އުތުރު ކޮރެއާ ސިފައިން ރަޝިޔާ-ޔޫކުރެއިން ހަނގުރާމައިގަ ބައިވެރިވަނީ

އުތުރު-ކޮރެއާ ސިފައިން މި ހަފުތާ ތެރޭގައި ރަޝިޔާ ސިފައިންނާއެކު ޔޫކުރެއިނާ ދެކޮޅަށް ހަނގުރާމަ ފަށައިފާނެކަމަށް ބެލެވޭތީ ޔޫކުރެއިނުން ކަންބޮޑުވުން ފާޅުކޮށްފި އެވެ. މިއީ މި ހަނގުރާމާގައި ރަޝިޔާއާއި ޔޫކުރެއިން ނޫން ގައުމެއްގެ ސިފައިން ބަރިވެރިވާ ފުރަތަމަ ފަހަރެވެ. 

ޔޫކުރެއިނުގެ ޖާސޫސީ މަސްއޫލުވެރިން ފައިނޭންޝަލް ޓައިމްސް ނޫހަށް މައުލޫމާތު ދެއްވި ގޮތުގައި ރަޝިޔާގެ އިރުމަތިން ހުޅަނގު ކުރްސްކު ސަަރަހައްދަށް ސިއްރިއްޔާތުގައި މަދަނީ އުޅަނދުފަހަރުގައި 3،000 އަށްވުރެ ގިނަ އުތުރު ކޮރެއާ ސިފައިން ރަޝިޔާއިން ގެންގޮސްފައިވެ އެވެ. 

އަދި އެ އޮފިޝަލުން ވިދާޅުވި ގޮތުގައި މިސިފައިން މިހާރު ތިބީ ޔޫކުރެއިން ބޯޑަރާ 50 ކިލޯމީޓަރު ދުރުމިނުގައި ހުރި ބެރެކްސްތަކެއްގަ އެވެ. އެތަނުގައި އެމީހުން ތިބީ ރަޝިޔާގެ އަސްކަރީ ވެރިންގެ ކޮމާންޑެއްގެ އިންތިޒާރުގަ އެވެ. 

އަންގާރަދުވަހު ޔޫކުރެއިނުގެ ރައީސް ވޮލޮޑިމީރް ޒެލެންސްކީ ވިދާޅުވެފައިވަނީ އުތުރު ކޮރެއާއިން ހަނގުރާމައަށް ސިފައިން ފޮނުވުމާ ގުޅޭ މައުލޫމާތު ދެކުނު ކޮރެއާގެ ރައީސާ ހިއްސާކުރައްވާފައިވާ ކަމަށެވެ. އަދި ބެލެވޭ ގޮތުގައި އުތުރު ކޮރެއާއިން 12،000 އާ ގާތްކުރާ އަދަދަކަށް ސިފައިން ހަނގުރާމައިގެ މައިދާނަށް ފޮނުވާނެކަމަށްވެސް ޒެލެންސްކީ ވިދާޅުވި އެވެ. 

ނޭޓޯގެ ސެކްރެޓަރީ ޖެނެރަލް މާކް ރުޓޭ ވިދާޅުވީ އުތުރު-ކޮރެއާއިން އެ ގައުމުގެ ސިފައިން ރަޝިޔާގެ ކުރްސްކު ސަރަހައްދަށް ޖަމާކޮށްފައިވާކަން ޔަގީންކުރެވިފައިވާ ކަމަށެވެ. އަދި މިއީ ރަޝިޔާގެ ހަނގުރާމައިގައި އުތުރު-ކޮރެއާއިން ޝާމިލުވާ މިންވަރު ވަރަށް ބޮޑު ތަނުން އިތުރުކުރުންކަމަށް ގަބޫލުކުރައްވާ ކަމަށެވެ. 

