ހިޔާވަހި ފިނޭންސިން | އިސްލާމީ ފައިނޭންސިންގެ ތެރެއިން ތިން ބާވަތެއްގެ ލޯނު، ބޮޑެތި ލުއިތަކެއް

މިއަދު ސަރުކާރުން ފެށި "ހިޔާވަހި ފައިނޭންސިން" ޕްރޮގުރާމުގެ ދަށުން ތިން ކެޓަގަރީއެއްގެ ލޯނު %5 އިންޓަރެސްޓު ރޭޓަށްވުރެ ކުޑަ ރޭޓެއްގައި ދޫކުރަން ފަށާއިރު، އެ ތިން ބާވަތުގެ ލޯނުތަކުގައިވެސް ބޮޑެތި ލުއިތަކެއް ހިމެނޭކަން ހައުސިން މިނިސްޓަރު ޑރ.އަލީ ހައިދަރު ހާމަކުރައްވައިފި އެވެ. 

މިއަދު "ހިޔާވަހި ފައިނޭންސިން" ސްކީމު އިފުތިތާހުކުރުމަށް ބޭއްވި ރަސްމިއްޔާތުގައި ވާހަކަދައްކަވަމުން މިނިސްޓަރު ވިދާޅުވީ މި ސްކީމުގެ ދަށުން ތިން ބާވަތެއްގެ ނުވަތަ ކެޓަގަރީއެއްގެ ލޯނު ދޫކުރުމަށް ހަމަޖެހިފައިވާ ކަމަށެވެ. 

މި ތިން ބާވަތުގެ ލޯން ސްކީމަކީވެސް ފަރުދުންނަށް އަލަތު ބޯހިޔާވަހިކަން ފަސޭހައިން ހޯދުމަށް މަގުފަހިކުރުމަށް ތައާރަފުކުރާ ސްކީމުތަކެއް ކަމުގައިވާތީ އެ ސްކީމު ހަމަޖެހޭނީ ސްކީމަށް ކުރިމަތިލާ ފަރާތުގެ ނަމުގައި އަމިއްލަ ނުވަތަ ދައުލަތުން ދޫކޮށްފައިވާ ބޯހިޔާވަހިކަމެއް އޮވެގެންނުވާނެ ކަމަށް މިނިސްޓަރު ވިދާޅުވި އެވެ. 

އެގޮތުން މި ސްކީމުގައި ހިމެނޭ ފުރަތަމަ ކެޓަގަރީއަކީ އަތޮޅު ތެރޭގެ ރަށްތަކުގައި ގެދޮރު އެޅުމަށް ދޫކުރާ އެއް މިލިއަން ރުފިޔާއާ ހަމައަށް ފައިސާ ލިބޭ ފައިނޭންސިން ސްކީމެކެވެ. "ހިޔާވަހި ރަތްވެހި ވަސީލަތު"ގެ ނަމުގައި ހިންގާ މި ސްކީމަށް އެއްވެސް އިކުއިޓީއެއް ދައްކާކަށް ނުޖެހޭނެ އެވެ. ނަމަވެސް ޝަރީއާ އުސޫލުތަކުގެ ތެރެއިން ނޮމިނަލް ކޮންޓްރިބިއުޝަނެއް ދައްކަންޖެހޭނެ އެވެ. މި ސްކީމު ދޫކުރާނީ ހައުސިން ފައިނޭންސް ޑިވެލޮޕްމެންޓު ކޯޕަރޭޝަން މެދުވެރިކޮށެވެ. 

ދެން މި ސްކީމުގައި ހިމެނެނީ މާލެ ސަރަހައްދުގައި ގެދޮރު އެޅުމަށް ހަ މިލިއަން ރުފިޔާއާ ހަމައަށް ފައިސާ ދޫކުރާ ސްކީމަކާއި، އާބަން ސެންޓަރުތަކުގައި ގެދޮރު އެޅުމަށް ތިން މިލިއަނާ ހަމައަށް ފައިސާ ދޫކުރާ ސްކީމެވެ. 

