ޖެޓު ހޭންޑްލިންގެ ހުރިހާ ފައިދާ ދިވެހި ކުންފުނިތަކަށް ލިބޭ ގޮތަށް އުސޫލު ބަދަލުކުރަނީ
ވައިގެ ދަތުރުފަތުރާ ގުޅޭ ބައެއް ހިދުމަތްތައް ދިނުމަށް ދިވެހި ކުންފުނިތައް ހެދުމަށްފަހު، އެ ކުންފުނީގެ ނިވަލުގައި ތިބެގެން ބޭރުގެ ފަރާތްތަކުން މަންފާ ހޯދަމުންދާ މައްސަލަ ހައްލުކުރަން އުސޫލުތަކަށް ބަދަލު ގެންނަންވަނީ ނިންމާފަ އެވެ.
ބޭރުން އަންނަ ޕްރައިވެޓް ޖެޓުތައް ހޭންޑްލްކުރުމާއި ބޭރުގެ އެއާލައިންތަކަށް ދޭ ބައެއް ހިދުމަތްތަކުން ލިބޭ ފައިދާ ދިވެހި ކުންފުނިތަކަށް ލިބޭކަން ކަށަވަރުކުރުމަށް އުސޫލުތަކަށް ބޮޑެތި ބަދަލުތަކެއް ގެންނަން ނިންމަވާފައިވާކަން ޓްރާންސްޕޯޓު އެންޑް ސިވިލް އޭވިއޭޝަން މިނިސްޓަރު މުހައްމަދު އަމީން އިއުލާނު ކުރައްވައިފި އެވެ.
މިއަދު ރައީސް އޮފީހުގައި އޮތް ނޫސްވެރިންގެ ބައްދަލުވުމެއްގައި ވާހަކަދައްކަވަމުން އަމީނު ވިދާޅުވީ މިހާރު ޖެޓް ހޭންޑްލިން ހިދުމަތްތައް ދިނުމަށް ދިވެހި ކުންފުނިތައް ރަޖިސްޓްރީކޮށްފައި ހުރި ނަމަވެސް އެ ހިދުމަތުން ލިބޭ އާމްދަނީގެ ބޮޑު ބައެއް ދަނީ ރާއްޖެއިން ބޭރަށް ކަމަށެވެ.
އަމީނު އިތުރަށް ވިދާޅުވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު އަދި ދިވެހި ސަރުކާރުން ގަބޫލުކުރާ ގޮތުގައި ދިވެހިރާއްޖޭގައި ހިނގާ އިގުތިސާދީ ހަރަކާތަކުން އުފަންކުރާ މަންފާއަކީ އޭގެ ފުރިހަމަ ގޮތުގައި ދިވެހި ކުންފުނިތަކާއި ވިޔަފާރިތަކަށް ލިބެންޖެހޭ މަންފާއެއް ކަމަށެވެ.
"ދިވެހިރާއްޖޭގައި ދިވެހިފަސްގަނޑުން ލިބޭ މަންފާއަކީ ދިވެހި ރައްޔިތުންނަށް ނުވަތަ ދިވެހި ކުންފުނިތަކަށް އޭގެ ފުރިހަމަ ގޮތުގައި ލިބެންވާނެ މަންފާއެއްގެ ގޮތުގައި އަޅުގަނޑުމެންގެ ސަރުކާރުން ގަބޫލުކުރަނީ،" އަމީނު ވިދާޅުވި އެވެ.
އިތުރަށް އަމީނު ވިދާޅުވީ ސަރުކާރުން ބޭނުންވަނީ އެ ހިދުމަތްތައް ދީގެން އެ ލިބޭ މަންފާ ހޯދާ ކުންފުނިތަކަކީ ސައްތައިން ސައްތަ ދިވެހި ކުންފުނިތަކަށްވުމަށް ކަމަށެވެ. އަދި އެ އަމާޒު ހާސިލުކުރުމަށް އެ ހިދުމަތާ ގުޅޭ އުސޫލުތަކަށާއި ގަވާއިދުތަކަށް އިސްލާހުތަކެއް ގެނައުމަށް ނިންމާފައިވާކަމަށާއި، އައު އަހަރު ފެށޭއިރަށް އެ ބަދަލުތައް ގެންނަވާނެ ކަމުގެ ޔަގީންކަން ދެއްވާކަމަށް އަމީނު ވިދާޅުވި އެވެ.
އަދި ދިވެއްސެއްގެ ނަމުގައި ކުންފުންޏެއް ރަޖިސްޓަރީކުރުމަށްފަހު އެ ކުންފުނީގެ ފަހަތުގައި ފޮރުވިގެން ތިބޭ ބޭރުގެ ވިޔަފާރިތަކަށް މުޅި ވިޔަފާރީގެ މަންފާ ލިބޭނެ ގޮތަށް ކަންކަން އިންތިޒާމުނުކުރުމަށް، އެ ވިޔަފާރީގައި ހަރަކާތްތެރިވާ ފަރާތްތަކަށް އަމީނުވަނީ އިލްތިމާސް ކުރައްވާފަ އެވެ.
އިތުރަށް އަމީނު ވިދާޅުވީ ދިވެހި ކުންފުންޏެއްގެ ނިވަލުގައި ތިބެގެން މިފަދަ ހިދުމަތްތަކުގެ ތެރެއިން ބޭރު ފަރާތްތަކުން މަންފާ ހޯދަމުންދާކަން ދެނެގަތުމަށްޓަކައި އެ ހިދުމަތްދޭ ކުންފުނިތައް އޮޑިޓުކޮށް، އެ ހިދުމަތް ދޭ ކުންފުނިތައް މޮނިޓާކުރުމުގެ މަސައްކަތްވެސް ސަރުކާރުން ކުރާނެ ކަމަށެވެ.
""ދިވެހި ކުންފުންޏެއް ހަދާފައި އިންވޯލްވްމެންޓެއް ނެތި ބޭރުގެ ކުންފުންޏަކަށް ހުރިހާ މަންފާއެއް ލިބޭ ގޮތަށް އިންތިޒާމުކޮށްގެން ހިންގާ ވިޔަފާރިއަށް އަޅުގަނޑުމެން ބަދަލުތަކެއް ގެންނާނަން.. ގެނައިމާ އަޅުގަނޑުމެން ދިވެހިފަސްގަނޑުން ލިބޭ މި މަންފާ ދިވެހިންނަށް ދިވެހި ކުންފުނިތަކަށް ލިބޭނީ،" އަމީނު ވިދާޅުވި އެވެ.
ކޮމެންޓް
Republic of Maldives