މޮސްކޯއަށް ވަރުގަދަ ހަމަލާއެއް | 34 ޑްރޯނު ބޭނުންކޮށްގެން ދިން ހަމަލާ

ރަަޝިޔާ-ޔޫކުރެއިން ހަނގުރާމަ ފެށުނުފަހުން ޔޫކުރެއިނުން ރަޝިޔާގެ ވެރިރަށް މޮސްކޯއަށް މިހާތަނަށް ދިން އެންމެ ވަރުގަދަ ހަމަލާގައި 34 ޑްރޯނެއް ބޭނުންކޮށްގެން އެ ޝަހަރަށް ހަމަލާދީފި އެވެ. 

މި ހަމަލާތަކުގެ ސަބަބުން މޮސްކޯގެ އެންމެ ބޮޑު ތިން އެއާޕޯޓަށް ދަތުރުކުރި ފުލައިޓުތައް އެހެނިހެން އެއާޕޯޓުތަކަށް ބަދަލުކުރަންޖެހުނެވެ. އަދި އެ ހަމަލާތަކުގެ ސަބަބުން ފަސް މީހަކަށް އެކިވަރުގެ އަނިޔާތައް ލިބުނުކަމަށް ރޮއިޓާސްއިން ރިޕޯޓުކޮށްފައިވެ އެވެ. 

ހުޅަނގު ރަޝިޔާގެ އެކި ސަރަހައްދުތަކުގެ މަތިން ދަތުރުކުރި ޔޫކުރެއިނުގެ 50 ޑްރޯނު ރަޝިޔާގެ ވައިގެ ދިފާއީ ނިޒާމުން ވައްޓާލާފައިވަކަމަށް އެ ގައުމުގެ ދިފާއީ ވުޒާރާއިން ބުނެފައިވެ އެވެ. 

"ރަޝިޔާގެ ސަރަހައްދުތަކުގެ ތެރޭގައި އެއާޕްލޭން ޒާތުގެ ޑްރޯނުތަކެއް ބޭނުންކޮށްގެން ޓެރަރިސްޓު ހަމަލާއެއް ދިނުމަށް ޔޫކުރެއިނުން ކުރި މަސައްކަތް ނާކާމިޔާބުކޮށްލެވިއްޖެ،" ރަޝިޔާގެ ދިފާއީ ވުޒާރާއިން ނެރުނު ބަޔާނެއްގައި ބުނެފައިވެ އެވެ. 

ރަޝިޔާގެ ވައިގެ ދަތުރުފަތުރާ ބެހޭ އިދާރާއިން ބުނެފައިވަނީ ޑޮމޮޑެޑޮވޯ އެއާޕޯޓާއި ޝެރެމެޓްޔެވޯ އަދު ޒުކޮސްކީ އެއާޕޯޓަށް ދަތުރުކުރި 36 ފުލައިޓެއް އެހެން އެއާޕޯޓުތައް ފޮނުވައިލަންޖެހުނު ނަމަވެސް މިހާރު އެ ވައިގެ ބަނދަރުތައް ކުރިއެކޭ އެއްގޮތަށް ހިންގަމުން އަންނަ ކަމަށެވެ. 

މޮސްކޯއާއި އެ ޝަހަރުގެ ވަށައިގެންވާ ސަރަހައްދުތަކުގައި 21 މިލިއަން މީހުން ދިރިއުޅޭއިރު މިއީ ޔޫރަޕުގައިވެސް އެންމެ ބައިބޯ އެއް މެޓްރޮޕޮލިޓަން ސަރަހައްދެވެ. 

މި ހަމަލާގެ ރައްދުގައި ރަޝިޔާއިންވަނީ 145 ޑްރޯނު ޔޫކުރެއިނުގެ ތެރެއަށް ފޮނުވާލާފަ އެވެ. ޔޫކުރެއިނުގެ ދިފާއީ ވުޒާރާއިން ބުނެފައިވަނީ އެ ޑްރޯނުތަކުގެ ތެރެއިން 62 ޑްރޯނެއް ޔޫކުރެއިނުގެ ވައިގެ ދިފާއީ ނިޒާމުތަކުން ވައްޓާލާފައިވާ ކަމަށެވެ. 

ބައެއް މަސްއޫލުވެރިން ވިދާޅުވާ ގޮތުގައި ރަޝިޔާ ސިފައިން ހަނގުރާމައިގެ އެންމެ ކުރީ ދުވަސްކޮޅަށްފަހު ކުރިއަށްނުޖެހޭހައި ހަލުއިކޮށް ކުރިއަށްޖެހެން ފަށާފައިވާއިރު އަދި އެމެރިކާގެ ރައީސްކަމަށް ޑޮނާލްޑް ޓުރަމްޕު އިންތިހާބުވެވަޑައިގަތުމާވެސްއެކު ޔޫކުރެއިނުން މިހާރު ކުރަމުންދާ މަސައްކަތްތަކަކީ ހަނގުރާމައިގެ އެންމެ ފަހު ފިޔަވަހީގެ މަސައްކަތްތަކެވެ. 

ވެރިކަމުގެ ފުރަތަމަ ދުވަހުގައި ޔޫކުރެއިނާއި ރަޝިޔާގެ ހަނގުރާމަ ނިމުމަކަށް ގެންނެވުމަކީ ޓުރަމްޕުގެ ވައުދުފުޅެކެވެ. ނަމަވެސް އެ އަމާޒު ހާސިލުކުރައްވަން ގެންގުޅުއްވާ ސިޔާސަތެއް އޭނާ ހާމަނުކުރައްވަ އެވެ.