ކޫއްޑޫ ކޯލްޑް ސްޓޮރޭޖު އިތުރުކުރުމުގެ މަޝްރޫއު ހަވާލުކޮށްފި

ގއ.ކޫއްޑޫގައި ހުންނަ ފިޝަރީޒް ކޮމްޕްލެކްސްގެ ކޯލްޑް ސްޓޮރޭޖު އިތުރު 4،000 ޓަނުގެ މަސް ރައްކާކުރެވޭ މިންވަރަށް އިތުރުކުރުމުގެ މަޝްރޫއުގެ އެއްބަސްވުމުގައި ސޮއިކޮށްފި އެވެ. 

މި މަޝްރޫއު ހަވާލުކޮށްފައިވަނީ ލަކީ ގްލޯބަލް ސްޓްރޭޖްސް ކިޔާ ކުންފުންޏަކާ އެވެ. އެ ކުންފުނީގެ ފަރާތުން މެނޭޖިން ޑިރެކްޓާ އަޝިޝް އޮބެރޯއީ އެއްބަސްވުމުގައި ސޮއިކުރެއްވިއިރު ދިވެހި ސަރުކާރުގެ ފަރާތުން އެއްބަސްވުމުގައި ސޮއިކުރެއްވީ ފިޝަރީޒް މިނިސްޓަރު އަހްމަދު ޝިޔާމެވެ. 

މި މަޝްރޫއުގެ އަގަކީ 6.6 މިލިއަން ރުފިޔާ އެވެ. މަސައްކަތް ނިންމަންޖެހެނީ 365 ދުވަހުގެ ތެރޭގަ އެވެ. މަޝްރޫއަށް ހަރަދުކުރަނީ ސައުދީ ފަންޑް ފޯ ޑިވެލޮޕްމެންޓުން ފޯރުކޮށްދޭ އެހީތެރިކަމުންނެވެ. 

މިއަދު ރައީސް އޮފީހުގައި އޮތް ރަސްމިއްޔާތުގައި މަސް ދޯނިފަހަރުގައި ލޮނުފެނުން ގަނޑު އުފައްދާ ނިޒާމު ބެހެއްޓުމަށް ފައިސާ ހަމެޖެހުނު ފަރާތްތަކަށް އެވޯޑު ލެޓާ ހަވާލުކުރުން އޮތެވެ. އެވޯޑު ލެޓާތައް ހަވާލުކޮށްދެއްވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒެވެ. 

މި ރަސްމިއްޔާތުގައި ފިނޭންސް މިނިސްޓަރު ޝިޔާމު ވިދާޅުވީ ކޫއްޑޫގައި މަސް ރައްކާކުރެވޭ މިންވަރު އިތުރުކުރުމުގެ މަޝްރޫއަކީ ދެކުނުގެ މަސްވެރިންނަށް މުހިއްމު މަސައްކަތެއް ކަމަށް އަދި ރާއްޖޭގެ ޖުމްލަ ކޯލްޑް ސްޓޮރޭޖު ގާބިލުކަން އިތުރުކުރުމުގެ މަސައްކަތުގެ މުހިއްމު ބައެއް ކަމަށެވެ. 

އޭގެ އިތުރަށް ލޮނު ފެނުން ގަނޑު އުފެއްދުމުގެ ނިޒާމު މިހާރު ގާއިމުކުރެވިފައިވަނީ 70 ދޯނީގައިކަން ފާހަގަކުރައްވައި ޝިޔާމު ވިދާޅުވީ މި ނިޒާމު ގިނަ ދޯނިފަހަރުގައި ގާއިމުކުރެވުމަކީ މަސްވެރިން ތެލަށް ކުރާ ހަރަދު ކުޑަވާނެ ކަމެއް ކަމުގަ އެވެ.