"ކައުންސިލްތައް ބާރުވެރިކުރުވަން ރައީސް ގެންގުޅުއްވާ ސިޔާސަތުތައް ހަރުދަނާކަން ދަނީ ހާމަވަމުން"

ރައީސް ޑރ. މުހައްމަދު މުއިއްޒު ވައުދުވެވަޑައިގަތް ގޮތަށް، ކައުންސިލްތައް ބާރުވެރިކުރުވައި ކައުންސިލްތަކަށް އާމްދަނީ ހޯދޭނެ މަގުތައް ވަނީ ފަހިކޮށްދީފައިވާ ކަމަށާއި، ކައުންސިލްތަކާމެދު އެމަނިކުފާނު ގެންގުޅުއްވާ ސިޔާސަތުތައް ހަރުދަނާކަން ހާމަވަމުންދާ ކަމަށް ސަރުކާރުގެ ސްޕޯކްސްޕާސަން ހީނާ ވަލީދު ވިދާޅުވެއްޖެ އެވެ.

ކައުންސިލްތަކަށް މާލީ ބާރުވެރިކަން ހޯދައިދިނުމަށް ރައީސް ކުރައްވަމުން ގެންދަވާ މަސައްކަތްޕުޅު ރޭ ހީނާ ވަނީ ފާހަގަކުރައްވާފަ އެވެ. އެކްސްގައި ކުރެއްވި ޕޯސްޓެއްގައި ހީނާ ވިދާޅުވީ ގާނޫނުގައި ބުނާގޮތަށް ކައުންސިލްތަކަށް ބްލޮކް ގްރާންޓް ހަމަޖެހިގެންދާނެ ކަމުގެ ޔަގީންކަން ރައީސުލްޖުމްހޫރިއްޔާ ދެއްވާފައިވާ ކަމަށެވެ.

އޭގެ އިތުރުން ކައުންސިލްތަކަށް އާމްދަނީ ހޯދައިދިނުމަށް، މިހާރު ލޯކަލް ޓޫރިޒަމްގެ ތެރެއިން ލިބޭ، ޓެކްސްގެ ވަކި ޕަސެންޓޭޖެއް ކައުންސިލްތަކަށް ޖަމާކޮށްދިނުމަށް ގާނޫނަށް ގެންނަންޖެހޭ އިސްލާހުތައް ގެނައުމަށް މަޖިލީހަށް ހުށަހަޅަން ތައްޔާރުވަމުންދާ ކަމަށް ވެސް ވިދާޅުވި އެވެ.

އިތުރު ހެއްކެއް ދައްކަވަމުން ހީނާ ވިދާޅުވީ ރައީސް ކަނޑައެޅުއްވި ގޮތަށް، 50 ރަށެއްގެ ކައުންސިލް އިމާރާތް މިއަހަރު ތެރޭގައި އަޅަން ފެށުމަށް ވެސް ތައްޔާރުވަމުންދާ ކަމަށެވެ. 

ހީނާ ވަނީ ރައީސް ވިދާޅުވި ބަސްކޮޅެއް ވެސް ކޯޓްކުރައްވާފަ އެވެ. އެއީ، “ލާމަރުކަޒީ ނިޒާމުގެ ތެރެއިން ރައްޔިތުންނާ ގާތުން މަސައްކަތް ކުރުމުގައި، އެންމެ ބޮޑަށް، އެންމެ އިސްކަމެއް ދީގެން، އަޅުގަނޑުމެން މަސައްކަތް ކުރަމުންދާކަން އެއީ، ފެންނަން އޮތް ހަގީގަތް،" މި އިބާރާތެވެ.

"ރައީސުލްޖުމްހޫރިއްޔާގެ ވައުދުފުޅެއް މިއަދު ފުރިހަމަވެގެން ދިއުމުގެ އަސްލަކީ ކައުންސިލްތައް މެދުވެރިކޮށް، ކަންތައްތައް ކުރުމުގައި، އެމަނިކުފާނު ގެންގުޅުއްވާ ސިޔާސަތުގެ ހަރުދަނާކަން އަދި އެކަމުގައި އެމަނިކުފާނުގެ ބަހާ އަމަލާއި ދިމާވުން،" ހީނާ ވިދާޅުވި އެވެ.