ފުވައްމުލަކުގައި ނުކުޅެދުންތެރިކަން ހުންނަ ކުއްޖަކަށް ޖިންސީ ގޯނާކުރި ބޮޑުބޭބެގެ މައްޗަށް ދައުވާ އުފުލައިފި

ނުކުޅެދުންތެރިކަން ހުންނަ ފިރިހެން ކުއްޖަކަށް ޖިންސީ ގޯނާކުރި މައްްސަލައެއްގައި ފުވައްމުލަކު ސިޓީން ހައްޔަރުކުރި މީހާގެ މައްޗަށް ދައުވާ އުފުލައިފި އެވެ.

ޕްރޮސެކިއުޓަރު ޖެނެރަލްގެ އޮފީހުގެ އޮފިޝަލަކު ވިދާޅުވި ގޮތުގައި އޭނާގެ މައްޗަށް ދައުވާ އުފުލާ މައްސަލަ ކޯޓަށް ފޮނުވީ މިދިޔަ ހަފްތާގަ އެވެ. މިއީ ނުކުޅެދުންތެރިކަން ހުންނަ ފިރިހެން ކުއްޖަކަށް ޖިންސީ ގޯނާކުރި މައްސަލައެއް ކަމުން އެ މައްސަލައިގެ މުހިންމު މައުލޫމާތު ޕީޖީން ވެސް ފުލުހުން ވެސް ހާމައެއް ނުކުރެ އެވެ.

ފުލުހުން ބުނި ގޮތުގައި އެ މައްސަލަ އެ ހިދުމަތުގެ ސަމާލުކަމަށް ގެނައީ މިދިޔަ އޭޕުރީލު 14 ވަނަ ދުވަހު އެވެ. އެ މައްސަލައާ ގުޅިގެން ސެޕްޓެންބަރު މަހުގެ ކުރީކޮޅު ކޯޓު އަމުރެއްގެ ދަށުން ހައްޔަރުކުރީ އުމުރުން 57 އަހަރުގެ ފިރިހެނެކެވެ. އެ މީހާގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ޝަރީއަތް ނިމެންދެން އޭނާ ބަންދުގައި ބެހެއްޓުމަށް ކޯޓުން ވަނީ އަމުރުކޮށްފައިވެ އެވެ.

އަދި މި މައްސަލާގައި ޖިންސީ އަނިޔާގެ ޝިކާރައަށްވީ ކުއްޖަކީ ނުކުޅެދުންތެރިކަން ހުންނަ ކުއްޖަކަށްވާތީ އެ މައްސަލައާމެދު ފުލުހުން އަމަލު ކުރީ ކުޑަކުދިންނަށް ޖިންސީ ގޯނާކުރުމުގެ މައްސަލަތަކާމެދު އަމަލުކުރާ އުސޫލުން ކަމަށް ވެސް ފުލުހުން ބުނެފައިވެ އެވެ.

މި މައްސަލާ ގައި ދައުވާ އުފުލީ ފުވައްމުލަކު، ފުނާޑު ނަވާ، އަބްދުﷲ ވަހީދު މޫސާގެ މައްޗަށެވެ.