އެސްއޯއީ ގާނޫނަކާއެކު ކުންފުނިތައް އެއްކޮށްލައި، ބައެއް ކުންފުނިތައް އުވައިލަނީ

ސަރުކާރު ހިއްސާވާ ކުންފުނިތަކަށް ހާއްސަ ގާނޫނެއް އެކުލަވާލައި، ބައެއް ކުންފުނިތައް އެއްކޮލައި އަދި ގެއްލުމުގައި ހިނގާ ބައެއް ކުންފުނިތައް ބިޔަ ކުންފުނިތަކުގެ ދަށަށް ބަދަލު ކުރުމަށް ރިފޯމް އެޖެންޑާއެއް އެކުލަވާލައިފި އެވެ.

އަންނަ އަހަރަށް ލަފާކުރާ ދައުލަތު ބަޖެޓުގައި ހިމަނާފައިވާ މި ރިފޯމް އެޖެންޑާގެ މަގުސަދަކީ، ރާއްޖޭގެ އިގްތިސޯދު ކުރިއެރުމުގައި އެސްއޯއީތަކުގެ ދައުރު ފުޅާކޮށް، އެ ކުންފުނިތައް ހިންގުމަށް ދައުލަތުގެ ބަޖެޓުން ހަރަދުކުރަން ޖެހޭ މިންވަރު ކުޑަކުރުމެވެ. އަދި އެ ކުންފުނިތަކަށް ލިބޭ ފައިދާއިން ދައުލަތުގެ ބަޖެޓަށާއި، ދައުލަތުގެ ކޭޝްފްލޯއަށް މިހާރަށްވުރެ ބޮޑަށް ފައިދާ ލިބިގެން ދާނެ ގޮތަށް ބަދަލު ކުރުމެވެ.

މި ރިފޯމް އެޖެންޑާގައި ހިމަނާފާއިވާ ކަންކަމަކީ އެސްއޯއީތަކުގެ ހިންގުން ހަރުދަނާކުރުމާއި، މާލީ ދެމެހެއްޓެނިވިކަން އިތުރު ކުރުމަށް ހިމަނާފައިވާ ކަންކަން ކަމަށް ބަޖެޓު ފޮތުގައި ބަޔާންކޮށްފައިވެ އެވެ.

ސަރުކާރުން ނިންމާފައި ވަނީ އަންނަ އަހަރުގެ ފުރަތަމަ ދައުރުގައި ރައްޔިތުންގެ މަޖިލީހަށް ހުށަހަޅަން ނިންމާފައިވާ ގާނޫނުތަކުގެ ތެރޭގައި އެސްއޯއީތަކުގެ ގާނޫނު ހުށަހެޅުމަށެވެ. 

މި ގާނޫނުގައި ހުންނާނެ ކަންކަމުގެ ތެރޭގައި؛

އާ ގާނޫނުން އެސްއޯއީތަކުގެ ގަވަނަންސްގައި ހިމެނޭ ސަރުކާރުގެ އިދާރާތަކުގެ ހައިސިއްޔަތުން މަސްއޫލިއްޔަތުތައް ސާފުކޮށްދޭނެ އެވެ. އަދި ފްރައިވަޓައިޒޭޝަން ގާނޫނު އުވާލައި، ހިއްސާދާރުގެ ހައިސިއްޔަތުން ފިނޭންސް މިނިސްޓްރީން އެސްއޯއީތަކުގެ ހުރިހާ ކަންކަން ބެލެހެއްޓުމަށް ހަވާލުވާނެ އެވެ. 

ބަޖެޓު ފޮތުގައި ބަޔާންކޮށްފައިވާ ގޮތުގައި، މި ގާނޫނުގެ ތެރެއިން އެސްއޯއީތަކުގެ މާލީ ހިރާސްތައް ކުޑަކުރުމަށްޓަކައި ގަވަނަންސް އޮނިގަނޑެއް ގާއިމްކޮށް، ވަރުގަދަ ޖަވާބުދާރީ ކުރެވޭނެ ނިޒާމުތަކެއް ތަންފީޒު ކުރުމުގެ ތެރެއިން، ކުންފުނިތަކަށް ދިމާވެފައިވާ މައްސަލަތަކަށް ހައްލު ހޯދޭނެ މަގު ފަހި ކޮށްދޭނެ އެވެ. އޭގެ ތެރޭގައި ވަސީލަތްތައް ނަހަމަ ގޮތުގައި ބޭނުން ކުރުމާއި، ބޭނުންވާ މިންވަރަށްވުރެ އިތުރަށް މުވައްޒަފުން އިތުރުކުރުމާއި، ފްރޮކިއުމެންޓް ނިޒާމުގައި އުނިކަން ހުރުމާއި، ކޮރަޕްޝަނަށް މަގުފަހިވާ ގޮތަށް އަމަލު ކުރުމާއި އަދި އެސްއޯއީތަކުގެ ބޯޑުތަކާއި މެނޭޖްމަންޓުން ޖަވާބުދާރީވުން މަދުވުން ފަދަ ކަންކަން ހިމެނެ އެވެ.

