އިޓަލީގައި ދިވެހި އެމްބަސީއެއް ހުޅުވަނީ
ރާއްޖޭން އިޓަލީއާއެކު ޑިޕްލޮމެޓިކް ގުޅުން ބަދަހި ކުރިތާ މިއަހަރަށް 58 އަހަރު ފުރޭނެ އެވެ.
އިޓަލީގައި ރާއްޖޭގެ އެމްބަސީއެއް ހުޅުވަން ނިންމާފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް މިކަން ހާމަކުރެއްވީ ޖުމްހޫރީ ދުވަހުގެ މުނާސަބަތުގައި ރޭ ބޭއްވި ޖަލްސާގައި ވާހަކަ ދައްކަވަމުންނެވެ. އިޓަލީގައި ރާއްޖޭގެ އެމްބަސީއެއް ހުޅުވަން ދިވެހި ސަރުކާރުން އެދުމުން، އެގައުމުގެ ސަރުކާރުން އެކަމަށް ހުއްދަ ދީފައިވާ ކަމަށް ރައީސް ވިދާޅުވި އެވެ.
ރައީސް ވިދާޅުވީ އޭގެ ސަބަބުން ރާއްޖޭގެ ރާއްޖޭގެ ޓޫރިޒަމަށް ފައިދާ ކުރާނެ ކަމެއް ކަމަށެވެ. ރާއްޖެއަށް ވިޔަފާރީގެ ދާއިރާއިން ފައިދާވާނެ މުހިންމު އެހެން ގައުމުތަކުގައި ވެސް އެމްބަސީތަކާއި ހައި ކޮމިޝަންތައް ހުޅުވަން ނިންމާފައިވާ ކަމަށް ވެސް އެމަނިކުފާނު ވިދާޅުވި އެވެ.
"މި ނިމިގެންދާ އަހަރުގެ ތެރޭގައި އަޅުގަނޑުމެން ތުރުކީގައި އެމްބަސީއެއް ހުޅުވައިފިން. އަޅުގަނޑުމެންނަށް މިހާރު ހުއްދަ ލިބިފައި އެބައޮތް އިޓަލީވިލާތުގައި އެމްބަސީއެއް ހުޅުވަން،" ރައީސް ވިދާޅުވި އެވެ.
އިޓަލީގައި ދިވެހި އެމްބަސީއެއް ގާއިމް ކުރަން ނިންމާފައިވާއިރު، އެގައުމަކީ ރާއްޖޭގެ ޓޫރިޒަމަށް މުހިންމު ގައުމެކެވެ. އެގޮތުން މިއަހަރުގެ މިހާތަނަށް އިޓަލީއަކީ ރާއްޖެއަށް ފަސް ވަނައަށް އެންމެ ގިނަ ފަތުރުވެރިން އައި ގައުމެވެ.
ރާއްޖޭން އިޓަލީއާއެކު ޑިޕްލޮމެޓިކް ގުޅުން ބަދަހި ކުރިތާ މިއަހަރަށް 58 އަހަރު ފުރޭނެ އެވެ.
ކޮމެންޓް
Republic of Maldives