.
އޭނާ ދޫކޮށްލީ މާލެ ސަރަހައްދުން ބޭރަށް ނުދިއުމަށާއި ވަކި ވަގުތުތަކެއްގައި ގެއިން ބޭރަށް ނުނިކުތުމަށާއި ކޯޓުން އަންގާ ގަޑިއަށް ކޯޓަށް ހާޒިރުވުމަށް ޝަރުތު ކޮށްފަ އެވެ.
މިއީ ޝަރީއަތް ނިމެންދެން ބަންދުކޮށްފައި ހުއްޓައި ލަމްހާ ދޫކޮށްލި ދެވަނަ ފަހަރެވެ. މީގެ ކުރިން އޭނާ ދޫކޮށްލާފައި ވަނީ މިދިޔަ ނޮވެމްބަރު މަހުގެ 23 ވަނަ ދުވަހު ތިން މަހަށެވެ. ނަމަވެސް ދައުލަތުން އެ އަމުރު ހައިކޯޓަށް ހުށަހެޅުމުން، އެކޯޓުން ވަނީ ލަމްހާ ބަންދު ކުރަން އަލުން އަމުރުކޮށްފަ އެވެ.
އޭރު ލަމްހާ ބަންދުން ދޫކޮށްލީ ތަކުރާރުކޮށް ބަންދުން ދޫކޮށްލައި ދިނުމަށް ލަމްހާގެ ފަރާތުން ކޯޓުގައި އެދެމުން ދަނިކޮށެވެ. ދެވަނަ ފަހަރަށް މިއަދު ވެސް ލަމްހާ ދޫކޮށްލާފައި ވަނީ ކުރިން ވެސް ބަޔާންކުރި ކަންކަމުގެ މައްޗަށް ރިއާޔަތްކޮށެވެ.
ލަމްހާ ބަންދުން ދޫކޮށްލިއިރު، މާވިން ހުރީ ބަންދުގަ އެވެ. ކުރިން ލަމްހާ ދޫކޮށްލިއިރު ވެސް މާވިންގެ ބަންދާމެދު ގޮތެއް ނިންމާފައެއް ނުވެ އެވެ.
މި މަސައްލައިގައި އަދިވެސް ކުރިއަށް ދަނީ ދައުލަތުގެ ފަރާތުން ހުށަހަޅާފައިވާ ހެކިންގެ ހެކިބަސް ނެގުމެވެ. މި ދެ މީހުންނާ ދެކޮޅަށް ދައުލަތުން ވަރަށް ގިނަ ހެކި ހުށަހަޅާފައިވެ އެވެ.
ކޮމެންޓް
Republic of Maldives