ބޮޑު އާމްދަނީ ލިބޭ މީހުން އާސަންދައަށް ހިއްސާއެއް ދޭންޖެހޭ ގޮތް ހަދަނީ

ދައުލަތުގެ މާލީ ކަންކަން އިސްލާހުކުރުމަށާއި އިޖުތިމާއީ އަދާލަތު ކަށަވަރުކުރުމަށް ސަރުކާރުން ހުށަހަޅާފައިވާ މާލީ އިސްލާހުތަކުގެ ތެރެއިން އާސަންދައިގެ ނިޒާމަށް ގެންނަ އިސްލާހުތަކުގެ ތެރެއިން ވަކިވަރަކަށްވުރެ ބޮޑު އާމްދަނީއެއް ލިބޭ މީހުން އާސަންދައަށް ހިއްސާވާންޖެހޭ ގޮތަށް އަދި ކޯޕޭގެ ގޮތުގައި ހިދުމަތްތަކަށް ކޮންމެވެސް މިންވަރެއްގެ އަގެއް ދައްކަންޖެހޭ ގޮތަށް ނިޒާމު ބަދަލުކުރަން ސަރުކާރުން ހުށަހަޅައިފި އެވެ. 

އާސަންދައިގެ ނިޒާމަށް ގެނައުމަށް ސަރުކާރުން ހުށަހަޅާ އިސްލާހުތަކުގެ ތަފުސީލު މިއަދު ސަރުކާރުގެ ގެެޒެޓުގައި ޝާއިއުކޮށްފައިވާ ބަޖެޓު ފޮތުގައި ސަރުކާރުންވަނީ ހިމަނާފަ އެވެ. ބަޖެޓު ފޮތުގައި ބުނެފައިވަނީ މި އަހަރުގެ ނިޔަލަށް އާސަންދައިގެ ހަރަދު 2.2 ބިލިއަން ރުފިޔާއަށް އަރާނެ ކަމުގައި ލަފާކުރެވޭ ކަމަށެވެ. އަދި ސިއްހީ ވެލްފެއާގެ ނިޒާމަަށް މުޅިޖުމްލަ 3.9 ބިލިއަން ރުފިޔާ ހަރަދުވާނެ ކަމަށްވެސް ލަފާކޮށްފައިވެ އެވެ. މިގޮތަށް ހަރަދު އިތުރުވުމަކީ ދެމެހެއްޓެނެވި ގޮތެއްގައި މި ނިޒާމުތައް ކުރިއަށްގެންދަން އޮތް ގޮންޖެހުމެއް ކަމަށް ބަޖެޓު ފޮތުގައި ފާހަގަކޮށްފައިވެ އެވެ. 

އާސަންދައިގެ ހާލަތަށް ބަލާއިރު މިހާރު އާސަންދައިން ކުރާ ހޭދައިގެ ބޮޑު މިންވަރެއް ހޭދަވަނީ ނިސްބަތުން މަދު ބަޔަކަށްކަން ފާހަގަކޮށް، ގިނަ މީހުންނަކީ އާސަންދައިން 16،000 ރުފިޔާއަށްވުރެ ކުޑަ މިންވަރެއް ހަރަދުކުރަންޖެހޭ ފަރާތްތައް ކަމަށް ބަޖެޓު ފޮތުގައި ބަޔާންކޮށްފައިވެ އެވެ. ހިދުމަތްތަކާއި ބޭސް ހިލޭ އާސަންދަ މެދުވެރިކޮށް ފޯރުކޮށްދިނުމަށް ބަޖެޓުން ބޮޑު ހޭދައެއް ހިނގަ އެވެ. 

އެހެންކަމުން އާސަންދައިގެ ނިޒާމުގެ އެފިޝިއަންސީ އިތުރުކޮށް އެ ނިޒާމުގެ ދެމެހެއްޓެނެވިކަން ކަށަވަރުކުރުމަށް ސަރުކާރުން ހުށަހަޅާފައިވަނީ މަހެއްގެ މައްޗަށް 60،000 ރުފިޔާއަށްވުރެ ބޮޑު އާމްދަނީއެއް ލިބޭ ނުވަތަ އިންކަމް ޓެކުސް ދައްކަންޖެހޭ މީހުން 2025 ވަނަ އަހަރުގެ އޭޕްރީލު މަހުން ފަށައިގެން އާސަންދައަށް ކޮންމެވެސް މިންވަރެއް ހިއްސާކުރަންޖެހޭ ގޮތަށް ނިޒާމު ބަދަލުކުރުމަށެވެ. 