އާބަން ސަރަހައްދުތަކަށް ކަނޑައަޅާފައިވާ ހިޔާވަހި ޝަހަރު ވަސީލަތުގައި %5 ގެ އިކުއިޓީއެއް ބަހައްޓަންޖެހޭނެ އެވެ. މާލޭގައި ގެދޮރު އެޅުމަށް ދޫކުރާ ސްކީމުގެ ދަށުން 10 އިންސައްތައިގެ އިކުއިޓީއެއް ބަހައްޓަންޖެހޭނެ ކަމުގައި މިނިސްޓަރު ވިދާޅުވި އެވެ. މި ދެ ސްކީމު ހިންގާނީ ބީއެމްއެލް އަދި އެމްއައިބީ މެދުވެރިކޮށެވެ. 

މި ވަސީލަތްތަކަކީ އައު ގެއެއް ހެދުމަށް ނުވަތަ ހަދަން ފަށައި ނުނިމިހުރި ގެއެއްގެ މަސައްކަތް ނިންމުމަށް ނުވަތަ ހެދުމަށްފަހު ދުވަސްވެ ބާވެފައިހުރި ގެދޮރު އާބާތުރަފިލުވައި މަރާމާތުކުރުމަށް ދޫކުރާ ލޯނުތަކެއް ކަމުގައިވާތީ އެ ލޯނުތަކަށް ދޫކުރާ ފައިސާގެ ޖުމްލަ އަދަދުން އެ މަސައްކަތް ނިންމަންޖެހޭނެ ކަމަށް ޑރ.ހައިދަރު ވިދާޅުވި އެވެ. 

އިތުރަށް މާލޭގައި ގެދޮރު އަޅަން ދޫކުރާ ލޯނުތައް ދިނުމުގައި މާލެ ސަރަހައްދުގައި ހުރި ކުދި ބިންތައް އެއްކޮށްލައިގެން ގެދޮރު އެޅުމަށް ލޯނު ނަގަން ހުށަހަޅާ ފަރާތްތަކަށް އިސްކަންދެވޭނެ ކަމުގައި އޭނާ ވިދާޅުވި އެވެ. އެގޮތުން 600 އަކަފޫޓަށްވުރެ ކުދި ބިންތައް އެއްކޮށްގެން ހުށަހަޅާއިރު، އެއްކުރާ ކޮންމެ ބިމަކަށް އެއް މިލިއަން ރުފިޔާ އިތުރުކުރަމުން ގޮސް ދިހަ މިލިއަން ރުފިޔާއާ ހަމައަށް ފައިސާ ދޫކުރެވޭނެ އެވެ. 

"ހިޔާވަހި ފައިނޭންސިން" ސްކީމުގެ ޝަރުތުތަކާއި އުސޫލުތައް ސަރުކާރުގެ ގެެޒެޓުގައި ޝާއިއުކުރާނެ ކަމަށާއި، "ހިޔާވަހި ޕޯޓަލް" މެދުވެރިކޮށް ޝަރުތު ފުރިހަމަވާ ފަރާތްތަކަށް އެ ސްކީމަށް ކުރިމަތިލެވޭނެ ކަމުގައިވެސް މިނިސްޓަރު ވިދާޅުވި އެވެ. 

ފަސް އިންސައްތައަށްވުރެ ކުޑަ އިންޓަރެސްޓުގައި ގެދޮރު އެޅުމަށް ބޭނުންވާ ލޯނުތައް ދޫކުރުމަކީ ރައީސް ޑރ.މުހައްމަދު މުއިއްޒުގެ ރިޔާސީ ވައުދެކެވެ. އެ ވައުދާ އެއްގޮތަށް އެ ސްކީމު ހިންގުމަށް 2025 ވަނަ އަހަރުގެ ބަޖެޓުގައި އެއް ބިލިއަން ރުފިޔާ ހިމަނާފައިވާއިރު އަންނަ އަހަރުން ފެށިގެން ކޮންމެ އަހަރަކު މި ޕްރޮގުރާމު ހިންގުމަށް ބަޖެޓުގައި އެއް ބިލިއަން ރުފިޔާ ހިމަނުއްވާނެކަން ރައީސް އިއުލާނު ކުރައްވާފައިވެ އެވެ.