ބުއްދިވެރި ގޮތަކީ މަސްލަހަތު ނެތް ކަންކަމުގައި ހަނުހުރުން: ހުތުބާ

އެންމެ ބުއްދިވެރި ގޮތަކީ މަސްލަހަތު ނެތް ކަންކަމުގައި ބަސްބުނުމުގެ ބަދަލުގައި ހަނުހުރުންކަމަށް މިއަދުގެ ހުކުރު ހުތުބާގައި ބުނެފި އެވެ. 

ހުތުބާގަައި ނަބަވީ އިރުޝާދާ ހަވާލާދީ ބަޔާންކޮށްދީފައިވާ ގޮތުގައި ހަނުހުރުމަކީ ހެޔޮ އަހުލާގުގެ ތެރެއިން ހިމެނޭ ހަށިގަނޑަށް ލުއި ހެޔޮކަން ބޮޑު އަމަލެކެވެ. އޭގެ އިތުރަށް ހުތުބާގައި ބުނެފައިވަނީ މާތްﷲ ތައާލާއާއި އެކަލާނގެ ރަސޫލާ ގޮވައިލައްވަނީ ހަނުހުރުމަށް ކަމަށެވެ. 

އެގޮތުން ނަބިއްޔާގެ ހަދީސްބަސްފުޅެއްގައި ހެޔޮ ބަހެއް ނުބުނެވޭ ހާލަތުގައި ހަނުހުރުމަށް އަމުރުކުރައްވައި އިރުޝާދު ދެއްވާފައިވާކަން ހުތުބާގައި ފާހަގަކޮށްފައިވެ އެވެ.

ހުތުބާގައި ސިފަކުރި ގޮތުގައި ހިފަހެއްޓުމެއްނެތި ދޫކޮށްލާ ދުލަކީ ޝައިތާނާގެ އަތަށް ދެވޭ ވައުގަނޑެކެވެ. ބާތިލު ވާހަކަތަކާ ދުރުހުލިވާ މީހުންނަކީ ސުވަރުގޭގެ އަހުލުވެރިންކަން ބަޔާންކޮށްދީ ހުތުބާގައި ބުނެފައިވަނީ ބާތިލު ވާހަކަދައްކަން ފެށުމުން ޝައިތާނާ އިންސާނާ އެކި އަތްއަތަށް އަނބުރަން ފަށާ ކަމަށެވެ. 

އަދި އިންސާނާގެ ކޮންޓުރޯލުން ބަސްތައް ބޭރުވެއްޖެނަމަ، އޭނާއަކީ އަނގަ ހުތުރު، ހިތް ފަސާދަވެފައިވާ މީހަކަށް ވެގެންދާކަން ފާހަގަކޮށް، ނަބަވީ އިރުޝާދުގެ އަލީގައި ހިތް ސީދާވަނީ ދޫ ސީދާވުމުންކަން ހުތުބާގއި ބަޔާންކޮށްދިނެވެ. 

މީހާ ވަޒަންކުރެވެނީ އެމީހަކު ދައްކާ ވާހަކައިންކަން ފާހަގަކޮށް ހުތުބާގައި ބުނެފައިވަނީ މީހާ ހަނުހުރެއްޖެނަމަ އޭނާއާ މެދު ގޮތެއް ކަނޑަައަޅަން އުދަގޫވާނެ ކަމަށެވެ. ނަމަވެސް އޭނާ ވާހަކަދައްކައި ބަސްބުނެފިނަމަ އޭނާގެ ޝަހުސިއްޔަތު ފާޅުވާނެ ކަމަށްވެސް ހުތުބާގައި ބުނެފައިވެ އެވެ. 

މުއުމިނުންނަކީ ދުލަށް ރައްކައުތެރިވާ މީހެއްކަން ފާހަގަކޮށް ހުތުބާގައި ބުނެފައިވަނީ މުއުމިނުން ވާހަކަދައްކާނީ އެމީހުންގެ ނަފުސަޑާއި މުޖުތަމައަށާއި ވަަތަނަށް ފައިދާ ހުރި ކަންކަމުގައި ކަމަށެވެ. 

ހުތުބާގައި ބަޔާންކޮށްދިން ގޮތުގައި ހަނުހުރުމުގެ އިމަކީ ތިބާއާ ބެހޭ ކަންކަމުގައި ރިވެތި ބަހުން ބަސްބުނުމެވެ. އަދި އެމީހެއްގެ ދުލުން ނުކުންނަ ކޮންމެ ލަފްޒަކާމެދު ގިޔާމަތްދުވަހުން ސުވާލުކުރެވޭނެކަން ހުތުބާގައި ހަނދާންކޮށްދީފައިވެ އެވެ.