ފޯޅަވަހީގެ މައްޗަށް ރާއްޖޭގެ ދައުވާއެއް އޮތްކަން އިނގިރޭސި ސަރުކާރަށް އަންގައިފި

ޗާގޯސް ނުވަތަ ފޯޅަވަހީގެ މައްޗަށް ދިވެހިރާއްޖޭގެ ތާރީހީ ދައުވާއެއް އޮތްކަން ރަސްމީކޮށް ދިވެހި ސަރުކާރުން އިނގިރޭސިވިލާތަށް އަންގައިފި އެވެ. 

ޗާގޯސްގެ މައްޗަށް ދައުވާކުރާ ބޭރުގެ ގައުމަކީ މޮރިޝަސް އެވެ. އިނގިރޭސިވިލާތުން މިހާރުވަނީ މޮރިޝަސްއަށް އެ ސަރަހައްދު ހަވާލުކުރަން ނިންމާފަ އެވެ. އެ ނިންމުމަކީ މީގެ ކުރިން ބައިނަލްއަގުވާމީ ކޯޓުތަކުންވެސް އެ ސަރަހައްދުގެ މައްޗަށް ހިނގާނީ މޮރިޝަސްގެ ސިޔާދަތީ ބާރުކަމަށް ކަނޑައަޅާފައިވާތީ ނިންމި ނިންމުމެކެވެ. މީގެ ކުރިން ދިވެހި ސަރުކާރަކުން ރަސްމީކޮށް ފޯޅަވަހި ހޯދުމަށް އެއްވެސް މަސައްކަތެއް ކޮށްފައި ނެތެވެ. 

ޗާގޯސްއާއި ރާއްޖެއާ ދެމެދުގައި އޮންނަ ކަނޑުގެ ސަރަހައްދުގެ އިން ވަކިކުރުމުގެ މައްސަލައިގެ ތެރެއިން ޗާގޯސްގެ މައްޗަށް މޮރިޝަސްގެ ސިޔާދަތު އޮންނާނެކަން ފުރަތަމަ ފަހަރަށް ދިވެހި ދައުލަތުން ގަބޫލުކޮށް އެންގެވީ ކުރީގެ ރައީސް އިބްރާހީމް މުހައްމަދު ސޯލިހެވެ. އެއިރު އިދިކޮޅު ފަރާތްތަކުން ބުނެފައިވަނީ ރައީސް ސޯލިހުގެ އެނިންމުމާ ގުޅިގެން ދިވެހިރާއްޖޭގެ ހާއްސަ އިގުތިސާދީ ސަރަހައްދުގެ ބައެއް ގެއްލިފައިވާ ކަމަށެވެ. 

ޖުމްހޫރީ ދުވަހުގެ މުނާސަބަތުގައި މިރޭ ބޭއްވި ރަސްމިއްޔާތުގައި ދެއްކެވި ވާހަކަފުޅުގައި ރައީސުލްޖުމްހޫރިއްޔާ ޑރ.،މުހައްމަދު މުއިއްޒުވަނީ ގެއްލުނު ކަނޑުގެ ސަރަހައްދު ހޯދުމަށް މި ސަރުކާރުން ކުރަމުންދާ މަސައްކަތުގެ ތަފުސީލުތައް ހާމަކުރައްވާފަ އެވެ. އެމަނިކުފާނު ވިދާޅުވެފައިވަނީ އެ ސަރަހައްދަކީ ކަނޑައެޅިފައިވާ ދުސްތޫރީ ނިޒާމާ ހިލާފަށް ރޯމާދުވާލު އެއިރުގެ ވެރިކަމުން ގެއްލުވައިލި ސަރަހައްދެއް ކަމަށެވެ.  

"ރޯމާދުވާލު ކަނޑައެޅިފައިވާ ދުސްތޫރީ ނިޒާމާ ހިލާފަށް ކަނޑައެޅިގެން ގާނޫނާ ހިލާފަށް ރައްޔިތުންގެ މަޖިލީހުގައި އަހައިލުމެއް ނެތި އަޅުގަނޑުމެންގެ ކަނޑުން ބޮޑު ބައެއް ދޫކޮށްލީ،" ރައީސް ވިދާޅުވި އެވެ. 

އެކަން ކޮށްފައި އޮތް ގޮތުން އެ މައްސަލަ ހައްލުކުރުމަށް ބޮޑެތި ދަތިތަކެއް އެބަހުރި ކަމަށާއި، އެގޮތުން އދގައި ބަންޑާރަނައިބު އޮފީހުގެ މުވައްޒަފެއް ބަހައްޓައިގެން ގާނޫނީ ޓީމުތައް ނަގައިގެން އެ ސަރަހައްދު އިއާދަކުރުމުގެ މަސައްކަތް ކުރައްވަމުންދާކަމަށް ރައީސް ވިދާޅުވި އެވެ. 

ރައީސް އިތުރަށް ވިދާޅުވީ ޗާގޯސް މޮރިޝަސްއާ ހަވާލުކުރަން އިނގިރޭސި ސަރުކާރުން ނިންމިކަން އެނގުމާ ގުޅިގެން، އެ ސަރަހައްދަކީ ދިވެހިރާއްޖޭގެ ބައެއްކަން ދިވެހި ރަސްރަސްކަލުންގެ ލިޔެކިޔުންތަކުން އެނގެން އޮތަތީ، އެ ސަރަހައްދަކީ އެހެން ގައުމެއްގެ ބައެއްގެ ގޮތުގައި އޮތުމަށްވުރެ ދިވެހިރާއްޖޭގެ ބައެއްގެ ގޮތުގައި އޮތުން އައުލާކަން ބޮޑުކަން ފާހަގަކޮށް އިނގިރޭސި ސަރުކާރަށް ސިޓީއެއް ފޮނުވާފައިވާ ކަމަށެވެ. 

"އެތަނަކީ އަޅުގަނޑުމެންގެ ރަސްރަސްކަލުންގެ ލިޔެކިޔުންތަކާއެކު ލިޔެކިޔުންތަކުން އަޅުގަނޑުމެންގެ ތަނެއްގެ ގޮތުގައި ފެންނާތީ އެތަނަކީ އެހެން ގައުމެއްގެ ތަނަކަށްވުމަށްވުރެ ރާއްޖޭގެ ތަނަކަށްވުން އައުލާކަން ބޮޑުވެގެންވާ ތަނެއްގެ ގޮތުގައި ބެލިދާނެކަމަށް އަޅުގަނޑުމެން ސިޓީން ދަންނަވާފައިވާނީ،" ރައީސް ވިދާޅުވި އެވެ.