ގައުމީ ތަރައްގީގެ ޕްލޭންގެ މަސައްކަތުގައި ސިޔާސީ ޕާޓީތަކުން ބައިވެރިވާން ރައީސް އެދިވަޑައިގެންފި

މިއަދު ފެށި ގައުމީ ތަރައްގީގެ މާސްޓާ ޕްލޭން އެކުލަަވައިލުމުގެ މަސައްކަތުގައި ސިޔާސީ ޕާޓީތަކުންނާއި މަދަނީ ޖަމިއްޔާތަކުން ވެސް ބައިވެރިވުމަށް ރައީސް ޑރ. މުހައްމަދު މުއިއްޒު އިލްތިމާސްކުރައްވައިފި އެވެ. 

20 އަހަރު ދުވަހުގެ ގައުމީ ތަރައްގީގެ ޕްލޭނެއް އެކުލަވައިލައި،އެ ޕްލޭނަށް ގާނޫނީ ހިމާޔަތް ލިބޭނެ އިންތިޒާމު ހަމަޖެއްސެވުމަކީ ރައީސުލްޖުމްހޫރިއްޔާ ރިޔާސީ އިންތިހާބުގައި ވެވަޑައިގެންފައިވާ ވައުދުފުޅެކެވެ.

މިއަދު ހެނދުނު ބޭއްވި ރަސްމިއްޔާތެއްގައި ކުރިއަށް އޮތް 20 އަހަރު ދުވަހުގެ ގައުމީ ތަރައްގީގެ މާސްޓާ ޕްލޭނަށް ހިޔާލު ހޯދުމުގެ މަސައްކަަތް އިފުތިތާހުކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ. މި ރަސްމިއްޔާތުގައި ވާހަކަ ދައްކަވަމުން ރައީސް ވިދާޅުވީ މިއީ އެއްގޮތަކަށް ވެސް ސިޔާސީ މަސައްކަތެއް ނޫން ކަމަށެވެ.

ރައީސް ވިދާޅުވީ 20 އަހަރު ތެރޭގައި 2040 ވަނަ އަހަރު އަންނާނެ ކަމަށާއި، އެ އަހަރު އަންނައިރު ރާއްޖެއަކީ އެއްކޮށް ތަރައްގީވެފައިވާ ގައުމެއްގެ ގޮތުގައި ދެކެން ބޭނުންވާ ކަމަށެވެ. އެހެންކަމުން މި މަސައްކަތް ސިޔާސީ ނުކޮށް، ހުރިހާ ރައްޔިތުން ޝާމިލްވެގެން ކުރިއަށް ގެންދިއުމަށް ރައީސް ގޮވައިލެއްވި އެވެ.

"އަޅުގަނޑު އެދެން ހުރިހާ ސިޔާސީ ޕާޓީތަކުން ވެސް [ބައިވެރިވާން]، ސިޔާސީ ވިސްނުން ދޫކޮށްލާފައި [މަސައްކަތް ކުރަންވީ]، މީ ގައުމީ މަސައްކަތެއް، ގައުމީ ތަރައްގީގެ ވާހަކަ މި ދައްކަނީ، 20 އަހަރު ދުވަހަށް، 20 އަހަރު ދުވަހަކީ ޖީލެއް، އެހެންވީމަ ޖީލެއްގެ ތަސައްވުރު އަޅުގަނޑުމެން މިއުޅެނީ ކަނޑައަޅަން. މީ ސިޔާސީ ކަމެއް ނޫން،" ރައީސް ތަކުރާރުކޮށް ވިދާޅުވި އެވެ.

ރައީސް އިތުރަށް ވިދާޅުވީ މި މަސައްކަތުގެ ތެރޭގައި ގައުމީ ތަރައްގީއާ ބެހޭ ގާނޫނެއް އެކުލަވާލުމުގެ މަސައްކަތް ވެސް ކުރިއަށް ގެންދާނެ ކަމަށެވެ. އަދި އެ ގާނޫނަކީ ގާނޫނުއަސާސީ ދަންނަ ގާނޫނަކަށް ހެދުމަށް، ގާނޫނުއަސާސީއަށް ވެސް އިސްލާހު ގެންނަން މަޖިލީހަށް ހުށަހަޅުއްވާނެ ކަމަށެވެ.

"[ގާނޫނުގެ] ބޭނުމަކީ އަޅުގަނޑުމެންގެ ރައްޔިތުން، އެންމެން އެކުވެގެން ނިންމާ ގޮތަށް ގައުމުގެ ކަންކަން ދާނެކަމުގެ ޔަގީންކުރުން. ސިޔާސީ ގޮތުން ބޭނުންވާ ބަދަލުތައް ގެނެވޭނެ މިންގަނޑުވެސް، އިންވެސް އޭގަ ބަޔާންކުރެވިފަ އޮންނަ މައިގަނޑު ޑައިރެކްޝަން ރައްޔިތުން ބޭނުންވާ ގޮތަށް ދާނެ ކަމުގެ ޔަގީންވާ ގޮތަށް ކަންކަން ބައްޓަން ކުރަން،" ރައީސް ވިދާޅުވި އެވެ.

މިފަދަ ޕްލޭނެއް ނެތި އޭރަކު އޮންނަ ސަރުކާރަކުން ސިޔާސީ ގޮތުން ގެންނަ ތަރައްގީއަކީ ރައްޔިތުން ބޭނުންވާ ގޮތް ނޫން ކަމަށް ރައީސް ވިދާޅުވި އެވެ. އެހެންކަމުން، ތަރައްގީގެ ޕްލޭން ހަދާނީ ދުނިޔެއަށް އަންނަ ބަދަލުތަކަށް ވެސް ބަލައިގެން ކަމަށާއި، ތަރައްގީ ގެނެވޭނީ ދުނިޔޭގެ ތަރައްގީއާ ފައިހަމަކޮށްގެން ކަމަށް ރައީސް ވިދާޅުވި އެވެ. މި ޕްލޭން ވެގެންދާނީ އާޓިފިޝަލް އިންޓެލިޖެންސް އެންހޭންސް ކުރާ ޕްލޭނަކަށް ކަމަށް ވެސް ވިދާޅުވި އެވެ.

މި ޕްލޭން އެކުލަވާލާނީ ބޭރުގެ އެކްސްޕާޓުންގެ ވެސް ލަފަޔާ މަޝްވަރާއާއެކު އެވެ.