އެސްޓީއޯއިން ފެނަކައިގެ 100 ޕަސެންޓް ހިއްސާ ގަނެ، އެސްޓީއޯގެ ސަބްސިޑަރީއަކަށް ބަދަލުކުރުމަށް ނިންމާފައިވީ ނަމަވެސް، ފެނަކައިގެ ހާލަތު ރަގަޅު ކުރެވޭނެ ގޮތްތައް ދިރާސާ ކޮށް ދާއިމީ ހައްލެއް ހޯދަން މި ރިފޯމް އެޖެންޑާގައި ހިމަނާފައިވެ އެވެ. މިކަމުގެ މިސާލެއްގެ ގޮތުން ބަޔާންކޮށްފައި ވަނީ، ސިނާޖީ ހާސިލްކުރެވޭނެ ގޮތަށް ސްޓެލްކޯއާ މާޖް ކުރުން ފަދަ ކަންކަން އަލުން ދިރާސާ ކުރުމެވެ.

އޭގެ އިތުރުން ރިފޯމް ކުރަން ނިންމާފައިވާ ކުންފުނިތަކަކީ؛

އެސްއޯއީތަކުގެ ތެރެއިން ބައެއް ކުންފުނިތަކަކީ އެ ކުންފުނީގެ އޮޕަރޭޝަނަލް ހަރަދުތަކަށް ސަރުކާރުން ކޮންމެ މަހަކުވެސް އެހީތެރިކަން ފޯރުކޮށްދޭ ކުންފުނިތަކެވެ. 

ފިނޭންސް މިނިސްޓްރީން ބުނީ، އެފްޑީސީ ސަރުކާރުގެ ބަޖެޓަށް ބަރޯސާވާ މިންވަރު ކުޑަކުރުމަށްޓަކައި ގަވަނަންސް ހަރުދަނާ ކުންފުންޏެއް ކަމަށްވާ އެޗްޑީސީގެ ދަށަށް ބަދަލު ކުރުމުން، ވިޔަފާރީގެ މަރުހަލާތައް ސްޓްރީމްލައިން ކުރުމާއި ރަގަޅު އުސޫލުތައް ތަންފީޒުކުރެވިގެން ދާނެ ކަމަށެވެ.

މި ރިފޯމް އެޖެންޑާގައި އެގްރޯނޭޝަނަލް ކޯޕަރޭޝަން ލިމިޓެޑް އުވާލަން ނިންމާފައިވާއިރު، މޯލްޑިވްސް އިންޑަސްޓްރިއަލް ޑިވެލޮޕްމެންޓް ފްރީ ޒޯން ޕަބްލިކް ލިމިޓެޑްގެ ދަށުުން އެ ކުންފުނިން ކުރަމުން އައި މަސައްކަތްތައް ކުރަން ނިންމާފައިވާ ކަމަށް މިނިސްޓްރީން ބުންޏެވެ.

އުވާލަން ނިންމާފައިވާ މޯލްޑިވްސް ސްޕޯޓްސް ކޯޕަރޭޝަނަކީ އުފެދުނީއްސުވެ އާމްދަނީ ލިބޭނެ އެކަށީގެންވާ މަސައްކަތެއް ކޮށްފައިވާ ކުންފުންޏެއް ނޫނެވެ. އެހެންކަމުން މި ކުންފުނި އުވާލަން ނިންމީ އެކަށީގެންވާ ނަތީޖާއެއް ނެރެވޭނެ ކަމަށް ނުފެންނާތީ ކަމަށް މިނިސްޓްރީން ބުންޏެވެ.