ދެކުނު ކޮރެއާގެ ޖާސޫސީ އިދާރާއިން ބުނި ގޮތުގައި ރަޝިޔާއަށް ފުރަތަމަ ވާސިލުވި އުތުރު-ކޮރެެއާ ސިފައިންނަަކީ އެ ގައުމުގެ އެއްގަމު ލަޝްކަރުގެ މަތީ ފަންތީގެ ޔުނިޓެއް ކަމުގައިވާ 11 ވަނަ ލަޝްކަރު ނުވަތަ ""ސްޓޯމް ކޯ"ގެ ސިފައިންނެވެ. 

އުތުރު ކޮރެއާއިން ފޮނުވި ސިފައިންގެ މައިގަނޑު ދައުރަކީ ޔޫކުރެއިނުން އަތުލާފައިވާ ކުރްސްކުގެ ބޮޑު ސަރަހައްދެއް އަނބުރާ ރަޝިޔާގެ ދަށަށް ގެންދިއުމަށް މިހާރު ޖަމާކޮށްފައިވާ 50،000 އަށްވުރެ ގިނަ ރަޝިޔާ ސިފައިންނަށް މަދަދުވެރިވުމެވެ. 

ޔޫކުރެއިނުގެ ޖާސޫސީ އޮފިޝަލުން ވިދާޅުވެފައިވަނީ ރަޝިޔާއަށް އެހީތެރިވުމަށް އުތުރު-ކޮރެއާއިން ފޮނުވި ސިފައިންނަކީ ތަޖުރިބާ މަދު، ދަށް ފަންތީގެ ސިފައިން ކަމަށެވެ. އެހެންކަމުން ހަނގުރާމާގައި އެމީހުންގެ ބޭނުން ހިފޭނެ މިންވަރާމެދު އެ ބޭފުޅުންވަނީ ސުވާލު އުފައްދަވާފަ އެވެ. 

"އެ ސިފައިން އެމީހުންގެ ގައުމުން ބޭރަށް ދުވަހަކުވެސް ނުދޭ. ހަނގުރާމައިގެ އަސްލު ތަޖުރިބާއެއް އެމީހުންނަށް ލިބިފައި ނެތް. އެމީހުންގެ ތަމްރީނާއި ތަޖުރިބާއަކީ މިޒަމާނުގެ ހަނގުރާމައިގެ ހަގީގަތްތަކާ ވަރަށް ދުރު ކަންކަން،" ޔޫކުރެއިނުގެ ޖާސޫސީ އޮފިޝަލެއް ފައިނޭންޝަލް ޓައިމްސްއަށް މައުލޫމާތު ދެއްވަމުން ވިދާޅުވި އެވެ. 

އެ ޖާސޫސީ އޮފިޝަލުން ވިދާޅުވި ގޮތުގައި މި ހަނގުރާމާގައި ބޭނުންކުރާ އެންމެ މުހިއްމު އެއް އާލާތްކަމަށްވާ ޒަމާނީ ޑްރޯނުތައް ފުރަތަމަ ފަަހަަރަށް އުތުރު ކޮރެއާ ސިފައިންނަށް ފެނުނީ ރަޝިޔާގެ ކޭމްޕުތަކުގަ އެވެ. 

މިހާތަނަށް އުތުރު ކޮރެއާއިން ރަޝިޔާއަށް އެހީތެރިވުމަށް ސިފައިން ފޮނުވިކަން ރަޝިޔާއިން އިއުލާނުކޮށްފައިނުވެ އެވެ. ނަމަވެސް އުތުރު ކޮރެއާއިން ސިފައިން ފޮނުވުމަކީ ރަޝިޔާއާއި އުތުރު ކޮރެއާގެ މެދުގައި މިހާރު ގާއިމުކޮށްފައިވާ ސްޓްރެޓެޖިކް ގުޅުމުގެ ތެރެއިން ކުރެވިދާނެ ކަމެއްކަމަށް ރަޝިޔާއިން ބުނެފައިވެ އެވެ.