ކޯސްޓްގާޑުގައި ބޮޑެތި އޮޕަރޭޝަންތަކަށް ހާއްސަ އެލީޓް ޔުނިޓެއް

ދިވެހިރާއްޖޭގެ ކަނޑުގެ ސަލާމަތީ ފައުޖެއްގެ ގޮތުގައި އެމްއެންޑީއެފް ކޯސްޓްގާޑްގެ އެލީޓް ޔުނިޓް، ސްޕެޝަލް ބޯޓް ސްކޮޑްރަން (އެސްބީއެސް) އިފުތިތާހު ކޮށްފި އެވެ.

މި ޔުނިޓް އިފްތިތާހުކޮށްދެއްވީ ނަސްރުގެ ދުވަހުގެ މުނާސަބަތުގައި އިއްޔެ ހަވީރު ޖުމްހޫރީ މައިދާނުގައި ބޭއްވި ހާއްސަ ހަރަކާތުގެ ތެރެއިން، ރައީސް ޑރ. މުހައްމަދު މުއިއްޒެވެ.

އެމްއެންޑީއެފް އިން ބުނީ އަލަށް އިފުތިތާހުކުރި އެސްބީއެސްއަކީ އެމްއެންޑީއެފް ކޯސްޓްގާޑްގެ ތެރޭގައި ހާއްސަ ތަމްރީނު ލިބިފައިވާ އެލީޓް މެރިޓައިމް ޔުނިޓެއް ކަމަށެވެ. މިއީ މެރިޓައިމް ޑޮމެއިންގައި ރެޕިޑް ރެސްޕޮންސްއާއި ހައި ސްޓޭކްސް އޮޕަރޭޝަންތަކަށް ހާއްސަ ޔުނިޓެކެވެ. 

މި ޔުނިޓަކީ އަންޑަވޯޓާ ޑެމޮލިޝަން އާއި، ޓެރަރިޒަމްގެ އުދުވާންތަކާއި، ކަނޑުފޭރުމާއި، އާމްޑް ރޮބެރީގެ އިތުރުން މަސްތުވާތަކެތީގެ ވަގުފާރިއާއި، ގަވާއިދާ ހިލާފަށް މަސްވެރިކަން ކުރުން ފަދަ އަމަލުތަކާ ދެކޮޅަށް ހިންގާ އޮޕަރޭޝަން ތަކުގައި ހަރަކާތްތެރިވުމަށް ތަމްރީނުދެވިފައިވާ، އަދި އެފަދަ ހާލަތްތަކަށް އަބަދުވެސް ތައްޔާރީ ހާލަތުގައި ތިބޭނެ ފައުޖެއް ކަމަށް އެމްއެންޑީއެފް އިން ބުންޏެވެ.

މިއީ އިންޑިއާ ކަނޑުގެ ސަލާމަތާއި ރައްކާތެރިކަމަށް އެހީތެރިވުމާއި، ރާއްޖޭގެ ދިފާއީ ސިޔާދަތު ކަށަވަރުކުރުމަށް ސަރުކާރުން ސަރުކާރުން ކުރާ މަސައްކަތަށް އިތުރު ވެގެންދާނެ ބޮޅެއް ކަމަށް ވެސް އެމްއެންޑީއެފް އިން ބުންޏެވެ.