ސަރުކާރުން ބުނާ ގޮތުން މި އިސްލާހުގެ ސަބަބުން އެންމެ ފަގީރު މީހާއަށް އެއްވެސް ބުރައެއް އުފުލަންނުޖެހި ހިލޭ ބޭސްފަރުވާ ލިބުމުގެ ޖާގަ އިތުރުކުރެވޭނެ އެވެ. އަދި އެއީ ދެކުނުކޮރެއާ ފަދަ ތަރައްގީވެފައިވާ ގައުމުތަކުގައި ކާމިޔާބުކަމާއެކު މިހާރުވެސް ހިންގަމުންދާ ނިޒާމެއްކަން ބަޖެޓު ފޮތުގައި ފާހަގަކޮށްފައިވެ އެވެ. 

އޭގެ އިތުރަށް ބޮޑު އާމްދަނީއެއް ލިބޭ މީހުން އައުޓްޕޭޝަންޓު ހިދުމަތްތައް ހޯދާއިރު އަދި އަސާސީ ބޭސްތައް ފިޔަވައި އެހެނިހެން ބޭސްތައް ގަންނައިރު ބިލުގެ ވަކި މިންވަރެއް އަމިއްލަ އަތުން ދައްކާ ގޮތަށް ނުވަތަ ކޯ-ޕޭ އުސޫލަށް ނިޒާމު ބަދަލުކުރަންވެސް ސަރުކާރުން ހުށަހަޅާފައިވެ އެވެ. އެ އިސްލާހުވެސް ތަންފީޒުކުރާނީ އަންނަ އަހަރުގެ އޭޕްރީލު މަހުން ފެށިގެންނެވެ. 

ކޯޕޭ ނިޒާމު ތައާރަފުކުރާއިރު އަމިއްލަ ޖީބުން އަހަރެއްގެ މައްޗަށް އެންމެ ގިނަވެގެން ދައްކަންޖެހޭނެ މިންވަރު ކަނޑައަޅާނެ އެވެ. އެ މިންވަރަށް އަމިއްލަ ޖީބުން ފައިސާ ދެއްކުމަށްފަހު ދެން އެއްވެސް ފައިސާއެއް އެފަދަ މީހުންވެސް ދައްކަންނުޖެހޭނެ އެވެ. 

މިފަދައިން އާސަންދައަށް ހިއްސާކުރަންޖެހޭ މިންވަރާއި އަހަރެއްގެ ތެރެގައި ގިނަވެގެން ހަރަދުކުރަންޖެހޭ މިންވަރު ކަނޑައަޅާނީ އާމްދަނީއަށް ބަލައި، އާމްދަނީ އިތުރުވި މިންވަރަކުން ހަރަދުކުރަންޖެހޭ މިންވަރާއި ހިއްސާގެ ގޮތުގައި އާސަންދައަށް ދައްކަންޖެހޭ ފައިސާވެސް އިތުރުވާ ގޮތަށް ކަމުގައި ސަރުކާރުން ބުނެ އެވެ. 

މި އިސްލާހުން އިސްތިސްނާކޮށްފަައިވަނީ 18 އަހަރު ނުފުރޭ ކުޑަކުދިންނާއި، 65 އަހަރުން މަތީގެ މީހުންނާއި، ދާއިމީކޮށް ފަރުވާކުރަންްޖެހޭ ބަލިތަކާއި ފުރާނައަށް ނުރައްކާވާ ބަލިތައް ތަހައްމަލުކުރާ މީހުންނެވެ. މި ފަރާތްތަކަކީ އާންމުކޮށް ސިއްހީ ހިދުމަތް ހޯދަންޖެހޭ މިންވަރު ގިނަ ބަޔަކަށްވާތީ އެ ފަރާތްތަކަށް މިހާރެކޭ އެއްގޮތަށް އާސަންދައިން ހިލޭ ބޭސްފަރުވާ ފޯރުކޮށްދޭނެ އެވެ.