ހަ ގައުމުން އެއް ލައްކަ | ޖުމްލަ ޓޫރިސްޓުން 1.7 މިލިއަނާ ގާތަށް

ރާއްޖެއަށް ޓޫރިސްޓުން އަންނަ ހަ ގައުމަކުން އައި ޓޫރިސްޓުންގެ އަދަދު އެއް ލައްކަ ފަހަނަ އަޅައި ޖުމްލަ ޓޫރިސްޓުންގެ ނަމްބަރު 1.7 މިލިއަނާ ގާތަށް ޖެހިލައިފި އެވެ. 

ޓޫރިޒަމް މިނިސްޓްރީގެ ތަފާސް ހިސާބުތައް ދައްކާ ގޮތުން އިއްޔެ ނިޔަލަށް 1.6 މިލިއަން ޓޫރިސްޓުން އައިސްފައިވެ އެވެ. މީގެ އިތުރުން ހަ ގައުމަކުން އައި ޓޫރިސްޓުންގެ އަދަދު ވަނީ އެއް ލައްކަ ފަހަނަ އަޅާފަ އެވެ. އެންމެ ގިނައިން ޓޫރިސްޓުން އައިސްފައިވަނީ ޗައިނާއިންނެވެ. 

ޓޫރިޒަމް ހިސާބުތައް ދައްކާ ގޮތުގައި އެންމެ ގިނައިން ޓޫރިސްޓުން އައިސްފައިވާ ޗައިނާއިން 241,199 ޓޫރިސްޓުން އައިސްފައިވެ އެވެ. ދެވަނަ އަށް އެންމެ ގިނައިން ޓޫރިސްޓުން އައި ރަޝިއާ އިން އައިސްފައިވަނީ 188,638 ޓޫރިސްޓުންނެވެ. އަދި ތިންވަަނަ އަށް އެންމެ ގިނައިން ޓޫރިސްޓުން އައި އިނގިރޭސިވިލާތުން 145,145 ޓޫރިސްޓުން އައިސްފައިވެ އެވެ. 

ހިސާބުތައް ދައްކާ ގޮތުގައި މި އަހަރު ރާއްޖެއަށް ޒިޔާރަތް ކުރި ޓޫރިސްޓުން އެވްރެޖުކޮށް 7.7 ދުވަހު ރާއްޖޭގައި މަޑުކުރެ އެވެ. އަދި މިހާރު އެވްރެޖުކޮށް ދުވާލެއްގެ މައްޗަށް ރާއްޖެ އަށް 5,464 ޓޫރިސްޓުން އާދެ އެވެ.