ޝާހިދު ވިދާޅުވަނީ ގައުމީ ހިދުމަތުގެ ޕްރޮގުރާމަކީ ޑިމޮކްރަސީއާ ބީރައްޓެހިކަމެއް ކަމުގައި

އޯލެވެލް ނިންމުމަށްފަހު އިތުރަށް ތައުލީމު ހާސިލުކުރުމުގެ ފުރުސަތު އަދި ވަޒީފާއެއް ނުލިބޭ ކުދިންނަށް އަސްކަރިއްޔާގަައި ނުވަތަަ ފުލުހުގައި ހިދުމަތްކުރުން ލާޒިމުކުރުމަށް ގައުމީ ހިދުމަތުގެ ޕްރޮގުރާމެއް ތައާރަފުކުރެއްވުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ނިންމެވި ނިންމެވުމަށް އިދިކޮޅު އެމްޑީޕީގެ ރައީސް އަބްދުﷲ ޝާހިދު ފާޑުވިދާޅުވެއްޖެ އެވެ. 

ނަސްރުގެ ދުވަހުގެ ޖަލްސާގައި ވާހަކަދައްކަވަމުން ރައީސްވަނީ އޯލެވެލް ނިންމާ ކުދިންގެ ތެރެއިން 2،000 އެއްހައި ކުދިން ވަޒީފާއެއް ނުވަތަ އިތުރަށް ތައުލީމު ހާސިލުކުރުމުގެ ފުރުސަތެއް ނުލިބި ބޭކާރުވަމުންދާ ކަމަށެވެ. އަދި އެއީ އެ ކުދިންނަށާއި އެކުދިންގެ އާއިލާތަކަށާއި މުޅި ގައުމަށްވެސް ލިބޭ ބޮޑު ގެއްލުމެއް ކަމުގައި އެމަނިކުފާނު ފާހަގަކުރެއްވި އެވެ. 

އެއާއެކު އެމަނިކުފާނުވަނީ އެ މައްސަލަ ހައްލުކުރެއްވުމުގެ ގޮތުން އަންނަ އަހަރުން ފެށިގެން ގައުމީ ހިދުމަތުގެ ޕްރޮގުރާމެއް ފައްޓަވަން ނިންމެވިކަން އިއުލާނު ކުރައްވާފަ އެވެ. އަހަރެއްގެ މައްވަށް 1،000 ކުދިން ސިފައިންގެއަށް އަދި 250 ކުދިން ފުލުހަށް މި ޕްރޮގުރާމުގެ ދަށުން ނަގައި އެ ކުދިންނަށް ދިރިއުޅުމުގެ ހުނަރުތައް އެ މުއްސަސާތަކުގެ ތަމްރީނުތަކުގެ ތެރެއިން ފޯރުކޮށްދޭނެ އެވެ. 

ޝާހިދު މި މައްސަލައާ ގުޅިގެން އެކްސްގައި ކުރެއްވި ޕޯސްޓެއްގައި ވިދާޅުވީ އޯލެވެލްއިން އެކަށީގެންވާ ނަތީޖާ ނުލިބޭ ކުދިންނަށް އެ ކުދިން ޝައުގުވެރިވާ ދާއިރާތަކުން އިތުރު ތަމްރީނާއި ހުނަރުތައް ލިބޭނެ މަަގުތައް ފަހިކޮށް، އެ ކުދިންނަށް ގައުމުގެ ތަރައްގީގައި ބައިވެރިވުމުގެ ޖާގަ ހޯދައިދިނުމަކީ އެ ކުދިންގެ ހުވަފެންތައް ހަގީގަތަކަށް ހެދުމަށް އެންމެ ރަނގަޅު މަގު ކަމަށެވެ. 

އިތުރަށް ޝާހިދު ވިދާޅުވީ އަސްކަރީ އަދި ފުލުހުންގެ ހިދުމަތަށް ވަނުމަށް ބޭނުންވެފައި އެތައްހާސް ޒުވާނުން އެބަތިބި ކަމަށެވެ. އެހެންކަމުން މަޖުބޫރުން ސަލާމަތީ ބާރުތަކަށް މީހުން ވައްދަންޖެހޭ ސަބަބެއް ނެތްކަމަށް ވިދާޅުވުމާއެކު ޝާހިދު ފާހަގަކުރެއްވި ގޮތުގައި އުފެއްދުންތެރި ޖީލެއް ބިނާކުރަން އެންމެ ރަނގަޅު މަގަކީ ޒުވާނުންނަށް ހުނަރުތައް ތަރައްގީކުރެވޭނެ މަގުތައް ފަހިކޮށް ވަސީލަތާއި ފުރުސަތުތައް ހޯދައިދިނުން ކަމަށެވެ. 

ޝާހިދު އިތުރަށް ވިދާޅުވީ ވަކި ދާއިރާައެއްގައި ހިދުމަތްކުރަން މީހުންނަށް މަޖުބޫރުކުރުމަކީ ޑިމޮކްރަސީއާ ބީރައްޓެހި ކަމެއް ކަމަށެވެ. 

ނަމަވެސް ސިންގަޕޫރާއި ދެކުނު ކޮރެއާ ފަދަ ތަރައްގީވެފައިވާ ޑިމޮކްރެޓިކް ގައުމުތަކުގައިވެސް ގައުމީ ހިދުމަތުގެ ޕްރޮގުރާމުތައް ހިންގައި ވަކި ޝަރުތެއް ފުރިހަމަވާ އެންމެން އަސްކަރިއްޔާގައި ވަކި މުއްދަތަކަށް ހިދުމަތްކުރުން ލާޒިމުކުރެ އެވެ.