ބަންކަރިން ރޭވި ގޮތަށް ކުރިއަށް؛ އެއް އުޅަނދު އައީ ޑެލިވަރީއަކަށް، އަނެއް އުޅަނދު މަރާމާތުކުރަނީ

ބަންކަރިން ހިދުމަތް ރޭވި ގޮތަށް މިހާރުވެސް ކުރިއަށްދާ ކަމަށާއި، އެ ހިދުމަތް ބޭނުންކުރާ އެއް އުޅަނދު މާލެ ކައިރިއަށް އައި ތެޔޮ ޑެލިވެރީއެއް ހެދުމަށް ކަމުގައި އެސްޓީއޯގެ މެނޭޖިން ޑިރެކްޓާ ޝިމާދު އިބްރާހީމް ވިދާޅުވެއްޖެ އެވެ. 

އެސްޓީއޯއާއި ދުނިޔޭގެ އެންމެ ބޮޑު އެއް ތެޔޮ ކުންފުނި ވިޓޯލް ގުޅިގެން ބަންކަރިން ހިދުމަތް ފޯރުކޮށްދެނީ އޮފް ޝޯ ހިދުމަަތެއްގެ ގޮތުގަ އެވެ. އެހެންކަމުން އެ ހިދުމަތް ފޯރުކޮށްދެނީ އެކަމަށް ހާއްސަ ތެޔޮ ބޯޓުފަހަރުތަކެއް ބޭނުންކޮށްގެންނެވެ. 

އެ ހިދުމަތް ފޯރުކޮށްދިނުމަށް ބޭނުންކުރާ ބޯޓުތަކުގެ ތެރެއިން ދެ ބޯޓެއް މާލޭ ސަރަހައްދަށް އައިސްފައިވާތީ އޮންލައިން ނޫހެއްގައި އެ ވިޔަފާރި ހުއްޓުނީތޯ ނުވަތަ އެ ހިދުމަތް ދިނުމަށް ކަނޑައެޅި ސަރަަހައްދު ނޫން އެހެން ސަރަހައްދަކަށް ބަދަލުކުރީތޯ ސުވާލު އުފައްދާފައިވެ އެވެ. 

އެ ސުވާލުތަކަށް ޖަވާބުދެއްވަމުން ޝިމާދު ވިދާޅުވީ އޮފް ޝޯ ހިދުމަތް ދިނުމުން ލިބޭ އެންމެ ބޮޑު ފަސޭހައަކީ ފްލެކްސިބިލިޓީ ކަމަށެވެ. މާނައަކީ ހިދުމަތް ބޭނުންވާ އުޅަނދެއް އޮތް ތަނަކަަށް ހިދުމަތްދޭ ތެޔޮ ބޯޓުތައް ގޮސް ހިދުމަތް ދިނުމުގެ ފުރުސަތު އޮންނާނެ ކަމަށެވެ. 

ބަަންކަރިން ހިދުމަތަށް ބޭނުންކުރާ އުޅަނދުތަކުގެ ތެރެއިން މެރިން ބެލާ މާލެ ކައިރިއަށް އައީ އޯޑަރަކަށް ތެޔޮ ޑެލިވެރީކޮށްދިނުމަށް ކަމުގައިވެސް ޝިމާދު ވިދާޅުވި އެވެ. ނަމަވެސް އެ ޑިލެވެރީ ހަދައިދީ ކޮން ކުންފުންޏެއްގެ ބޯޓަކަށްކަން އޭނާ ހާމަނުކުރައްވަ އެވެ. 

ދެވަނަ ބޯޓުކަމަށްވާ މެރިން އޭންޖެލް މާލެ ސަރަހައްދަށް ގެނައީ ރޫޓިންކޮށް ކުރަންޖެހޭ މަރާމާތުގެ މަސައްކަތެއް ކުރުމަށެވެ. ޝިމާދު ފާހަގަކުރެއްވި ގޮތުގައި މިހާތަނަށް އިހަވަަންދިިއްޕޮޅުގައި އެފަދަ މަރާމާތުކުރުމަށް ބޭނުންވާ ވޯކްޝޮޕުތައް ގާއިމުކުރެވިފައި ނެތެވެ. 

ޝިމާދުވަނީ ފަންނީ ކަންކަމާ ގުޅޭ ހަބަރުތައް ގެނައުމުގައި ވިސްނުންތެރިކަން އިސްކުރުމަށާއި، ހާއްސަކޮށް މުހިއްމު އިންވެސްޓުމެންޓުތަކާ ގުޅޭ ހަބަރުތައް ގެނަައުމުގައި ކަން އޮތް ގޮތް ރަނގަޅަށް ބެލުމަށް އިލްތިމާސްކުރައްވާފަ އެވެ.