އޮޅުވެިލި ރިސޯޓުގެ ސަރަހައްދުން މާމެންދޫގެ އިހުތިސާސަށް ވަންނަ ބައި އުނިކުރައްވައިފި

ލާމަރުކަޒީ ގާނޫނުގެ ދަށުން ލ.މާމެންދޫގެ އިހުތިސާސު ކަނޑައެޅިއިރު އެ ރަށުގެ އިހުތިސާސުގެ ތެރެއަށް ވަންނަ އޮޅުވެލި ރިސޯޓުގެ ސަރަހަައްދު އެ ރަށުގެ އިހުތިސާސުން އުނިކުރެއްވުމަށް ރައީސް ނިންމަަވައި، އެ ކަމުގެ ގަރާރު ގެޒެޓުގައި މިއަދު ޝާއިއުކޮށްފި އެވެ. 

ލާމަރުކަޒީ ގާނޫނުގެ ދަށުން ރަށްތަކުގެ އިހުތިސާސް ކަނޑައެޅުއްވީ ކުރީގެ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު 2020 ވަނަ އަހަރު ނެރުއްވި ރިޔާސީ ގަރާރެއްގަ އެވެ. އެއިރު މާމެންދޫގެ އިހުތިސާސު ކަނޑައަޅުއްވާފައި އޮތް ގޮތުން އެ ރަށް ކައިރީ އޮންނަ އޮޅުވެލި ރިސޯޓުގެ ބައެއް ސަރަހައްދުތައް އެ ރަށުގެ އިހުތިސާސަށް ވަދެ އެވެ. 

އެގޮތުން އޮޅުވެލި ރިސޯޓުގެ ސަޕްލައި ޖެޓީއާއި ފަތުރުވެރިން ފީނުމަށް ބޭނުންކުރަމުން އައި ސަރަހައްދު އޮތީ މާމެންދޫގެ އިހުތިސާސުގެ ތެރޭގަ އެވެ. އެކަން އިސްލާހުކޮށްދިނުމަށް އެއިރު މާމެންދޫ ކައުންސިލުން އެދުނު ނަމވެސް އެކަން އޮތީ ނުކުރެވި އެވެ. 

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ރިޔާސީ ގަރާރަކުން އެބައި އުނިކުރައްވައި، އެ ގަރާރު ސަރުކާރުގެ ގެޒެޓުގައި ޝާއިއުކުރީ ނޮވެންބަރު 6 ވަނަ ދުވަހު އެވެ. 

ސިކްސް ސެންސަސްއިން ހިންގާ ރިސޯޓުން ބޭނުންކުރަމުން އައި ސަރަހައްދު މާމެންދޫގެ އިހުތިސާސުގެ ތެރޭގައި ހިމެނޭތީ ކޮންމެ މަހަކު އެ ރިސޯޓުން ގެންދިޔައީ އެ ރަށު ކައުންސިލަށް 1،800 ޑޮލަރު ދައްކަމުންނެވެ. 

ރިސޯޓުގެ ސަރަހައްދުތައް މާމެންދޫ ކައުންސިލުގެ އިހުތިސާސުން އުނިކުރި ނަމަވެސް މާމެންދޫ ކައިރީ އޮންނަ ފަޅުރަށެއް ކަމުގައިވާ ހުޅިމެންދޫ އެ ރަށުގެ އިހުތިސާސުގެ ތެރޭގައި އޮންނާނެ އެވެ.