އާއިލާ ކުއްޖަކަށް ޖިންސީ ގޯނާ ކުރި މީހަކު 20 އަހަރަށް ޖަލަށްލާން ހުކުމް ކޮށްފި

އާއިލާގެ ކުޑަކުއްޖަކަށް ޖިންސީ ގޯނާ ކުރި މީހަކު 20 އަހަރަށް ޖަލަށްލުމަށް ކުރިމިނަލް ކޯޓުން ހުކުމް ކޮށްފިއެވެ.

މި މައްސަލައިގައި ޖަލަށްލާން ހުކުމް ކޮށްފައިވަނީ ހުސައިން އަލީފް ނަމަކަށް ކިޔާ މީހެކެވެ. މިއީ ކުޑަކުއްޖެއްގެ މަސަލަހަތު ހިމެނޭ މައްސަލައަކަށްވާތީ މި މީހާގެ ރަށް ހާމަކޮށްފައެއް ނުވެއެވެ.

ކުރިމިނަލް ކޯޓުން ކުރި މުޅި ހުކުމްވެސް ހާމަކޮށްފައިނުވަނީ ކުއްޖާގެ ވަނަވަރު ހާމަވެ، ނޭދެވޭ އަސަރެއް ކޮށްފާނެތީއެވެ.


ނަމަވެސް ހުކުމުގައި ވާގޮތުން މި މައްސަލަ ކުރިމިނަލް ކޯޓަށް ހުށަހަޅައިފައިވަނީ 2018 ވަނަ އަހަރުގެ ތެރެއިގައެވެ.

ކުރިމިނަލް ކޯޓުން އެ މައްސަލައިގައި އިއްޔެކުރި ހުކުމުގައި ބުނީ ހުސައިން އަލީފްގެ މައްޗަށް ދައުލަތުން ކުރި "މީހަކު އޭނާގެ އާއިލާގެ ކުޑަ ކުއްޖަކާއި އެކު ޖިންސީ އަމަލެއް ހިންގުމުގެ" ކުށުގެ ދައުވާ ޝަރީއަތުން ބެލި ބެލުމުންނާއި އޭނާގެ މައްޗަށް ކުށް ސާބިތުކުރުމަށް ދައުލަތުން ހުށަހެޅި ހެކިގަރީނާއަށް ބަލާއިރު، ޝައްކެއް ނެތް މިންވަރަށް މައްޗަށް ސާބިތުވާ ކަމަށެވެ.

އެހެން ކަމުން "ކުޑަކުދީންނަށް ޖިންސީ ގޯނާކުރާ މީހުންނާމެދު ހާއްސަ އުސޫލުތަކަކަށް އަމަލުކުރުމުގެ ގާނޫނު" ގެ 15 ވަނަ މާއްދާގެ (ހ) ގެ ދަށުން މީހަކު އޭނާގެ އާއިލާގެ ކުޑަ ކުއްޖަކާއި އެކު ޖިންސީ އަމަލެއް ހިންގުމުގެ ކުށުން، ހުސައިން އަލީފު ކުށްވެރިވެއްޖެ ކަމަށް ކަނޑައަޅައި، އެ ކުށުގެ އުގޫބާތެއްގެ ގޮތުގައި އޭނާ 20 އަހަރަށް ޖަލަށް ލުމަށް ހުކުމްކުރާ ކަމަށެވެ.