ގާނޫނުގައި ވަކި ނިސްބަތަކުން ފައިސާ ދޭން އޮއްވައި އެއާ ހިލާފަށް ބަޖެޓު ނުހެދޭނެ: ޑިމޮކްރެޓްސް

ގާނޫނުގައި ވަކި މުއައްސަސާާ އަކަށް ވަކި ނިސްބަތަކުން ފައިސާ ދިނުމަށް ލާޒިމުކުރުމުން އެ ނޫން ގޮތަކަށް ދައުލަތުގެ ބަޖެޓު އެކުލަވާލުމަކީ ސަރުކާރަށްވެސް ރައްޔިތުންގެ މަޖިލީހަށްވެސް އޮތް ބާރެއް ނޫން ކަމަށާއި އެއީ ކަނޑައެޅިގެން ގާނޫނާއި ހިލާފު އަމަލެއް ކަމަށް ދަ ޑިމޮކްރެޓްސް އިން ބުނެފިއެވެ.

އެ ޕާޓިން ނެރުނު ބަޔާނެއްގައި ބުނެފައިވަނީ ދިވެހި ރާޢްޖޭގެ ޖުމްހޫރިއްޔާގެ ގާނޫނު އަސާސީގައި، ދިވެހި ވެރިކަމުގެ އެންމެހާ ބާރުތައް ފެށިގެން އަންނަނީ އަދި ބާރުތައް ދެމިއޮންނާނީ ރައްޔިތުންގެ ކިބައިގައި ކަމަށް ކަނޑައަޅާފައިވާ ކަމަށެވެ. އަދި އެ ގާނޫނުގެ އަށް ވަނަ ބާބުގައި ދިވެހި ރާއްޖެ ހިންގަންވާނީ ލާމަރުކަޒީ އުސޫލުން ކަމަށް ކަނޑައަޅާފައިވާއިރު އެ އުސޫލު ހިފެހެއްޓުމާއި ކުރިއެރުވުމަކީ ޑިމޮކްރަަޓިކް ހިންގުން އަށަގަންނެވުމާއި ކުރިއެރުވުމަކީ މުޅި ދައުލަތުގެ ޒިންމާއެއް ކަމަށްވެސް އެ ބަޔާނުގައި ވަނީ ބުނެފައެވެ.

އެ ބަޔާނުގައި ބުނެފައިވަނީ ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައި ކައުންސިލްގެ އިހުތިސާސް ކަނޑައެޅި، ކައުންސިލްތަކުގެ އިހުތިސާސްގެ ތެރޭގައި ހިމެނޭ ރައްޔިތުންނަށް ފޯރުކޮށްދޭނެޖެހޭ ރަށްވެހި ހިދުމަތް ފޯރުވައިދިނުމަށް، ދައުލަތުގެ ބަޖެޓުގެ ޖުމްލަ އާމްދަނީ މަދުވެގެން ފަސް ޕަސެންޓް ކައުންސިލްތަކަށް ދޭންވާނެ ކަމަށް ކަނޑައަޅައިފައިވާ ކަމަށެވެ.

އެގޮތަށް ކަނޑައަޅާފައިވާއިރު ކަނޑައެޅިގެން ލާމަރުކަޒީ ގާނޫނާ ހިލާފަށް ކައުންސިލްތަކަށް ހައްގުވާ ބްލޮކް ގްރާންޓުން ވަރަށް ބޮޑު މިންވަރެއް އުނިކޮށް، މާލީ ވަޒީރު ގާނޫނާއި ހިލާފު ވުމަކީ އެ ޕާޓީން ނުހަނު ކަންބޮޑުވާ ކަމެއް ކަމަށްވެސް އެ ބަޔާނުގައި ވަނީ ބުނެފައެވެ.

" ލާމަރުކަޒީ އުސޫލު ކުރިއަރުވާ ބާރުވެރިކުރުމުގެ ޒިންމާ އަކީ ވަޒީރަކަށް ނުވަތަ ވެރިޔަކަށް ނުވަތަ މުއައްސަސާއަކަށް ވިޔަސް އޮތް އިހުތިޔާރީ ކަމެއް ނޫން. އަދި އެއާ ހިލާފަށް އެއީ ދުސްތޫރީ އަދި ގާނޫނީ ވާޖިބެއް." ޑިމޮކްރެޓްސްގެ ބަޔާނުގައި ބުންޏެވެ.

އެހެން ކަމުން އެފަދައިން އަމަލު ނުކުރުމަށާއި، ގާނޫނީ އިމުގެ ތެރެއަށް ރުޖޫއަވުމަށް، މާލީ ވަޒީރަށާއި ސަރުކާރަށް އެ ޕާޓީން ވަނީ ގޮވާލާފައެވެ.