ފެން ނުހިނދި ލަސްވާ މަޖީދީމަގު މައްސަލައަށް ދިހަ އަހަރަށްފަހު ހައްލު

މާލެ އަށް ކިރިޔާ ވާރޭ ކޮޅެއް ވެހި ލާއިރަށް އެންމެ އަވަހަށް ފެންބޮޑުވާ ދެ ސަރަހައްދަކީ މަޖީދީމަގު ލެކިއުޓް ކައިރި އާއި މާލޭގެ އިރުމަތީ ފަރާތު މަޖީދީމަގު ކޮޅު އާޓިފިޝަލް ބީޗް ކައިރި އެވެ. އެކަމަކު މާލެ އަށް ފަތިހު ވާރޭ ވެހުނު ނަމަވެސް ބޮޑުވި ފެންގަނޑު އިރުއަރައިގެން އައިިއިރު އޮތީ ހިނދިފަ އެވެ. 

މާލޭގައި ދިރިއުޅޭ ރައްޔިތުން ހާއްސަކޮށް ސްކޫލްތަކަށް ދާ ކުދިންނާއި މާލޭގެ އާއްމު ދިރިއުޅުމަށް ބޮޑު ތަކުލީފެއް ކުރިމަތިވަމުން ދިޔަ މި މައްސަލަ ހައްލުކޮށްފައިވަނީ މަޖީދީމަގު ހެންވޭރުގައި ހުރި ޕަންޕް ސިސްޓަމް އައުކޮށް ފެން ހިންދާ ހޮޅި ނިޒާމު އިސްލާހުކޮށްގެންނެވެ. 

ފެން ކުންފުނިން ވަނީ މިދިޔަ 15 ވަރަށް މަސް ދުވަހުގެ ތެރޭގައި މި މައްސަލަ ހައްލުކުރަން އާއްމުކޮށް ފެންބޮޑުވެ ފެން ނުހިނދި ގިނަ އިރުތަކެއް ވަންދެން އޮންނަ މި ސަރަހައްދު ކޮނެފަ އެވެ. އަދި މި ސަރަހައްދުގެ އެ މައްސަލަ ވަނީ ހައްލުކޮށްފަ އެވެ. މި ސަރަހައްދުގެ އިތުރުން މާލޭގައި އާއްމުކޮށް ފެން ނުހިނދި އޮންނަ ގިނަ ސަރަހައްދުތަކުގައި ފެން ނުހިނދޭ ހައްލުކުރަންވެސް ސަރުކާރުން ދަނީ މަސައްކަތް ކުރަމުންނެވެ. 

ސަރުކާރުން ދާދި ފަހުން ވަނީ މާލޭގައި އެންމެ އަވަހަށް ފެންބޮޑުވާ އެއް ސަރަހައްދު ކަމަށްވާ އައިޖީއެމްޗް ހޮސްޕިޓަލް ސަރަހައްދުގައި ފެން ބޮޑުވާ މައްސަލަ ވެސް ހައްލުކޮށްފަ އެވެ. މިހާރު މި ސަރަހައްދުގައި ވެސް އުފެދޭ ފެންގަނޑު މާގިނަ އިރުތަކެއް ނުވެ ހިނދެ އެވެ. 

އިންފްރާސްޓްރަކްޗަރު މިނިސްޓަރު ޑރ. އަބުދުﷲ މުއްތަލިބު މީގެ ކުރިން ވަނީ ޕަންޕު ބޭނުންކޮށްގެން މާލޭގެ ފެން ހިންދުމުގެ މަސައްކަތް ކުރަން މިހާރު ފަސޭހަވާނެ ކަމަށް ވިދާޅުވެފަ އެވެ. މިނިސްޓަރު މިހެން ވިދާޅުވީ ކުރިން އައިޖީއެމްއެޗް ސަރަހައްދުގައި ވިއްސާރަ މޫސުމުގައި އުފެދޭ ފެންގަނޑު އަވަހަށް ހިނދޭ ނިޒާމެއް ގާއިމް ކުރަން ކުރައްވާ މަަސައްކަތްތަކާ ބެހޭ ގޮތުން ވާހަކަ ދައްކަވަމުންނެވެ. 

މާލޭގެ މަގުތަކުގައި ފެން ބޮޑުވެ އަވަހަށް ނުހިނދޭ މައްސަލަ ހައްލު ކުރަން އެކި ސަރުކާރު ތަކުން ގިނަ މައްސައްކަތް ތަކެއް ކޮށްފައިވެ އެވެ. އެކަމަކު އަދި ވެސް މި ކަމަށް ދާއިމީ ހައްލެއް ލިބިފައެއް ނެތެވެ. މާލޭގެ އެކި ހިސާބުތަކުގައި ގާތްގަނޑަކަށް 16 ޕަންޕް ސްޓޭޝަން ބަހައްޓާގައިވެ އެވެ. މި ޕަންޕުތަކުގެ ކެޕޭސިޓީއަކީ ގަޑިއެއްގެ ތެރޭގައި 400 ކިޔުބިކު މީޓަރުގެ ފެން ޕަންޕު ކުރުމެވެ. ސަރުކާރުން ދަނީ ފެން ބޮޑުވުމުގެ މައްސަލަ ހައްލު ކުރުމުގެ ގޮތުން މުޅިމާލޭގެ ހުރިހާ މަގެއް ލެވަލްކޮށް ސްޓޯމްވޯޓާ ޕަންޕުތައް ބެހެއްޓުމާއެކު ގިނަ ކަންތައްތަކެއް ހިމެނޭ މަޝްރޫއެއް ފަށަން ތައްޔާރުވަމުންނެވެ. މި މަސައްކަތް ކުރަނީ ޗައިނާ ސަރުކާރުގެ ހިލޭ އެހީގެ ދަށުންނެވެ.