ބީއެމްއެލް މާސްޓާ ބިޒްނަސް ޕްރީޕެއިޑް ކާޑު | ކުދި ވިޔަފާރިތަކަށް ބޮޑު ފަސޭހައެއް

ކުދި ވިޔަފާރިތަކަށް އަވަހަށް ފައިސާގެ ކަންކަން ކުރުން ފަސޭހަކުރުމަށް ބީއެމްއެލްއިން ވިޔަފާރިތަކަށް ހާއްސަ މާސްޓާ ބިޒްނަސް ޕްރީޕެއިޑް ކާޑެއް ތައާރަފުކޮށްފި އެވެ. 

ހޮޓެލްސް ޖެންގައި ކުރިއަށްދާ ބިޒްނަސް އެކްސްޕޯގައި މިއަދު ހެނދުނު ބީއެމްއެލްއިން ތައާރަފުކޮށްފައިވަނީ ވިޔަފާރިތަކަށް ހާއްސަ ޑޮލަރު އަދި ރުފިޔާ ޕްރީޕެއިޑު ކާޑުތަކެވެ. 

ބީއެމްއެލްއިން ބުނި ގޮތުގައި މި ކާޑު ތައާރަފުކުރީ ޕެޓީ ކޭޝް މެނޭޖުކުރުން ފަދަ ކަންކަން ކުރުމަށް ވިޔަފާރިތަކަށް މިފަދަ ކާޑެއްގެ ބޭނުންތެރިކަން ބޮޑުވެފައިވާކަން ފާހަގަކުރެވުމާ ގުޅިގެންނެވެ. 

އެ ބޭންކުގެ ސީއީއޯ އަދި މެނޭޖިން ޑިރެކްޓާ މުހައްމަދު ޝަރީފު ވިދާޅުވެފައިވަނީ އަލަށް ބޭންކުން ތައާރަފުކުރި ބިޒްނަސް ޕްރީޕެއިޑް ކާޑަކީ ކުދި ވިޔަފާރިތަކުގެ ބޭނުންތައް ފުއްދުމަށް ވަރަށް ބޮޑު އެހީއަކަށްވާނެ ކަމުގައި ދެކެވަޑައިގަންނަވާ ކަމަށެވެ. 

މިކާޑުތަކުގެ ތެރެއިން ދިވެހި ރުފިޔާ ކާޑަކީ ރާއްޖޭގައި އެކަނި ބޭނުންކުރެވޭ ކާޑެކެވެ. ރާއްޖޭގެ އީކޮމާސް ޕްލެޓްފޯމުތަކާއި އޭޓީއެމްތައް އަދި ޕީއޯއެސް ކާޑު މެޝިންތައް މެދުވެރުކޮށް މި ކާޑުން މުއާމަލާތްކުރެވޭނެ ކަމުގައި ބޭންކުން ބުނެ އެވެ. ދުވާލަކު ދެލައްކަ ރުފިޔާގެ މުއާމަލާތް ކުރެވޭ މިކާޑަށް އެއްފަހަރާ އެންމެ ގިނައިން ޖަމާކުރެވޭނީ 500،000 ރުފިޔާ ކަމަށްވެސް ބޭންކުން ބުނެފައިވެ އެވެ. 

ނަމަވެސް ޑޮލަރު ކާޑަކީ ރާއްޖެއާއި ރާއްޖެއިން ބޭރުގައިވެސް ބޭނުންކުރެވޭނެ ކާޑެކެވެ. މި ކާޑަކީ ދުވާލެއްގެ މައްޗަށް 50،000 އެމެރިކާ ޑޮލަރުގެ މުއާމަލާތްކުރެވޭނެ ކާޑެކެވެ. އަދި އެއްފަހަރާ އެ ކާޑަށް 100،000 ޑޮލަރާ ހަމައަށް ފައިސާ ޖަމާކުރެވޭނެ އެވެ. 

މި ކާޑަކީ މާސްޓަކާޑުގެ "އީޒީ ސޭވިންސް" ޕްރޮގުރާމުގައި ހިމަނާފައިވާ ކާޑަކަށްވާތީ މި ކާޑު މެދުވެރިކޮށް ބައެއް ކަހަލަ ސޮފްޓުވެއާތަކަށް އަގު ދެއްކުމުން ޑިސްކައުންޓުތަކެއް ލިބޭނެ ކަމަށް ބީއެމްއެލްއިން ބުނެ އެވެ. އޭގެ އިތުރަށް މާސްޓަކާޑުގެ ޕްރައިސްލެސް ޕްރޮގުރާމުގައިވެސް މިކާޑު ހިމެނެ އެވެ. ނަތީޖާއެއްގެ ގޮތުން ދަތުރުކުރާއިރު ޓިކެޓުތަކާއި ހޮޓެލް ބުކިންތައް މިކާޑު މެދުވެރިކޮށް ހެދުމުން ހާއްސަ އޮފާތައް ލިބޭނެ އެވެ.