ޑަބްލިއުޓީއެމްގައި ރާއްޖެ | މި އަހަރު ޓޫރިޒަމް ސިނާއަތުގެ 217 ބައިވެރިން

ދުނިޔޭގެ އެންމެ މަޝްހޫރު ޓޫރިޒަމް ފެއާގައި މި އަހަރު ރާއްޖެއިން 91 ޕާޓްނަރުން ތަމްސީލުކުރަން ޓޫރިޒަމް ސިނާއަތުގެ 217 ބައިވެރިން ބައިވެރިވެ އެވެ.

އިނގިރޭސިވިލާތުގެ އެކްސްސެލް ލަންޑަންގައި ކުރި އަށް ދާ މި އަހަރުގެ ޑަބްލިއުޓީއެމް ފެއާގައި ރާއްޖެ ތަމްސީ ކުރާ ބައިވެރިންނަށް 650 އަކަމީޓަރުގެ ތަނަވަސް ސިންގަލް ޑެކާ ސްޓޭންޑެއް އެމްއެމްޕީއާރުސީން ތައްޔާރުކޮށްފައިވެ އެވެ. 

މި އަހަރު ރާއްޖޭގެ ފެއާގައި 75 ކޯ އެގްޒިބިޓަރު ކައުންޓަރާއި 55 ބީ ޓު ބީ މީޓިން ޓޭބަލް އަދި ތިން އިންޑަސްޓްރީ މީޓިން އޭރިއާ އަދި ޓްރެޑިޝަނަލް ކޯނަރެއް ހިމެނޭ ގޮތަށް ފަރުމާކޮށްފައިވާ ސްޓޭންޑެކެވެ. މީގެ އިތުރުން މި އަހަރުގެ ސްޓޭންޑުގައި ފޮޓޯ ބޫތަކާއެކު ސްޓޭންޑަށް ޒިޔާރަތްކުރާ ފަރާތްތަކަށް ރާއްޖެއަށް ޒިޔާރަތްކުރި ތަންތަން ފާހަގަކުރެވޭނެ އިންތިޒާމްވެސް ވަނީ ސްޓެންޑުގައި ހިމަނާފައިވެ އެވެ.

މި އަހަރުގެ ޑަބްލިއުޓީއެމްގައި އެމްއެމްޕީއާރުސީއިން ދަނީ އިނގިރޭސިވިލާތާއި ދުނިޔޭގެ މަޝްހޫރު ޓްރެވަލް ޓްރޭޑް ޕްރޮފެޝަނަލުންނާ ގުޅިގެން، ގިނަ ބައްދަލުވުންތަކެއް ބޭއްވުމާއެކު ރާއްޖޭގެ ފަތުރުވެރިކަމުގެ އުފެއްދުންތަކުގެ އެންމެ ފަހުގެ އަޕްޑޭޓްތައް ހިއްސާ ކުރަމުންނެވެ. އަދި ވަކިވަކި ޕްރޮޕަޓީތައް އިޝްތިހާރު ކުރުމަށް ސްޓޭކްހޯލްޑަރުންނަށް ޕްލެޓްފޯމެއް ފަހިކޮށްދެމުންނެވެ.

ޑަބްލިއުޓީއެމް އޮންނަ އިނގިރޭސިވިލާތުން މި އަހަރުގެ ސެޕްޓެމްބަރު މަހުގެ ނިޔަލަށް 125،016 ފަތުރުވެރިން ޒިޔާރަތްކޮށްފައިވެ އެވެ. މިއީ 8.5 އިންސައްތަ މާކެޓް ހިއްސާ އެވެ. އެމްއެމްޕީއާރުސީއިން 2024 ވަނަ އަހަރުގެ ތެރޭގައި ވެސް އިނގިރޭސިވިލާތުގެ އޯޑިއަންސަށް ރާއްޖެ އިޝްތިހާރުކުރުމަށް ގިނަ މަސައްކަތްތަކެއް ވަނީ ކޮށްފަ އެވެ. މީގެ ތެރޭގައި"ޑިސްކަވާ މޯލްޑިވްސް" ވެބިނާ ސީރީޒް ފަދަ ހަރަކާތްތަކާއި ބޮޑެތި ޓްރެވަލް އޮޕަރޭޓަރުންނާ އެކު ބާއްވާފައިވާ ޖޮއިންޓް ޕްރޮމޯޝަންތައް ފަހާގަކޮށްލެވެ އެވެ.

މި އަހަރުގެ ޑަބްލިއުޓީއެމް ހަވާސާގައި "މޯލްޑިވްސް މީޑިއާ މީޓް" ނޫސްވެރިންގެ ބައްދަލުވުމުގައި އެމްއެމްޕީއާރުސީއިން ވަނީ އިނގިރޭސިވިލާތުގެ ފަތުރުވެރިން ޗުއްޓީ ހޭދަކުރުމަށް އެންމެ ބޭނުންވާ މަންޒިލެއްގެ ގޮތުގައި ރާއްޖެ ހެދުމަށް ކުރަމުން ގެންދާ މަސައްކަތްތަކާއި، "ވޯލްޑްސް ބިގޭސްޓް ގިވްއަވޭ" ގްލޯބަލް ކެމްޕެއިން އިފްތިތާހުކުރުމާ ގުޅޭ އިތުރު މައުލޫމާތު ހިއްސާކޮށްފައެވެ.

މި ނޫސްވެރިންގެ ބައްދަލުވުން ލީޑް ކުރެއްވީ އެމްއެމްޕީއާރުސީގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝިއުރީ އެވެ. އަދި ޓޫރިޒަމް މިނިސްޓަރު އިބްރާހިމް ފައިސަލް އާއި އިނގިރޭސިވިލާތާއި ނޯތް އަޔަލޭންޑް އަށް ކަނޑައަޅުއްވާފައިވާ ދިވެހިރާއްޖޭގެ ހައިކޮމިޝަނަރު ޑރ އިރުތިޝާމް އާދަމް އާއި އެމްއެމްޕީއާރުސީގެ ޗެއާޕާސަން އަބްދުﷲ ގިޔާސް ރިޔާޒްއާއި ދިވެހިރާއްޖޭގެ ފަތުރުވެރިކަމުގެ ބާނީ އަދި މޯލްޑިވްސް އެސޯސިއޭޝަން އޮފް ޓުއަރިޒަމް އިންޑަސްޓްރީ (މަޓީ)ގެ ވައިސް ޗެއަރމަން ޙުސައިން ޢަފީފް ވެސް މި ބައްދަލުވުމުގައި ޕެނަލިސްޓުންގެ ގޮތުގައި ބައިވެރިވެވަޑައިގެންނެވިއެވެ. މޯލްޑިވްސް މީޑިއާ މީޓުގައި ބައިވެރިވި ޕެނަލިސްޓުން ހާޒިރުވި މީޑިއާތަކުން ކުރި ސުވާލުތަކަށް ޖަވާބު ދެއްވުމުގެ އިތުރުން އެފަރާތްތަކުގެ ވިސްނުން، ބައްދަލުވުމުގެ ބައިވެރިންނާ ހިއްސާކުރެއްވިއެވެ.