ފުވައްމުލަކުން ގެއްލުނު ކުއްޖާ ފެނިއްޖެ

ފުވައްމުލަކުން ހަތަރު އަހަރުގެ ކުއްޖަކު ގެއްލިގެން ހޯދަނިކޮށް ފެނިއްޖެ އެވެ.

ދިވެހި ފުލުހުންގެ ހިދުމަތުން މިރޭ ބުނީ ފުވައްމުލަކުން ހަތަރު އަހަރުގެ ފިރިހެން ކުއްޖަކު ގެއްލިގެން ރިޕޯޓުކޮށްފައިވާތީ އެ ކުއްޖާ ހޯދުމުގެ މަސައްކަތް ކުރި ކަމަށެވެ.

ފުލުހުންގެ ތަރުޖަމާން އެސިސްޓެންޓް ކޮމިޝަނާ އޮފް ޕޮލިސް އަހްމަދު ޝިފާނު އެކްސްގައި ކުރެއްވި ޕޯސްޓެއްގައި ވިދާޅުވީ ފުވައްމުލައް، މިސްކިތްމަގު، މާކޯނި އިޒްޔާން ހުޝާމް މުހައްމަދު ގެއްލިފައިވާކަމަށް ރިޕޯޓުކުރުމާ ގުޅިގެން އޭނާ ހޯދުމުގެ މަސައްކަތް ފެށި ކަމަށެވެ.

އަދި ކުއްޖާގެ އާއިލާއާ ހަވާލާދެއްވައި ޝިފާނު ވިދާޅުވީ އޭނާ އެންމެ ފަހުން ފެނުނީ މިއަދު ހަވީރު 4؛45 ހާއިރު، ފުވައްމުލަކު ދިގުވާޑު ފުލެޓު ނަންބަރު 02 ޖީ 18 ވަނަ ފުލެޓު ފަހަތުން ކަމަށެވެ. އަދި އެއިރު އޭނާ ލައިގެން ހުރީ 10 ނަންބަރު ޖަހާފައިވާ ކަޅު ޖާޒީއެއް ކަމަށް އާއިލާއިން މައުލޫމާތު ދީފައިވާ ކަމަށެވެ.

ފަހުން ފުލުހުން ބުނީ ކުއްޖާ ފެނިފައިވާ ކަމަށެވެ. ހާލު ރަނގަޅު ކަމަށް ވެސް ބުންޏެވެ. ނަމަވެސް ކުއްޖާ ފެނުނު ތަނެއް / ގެއްލެން ދިމާވި ސަބަބެއް ނުބުނެ އެވެ.

ކުޑަކުދިން ގެއްލޭ މައްސަލަތައް ދޭތެރެދޭތެރެއިން ފެންމަތިވެ އެވެ. ނަމަވެސް މިއީ މިހާ ހަގު ކުއްޖަކު ގެއްލިގެން ހޯދަން ފުލުހުން އިއުލާނުކުރި ފުރަތަމަަ ފަހަރެވެ.