ޒިއޯން ފިހާރަ ފަޅައިލި މީހާ ހައްޔަރުކުރީ ފޯނުތަކަކާއެކު، ލައްކައަކަށްވުރެ އަގުހުރި މުދާ ގެންދިޔަ

މަޖީދީ މަގުގައި ހުން ޒިއޯން މޯބައިލް ފިހާރަ ފަޅައިލާ އެތަނުން ވަގަށް އެތައް މުދަލެއް ގެންދިޔަކަމަށް ތުހުމަތުވާ މީހާ ހައްޔަރުކުރީ އެ ފިހާރައިން ނެގި ފޯނުތަކަކާއެކު ކަމަށާއި، އޭނާ އެތަނުން ލައްކައަކަށްވުރެ ގިނަ ރުފިޔާގެ މުދާ ނެގިކަމަށް ފުލުހުން ބުނެފި އެވެ. 

ހޯމަދުވަހުގެ ފަތިހު ފިހާރައަށް ގެއްލުންދޭ މަންޒަރު ފެންނަ ވީޑިޔޯއެއް މީސްމީޑިޔާގައި ދައުރުވެފައިވެ އެވެ. އެ ވީޑިއޯއިން ފެންނަނީ މީހަކު ގޮސް އެ ފިހާރައިގެ ދޮރުގައި އެއްޗަކުން ޖަހައި ތަޅައިލުމަށްފަހު ދާ މަންޒަރެވެ.

އޭގެ ފަހުން ފިހާރަ ތެރެއަށް ވަދެ، ކައުންޓަރުގެ ވަތްގަނޑު ހަލާކުކޮށް ފައިސާ ހުރިތޯ ބަލަ އެވެ. ފައިސާ ނުފެނުމުން ދެން އޭނާ ނެގީ ކައުންޓަރު ތިރީގައި ހުރި ކޮޓަޅު ތަކެކެވެ. އެއަށްފަހު ރެކުތައް ކައިރިއަށް ގޮސް ކޮތަޅުތަކަށް ފޯނުފަދަ ތަކެތި އަޅާ މަންޒަރު ވެފެން އެވެ.

އޭނާ ފިހާރަތެރޭގައި އުޅެނިކޮށް މީހަކު ފިހާރައިގެ ދޮރު ކައިރީ މަޑުވެސް ކޮށްލަ އެވެ. ބަލަން ހުރުމަށްފަހު އެމީހާ އެތަނުން ދަނީ އެވެ. އެވަގުތަކީ ފަތިސް ވަގުތު ކަމުން، ސައިކަލުތަކާއި ކާރުތައް ދުއްވާ މަންޒަރުވެސް ސީސީޓިވީ ފުޓޭޖުން ފެނެ އެވެ.

ވީޑިއޯއިން ފެންނަ ގޮތުގައި އޭނާ ނުކުންނަނީ ގާތްގަނޑަކަށް ހައެއްކަ ކޮތަޅަށް ސާމާނު އަޅައިގެންނެވެ. ދޮރުން ނުކުމެގެން ހިނގައިގަންނަ ވަގުތު ކޮތަޅުތަކުން ފޯނުފަދަ ތަކެތި މަގުމައްޗަށް ވެރޭ މަންޒަރު ވެސް ފެނެ އެވެ. ވެއްޓުނު ސާމާނު އަލުން ކޮތަޅަށް ލައިގެން އޭނާ ދިޔައިރުވެސް މަގުމަތީގައި މީހުން އުޅެވެ.

 ތުހުމަތުގައި ހައްޔަރުކުރީ އަހްމަދު ނިޔާޒު، ފިނިރޯޅި، ހއ.މާރަންދޫ 20 ދުވަހަށް ބަންދުކުރަން ކުރިމިނަލް ކޯޓުން އަމުރުކޮށްފައިވެ އެވެ. އޭނާ ބަންދުކުރަން ކުރިމިނަލް ކޯޓުން ނެރުނު އަމުރުގައި ފުލުހުންނާ ހަވާލާދީ ފާހަގަކޮށްފައިވާ ގޮތުން އޭނާ ހައްޔަރުކުރިއިރު އޭނާގެ އަތުން އެ ފިހާރައިން ވަގަށް ނެގި ގިނަ އަދަދެއްގެ މޯބައިލް ފޯނު ފެނިފައިވެ އެވެ. 

ކޯޓު އަމުރުގައި ފާހަގަކޮށްފައިވާ ގޮތުގައި އޭނާ އެތަނުން ނެގި މުދަލުގެ އަގު އެއްލައްކައަށްވުރެ މަތިވާނެ އެވެ. އަދި ވަގަށް ނެގި މުދަލުގެ އަގު ލައްކައަކަށްވުރެ މަތިވާތީ އޭނާއަށް ކުރެވޭ ތުހުމަތަކީ ޖިނާއީ ބޮޑު ކުށެއްގެ ތުހުމަތުކަމަށް ކޯޓު އަމުރުގައި ބުނެފައިވެ އެވެ. 

މި މައްސަލާގައި ހައްޔަރުކޮށްފައިވާ މީހާއަކީ މިބާވަތުގެ ކުށްތަކުގެ ރެކޯޑެއް އޮތް މީހެއްކަމަށް ކޯޓު އަމުރުގައި ބުނެފައިވެ އެވެ. އެ ތުހުމަތާ ގުޅިގެން އޭނާ 20 ދުވަހުގެ މުއްދަތަށް ބަންދުކުރަން ކުރިމިނަލް ކޯޓުންވަނީ އަމުރުކޮށްފަ އެވެ.