ހުރިހާ އަތޮޅަކުން އެސްޓީއޯ ރޭޓުގައި ތެޔޮ ފޯރުކޮށްދިނުމަށް މަޝްރޫއެއް ފަށައިފި
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ރިޔާސީ ވައުދުފުޅާ އެއްގޮތަށް ހުރިހާ އަތޮޅުތަކުން އެސްޓީއޯ ރޭޓުގައި ތެޔޮ ލިބޭނެ އިންތިޒާމު ހަމަޖެއްސުމަށް އެ ކުންފުނިންވަނީ ގައުމީ ފެންވަރުގެ މަޝްރޫއެއް ފަށާފަ އެވެ.
އެސްޓީއޯއިން ގެނެސް ވިއްކާ ތެޔޮ އެކުންފުނިން ވިއްކާ އަގުގައި ހުރިހާ އަތޮޅަކުން ލިބޭނެ އިންތިޒާމު ހަމަޖެއްސުމުގެ މަޝްރޫއެއް އެސްޓީއޯއިން ފަށައިފި އެވެ.
ކޮންމެ އަތޮޅަކުން މަދުވެގެން އެއް ރަށުން އެސްޓީއޯގެ ރޭޓުގައި ޑީސަލް ގަންނަން ލިބޭނެ ގޮތް ހަމަޖެއްސުމަކީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ރިޔާސީ ވައުދުފުޅެކެވެ. އަދި އެ އިންތިޒާމު ހަމަޖެއްސުމަށް ހާއްސަ މަޝްރޫއެއް އެސްޓީއޯއިން މިއަދުވަނީ ފަށާފަ އެވެ.
އަތޮޅު ތެރޭގައި އެސްޓީއޯގެ އަގުތަކުގައި ތެޔޮ ލިބޭނެ އިންތިޒާމު ހަމަޖެއްސުމުގެ މަޝްރޫއު އިފުތިތާހުކޮށްދެެއްވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒެވެ.
ރައީސްގެ ވައުދުފުޅާ އެއްގޮތަށް މާލެ އަތޮޅުގެ މަސްވެރިންނަށް ފަސޭހައިން އެސްޓީއޯ ރޭޓުގައި ތެޔޮ ލިބޭނެ އިންތިޒާމު ހަމަަޖެއްސުމުގެ ގޮތުން އެސްޓީއޯއިންވަނީ ހުޅުމާލޭގައި ހުންނަ ފިއުލް ސަޕްލައި މޯލްޑިވްސް (އެފްއެސްއެމް)ގެ ފިއުލް ޝެޑުން އެ ކުންފުނިން ތެޔޮ ވިއްކާ ރޭޓުގައި މަސްވެރިންނަށް ޑީސަލް ލިބޭނެ އިންތިޒާމު ހަމަޖައްސާފަ އެވެ.
މިއަދު ރައީސް އޮފީހުގައި އޮތް ރަސްމިއްޔާތުގައި ވާހަކަދައްކަވަމުން އެސްޓީއޯގެ މެނޭޖިން ޑިރެކްޓާ ޝިމާދު އިބްރާހީމު ވިދާޅުވީ މިހާރު އެ ކުންފުނީގެ އަމާޒަކީ ރާއްޖޭގެ ހުރިހާ އަތޮޅެއްގައި އެ ކުންފުނިން ކަނޑައަޅާފައިވާ ވަކި ރަށްތަކެއްގައި އެސްޓީއޯ ރޭޓުން ތެޔޮ ވިއްކޭނެ އިންތިޒާމު ހަމަޖެއްސުން ކަމަށެވެ.
އެސްޓީއޯ ރޭޓުގައި ތެޔޮ ވިއްކަން ފަށާނެ ރަށްތައް
- 1.ސ.ހުޅުމީދޫ
- 2.ޏ.ފުވައްމުލައް
- 3.ގދ.ފަރެސްމާތޮޑާ
- 4.ލ.ގަން
- 5.ތ.ހިރިލަންދޫ
- 6.ދ.ކުޑަހުވަދޫ
- 7.މ.މުލަކު
- 8.ފ.ނިލަންދޫ
- 9.ވ.ފެލިދޫ
- 10.އއ.މަތިވެރި
- 11.ޅ.ފެލިވަރު
- 12.ރ.ދުވާފަރު
- 13.ނ.މަނަދޫ
- 14.ށ.މިލަންދޫ
- 15.ހދ.ހަނިމާދޫ
- 16.ހއ.އިހަވަންދޫ
ޝިމާދު ވިދާޅުވީ އެސްޓީއޯގެ އަމާޒަކީ 2026 ވަނަ އަހަރުގެ ފެބްރުއަރީ މަހުގެ ނިޔަލަށް މިހުރިހާ ރަށެއްގައި އެސްޓީއޯގެ ސެޓްއަޕެއް ހަދައި އެ ރަށްތަކުގައި މަސްވެރިންނާއި އާންމުންނަށް ހެޔޮ އަގުގައި ތެޔޮ ފޯރުކޮށްދިނުން ކަމަށެވެ.
މި ރަށްތަކުގައ ހަދާ ސެޓްއަޕް ހަދާނީ ތާނގީ ބެހެއްޓުމުގެ ބަދަލުގައި ތެޔޮ ކޮންޓެއިނަރު ބަހައްޓައިގެން ތެޔޮ ވިއްކޭ ގޮތަށް ކަމުގައި ޝިމާދު ވިދާޅުވި އެވެ.
ކޮމެންޓް
Republic of Maldives