އަފްޣާން މަންދޫބާ ތޯހާ ބައްދަލުކުރީ ހުއްދަ ނެތި، ފިޔަވަޅު އަޅައިފި

ދިވެހިރާއްޖެ އިން ޕާކިސްތާނަށް ކަނޑައަޅާފައި ހުންނަވާ ސަފީރު، އަފްޣާނިސްތާނުގެ ފަރާތުން ޕާކިސްތާނު ގައި ހުންނަވާ މަންދޫބާ އެކު ބޭއްވި ބައްދަލުވުމަކީ ދިވެހި ސަރުކާރުގެ ހުއްދައާ އެކު ކުރިއަށް ގެންގޮސްފައިވާ ބައްދަލުވުމެއް ނޫން ކަމަށް ދިވެހި ހާރިޖިއްޔާ އިން ބުނެފި އެވެ.

ތާލިބާނުންގެ ވެރިކަން އޮތް އަފްޣާންގެ މަންދޫބާ ތޯހާ ބައްދަލު ކުރެއްވުމާއި ގުޅިގެން ފޮރިން މިނިސްޓްރީން މިއަދު ނެރުނު ބަޔާނެއް ގައި ބުނެފައި ވަނީ އެ ބައްދަލުވުމަކީ ދިވެހި ސަރުކާރުގެ ހުއްދައާއެކު ކުރިއަށް ގެންގޮސްފައިވާ ބައްދަލުވުމެއް ނޫން ކަމަށެވެ. އަދި މި ކަމާއި ގުޅިގެން ދިވެހި ސަރުކާރުގެ ފަރާތުން އަޅަންޖެހޭ ފިޔަވަޅު ވަނީ އަޅާފައި ކަމަށް ބުންޏެވެ.

ނަމަވެސް އެޅި ފިޔަވަޅެއް އަދި ތަފްސީލެއް ނުދެ އެވެ.

ރާއްޖޭން ގައުމުތަކުގެ ސަރުކާރުތައް ބަލައިގަތުމުގައި ސުވާލެއް އުފެދޭ ހާލަތެއްގައި އަބަދުވެސް ބަލަނީ އދ އިން ކަނޑައަޅާފައިވާ މިންގަޑުތަކާއި އުސޫލުތަކަށް ކަމަށާ އަދި މި އުސޫލުތަކާއި އެއްގޮތްވާ ގޮތުގެ މަތީން، އދ ގައި އަފްޣާނިސްތާނު ތަމްސީލުކުރާ ފަރާތަކީ އަފްޣާނިސްތާނުގެ ސަރުކާރުގެ ގޮތުގައި ދިވެހި ސަރުކާރުން ބަލައިގަންނަ ފަރާތް ކަމަށް ވެސް ބުނެފައިވެ އެވެ.

ދިވެހިރާއްޖެ އިން ޕާކިސްތާނަށް ކަނޑައަޅާފައި ހުންނެވި ސަފީރު، ތޯހާ އަކީ ރައީސް މުއިއްޒުގެ އާއިލީ ބޭފުޅެކެވެ. ޕީއެންސީގެ މަޖިލީސް ޕްރައިމަރީ ގައި ވެސް ވާދަކުރެއްވި ތޯހާ އެންމެ ފުރަތަމަ ހަމަޖެއްސެވީ ސައުދިއަރަބިއްޔާއަށް ކަނޑައަޅާ ސަފީރަކަށެވެ. މަޖިލީހުން ރުހުން ވެސް ދިނެވެ.

ނަމަވެސް ކުއްލި ގޮތަކަށް އެ ނިންމުން ބަދަލުކޮށް ޕާކިސްތާނަށް ފޮނުވަން ހަމަޖެއްސެވީ އެވެ. ރައީސްގެ އެ ނިންމެވުމަކީ ސައުދީގެ އެންގެވުމަށް ނިންމެވި ނިންމެވުމެއް ކަމަށް ވެ އެވެ.