ތަރައްގީގެ މާސްޓާ ޕްލޭނުގެ މަސައްކަތް ފެށުން | އެންމެންގެ ހިޔާލު ހޯދާނެ، ގާނޫނީ ހިމާޔަތް ދޭނެ
މިއަދު ހެނދުނު ބޭއްވި ރަސްމިއްޔާތެއްގައި ކުރިއަށް އޮތް 20 އަހަރު ދުވަހުގެ ގައުމީ ތަރައްގީގެ މާސްޓާ ޕްލޭނަށް ހިޔާލު ހޯދުމުގެ މަސައްކަަތް އިފުތިތާހުކޮށްދެއްވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒެވެ.
ގައުމީ ތަރައްގީގެ މާސްޓާ ޕްލޭން އެކުލަަވައިލުމުގެ މަސައްކަތް މިއަދު ފަށައި، އާންމުންގެ ހިޔާލު ހޯދާނެކަމާއި އެ ޕްލޭނަށް ދުސްތޫރީ އަދި ގާނޫނީ ހިމާޔަތް ދޭނެކަން ސަރުކާރުން އިއުލާނުކޮށްފި އެވެ.
މިއަދު ހެނދުނު ބޭއްވި ރަސްމިއްޔާތެއްގައި ކުރިއަށް އޮތް 20 އަހަރު ދުވަހުގެ ގައުމީ ތަރައްގީގެ މާސްޓާ ޕްލޭނަށް ހިޔާލު ހޯދުމުގެ މަސައްކަަތް އިފުތިތާހުކޮށްދެއްވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒެވެ. މިފަދަ މާސްޓާ ޕްލޭނެއް އެކުލަވައިލާ އެ ޕްލޭނަށް ގާނޫނީ ހިމާޔަތާއި ބާރުވެރިކަން ހޯދައިދިނުމަކީ 2023 ވަނަ އަހަރުގެ ރިޔާސީ އިންތިހާބުގައި އެމަނިކުފާނު ވެވަޑައިގެންފައިވާ ވައުދުފުޅެކެވެ.
ސެޕްޓެންބަރު މަހުގައި ރައީސްވަނީ ގައުމީ ތަރައްގީގެ މާސްޓާ ޕްލޭނުގެ މަސައްކަތް ކުރިއަށް އޮތް އެއް އަހަރު ދުވަހުގެ ތެރޭގައި ނިންމުމަށް ވަޒީރުންގެ މަޖިލީހުގެ ލަފައާއެކު ނިންމަވާފަ އެވެ. އަދި އެ މަސައްކަތް ކުރައްވަން ރައީސް ނިންމަވާފައިވަނީ މުޅި މުޖުތަމައުގެ މަޝްވަރާ ހޯއްދަވައިގެންނެވެ.
މާސްޓާ ޕްލޭނާ ގުޅޭ ގޮތުން މަޝްވަރާތައް ފެށުމަށް މިއަދު ބޭއްވި ރަސްމިއްޔާތުގައި ޕްލޭނިން މިނިސްޓަރު ޑރ.އަލީ ހައިދަރު ވިދާޅުވެފައިވަނީ ރައީސްގެ މަޝްވަރާގެ މަތިން ކަމާ ބެހޭ ފަރާތްތަކާއި ރައްޔިތުންގެ ހިޔާލާއި މަޝްވަރާ ވީހާވެސް ފުޅާ ދާއިރާއެއްގައި ހޯދުމަށް ނިންމަންވާފައިވާ ކަމަށެވެ.
އަދި އެ ޕްލޭނަށް ގާނޫނީ ބާރުވެރިކަން ހޯދައިދިނުމުގެ ގޮތުން ގައުމީ ތަރައްގީގެ ބިލެއް އެކުލަވައިލާ މަޖިލީހަށް ހުށަހަޅުއްވާނެ ކަމަށާއި، އަދި އެ ޕްލޭނު ތަންފީޒުކުރުމަށް އިތުރު ގާނޫނީ ބާރުވެރިކަން ހޯދައިދިނުމުގެ ގޮތުން ގާނޫނުއަސާސީއަށް މާއްދާއެއް އިތުރުކުރަން ނިންމާފައިވާ ކަމށްވެސް މިނިސްޓަރު ވިދާޅުވި އެވެ.
އަދި މި ޕްލޭންވާނީ ދެމެހެއްޓެނެވި ގޮތެއްގައި ރާައްޖޭގެ ތަރައްގީ ބައްޓަންކޮށް، މުސްތަގުބަލުގައި ގައުމު ދަތުރުކުރާނެ ގޮތުގެ މިސްރާބު ކަނޑައެޅުމުގައި މުހިއްމު މަގުޗާޓަކަށް ކަމުގައިވެސް ޑރ.ހައިދަރު ވިދާޅުވި އެވެ. އޭނާ ވިދާޅުވި ގޮތުގައި މި ޕްލޭން އެކުލަވައިލާނީ ރާއްޖޭގެ އެކި ކަންކޮޅުތަކުގައި ދިރިއުޅުމުގެ ހާލަތު އޮތް ގޮތް ވަޒަންކޮށް ކަންކަން އިސްލާހުކުރުމަށް ކުރަންޖެހޭ މަސައްކަތްތައް އިލްމީ ނަޒަރަކުން ދެނެގަނެވިގެން އެކުލަވައިލެވޭ ޕްލޭނަކަށެވެ.
"މިޕްލޭން ވެގެންދާނީ ގައުމުގެ ކުރިމަގު އުޖާލާކޮށް، އަންނަން އޮތް ޖީލުތަކަށް ތަނަވަސް އުފާވެރި ދިރިއުޅުމެއް ފޯރުކޮށްދިނުމަށް އެޅޭ މުހިއްމު ފިޔަވަޅަކަށް،" ޑރ.ހައިދަރު ވިދާޅުވި އެވެ.
އިތުރަށް މިނިސްޓަރު ވިދާޅުވީ މޫސުމީ ބަދަލުތަކުން ދިމާވާ ގޮންޖެހުންތަކުން އަރައިގަތުމާއި، ގާނޫނު ތަންފީޒުކުރުން ހަރުދަނާކުރުމާއި އައު މައްސަލަތަކާއި އީޖާދުތަކުން އެންމެ ބޮޑު ފައިދާއެއް ހާސިލުކުރެވޭނެ ގޮތްތައް ފަދަ ކަންކަން މި ޕްލޭނުގައި ހިމެނޭނެ ކަމަށެވެ.
މިނިސްޓަރު ވިދާޅުވި ގޮތުގައި މި ޕްލޭން އެކުލަވައިލުމުގެ މަސައްކަތްކުރާނީ މުޖުތަމައުގެ ހުރިހާ ގިންތިއެއްގެ އެންމެންގެ މަޝްވަރާ ހޯދައިގެންނެވެ. އެގޮތުން އެކި ވަސީލަތްތަކުގެ ޒަރީއާއިން ހިޔާލާއި މަޝްވަރާ ހުށަހެޅުމުގެ ފުރުސަތު ހުޅުވައިލައްވާނެ ކަމުގައިވެސް ހައިދަރު ވިދާޅުވި އެވެ.
ކޮމެންޓް
Republic of Maldives