އަމިއްލަ ހަޔާތްޕުޅުން މިސާލު ދެއްކެވުމާއެކު ދަރިވަރުންނަށް ރައީސްގެ އަގުހުރި ނަސޭހަތްޕުޅެއް

ދިވެހިރާއްޖޭގެ ގައުމީ ޔުނިވާސިޓީގެ ދަރިވަރުންގެ ދަސްވެނިވުމުގެ ޖަލްސާގައި ރައީސުލްޖުމްހޫރިއްޔާ ޑރ.މުހައްމަދު މުއިއްޒު ދެއްވި ތަގުރީރުގައި އެމަނިކުފާނު މަތީ ތައުލީމު ހާސިލުކުރެއްވި ދުވަސްވަރުގެ ބައެއް ހަނދާންތައް އައުކުރެއްވުމާއެކު މުހިއްމު ނަސޭހަތްޕުޅުތަކެއް ދަރިވަރުންނަށް ދެއްވައިފި އެވެ. 

އެމަނިކުފާނުގެ ވާހަކަފުޅު ފެއްޓެވީ ފުރަތަމަ ޑިގުރީން ފެށިގެން ޕީއެޗްޑީއާ ހަމައަށް އިނގިރޭސިވިލާތުގައި ކިޔަވައިވިދާޅުވި ދުވަސްވަރުގެ ބައެއް ހަނދާންތަކުންނެވެ. އެ ދުވަަސްވަރު އެކި ގޮންޖެހުންތައް ކަނޑައްތުކުރެއްވިކަމަށާއި އެ ދުވަސްވަރަކީ ދަތިތައް ގިނަ، އެކި ޒާތުގެ ގޮންޖެހުންތައް ކަޑައްތުކުރައްވަންޖެހުނު ދުވަސްވަރެއްކަން ރައީސް ފާހަގަކުރެއްވި އެވެ. 

ނަމަވެސް ވަރުގަދަ އަޒުމާއެކު، ހިންމަތްކުރައްވައިގެން ކުރެއްވި މަސައްކަތްޕުޅުން ކާމިޔާބު ހާސިލުކުރެއްވުނުކަމަށާއި، އެއިރުވެސް އެމަނިކުފާނު އިސްކުރެއްވީ ނަތީޖާ ނެރުއްވުންކަމަށާއި، އެކަމަށްޓަކައި ކުރެއްވި މަސައްކަތްޕުޅުން މާތްﷲގެ އިރާދަފުޅާއެކު ނަތީޖާ ހާސިލުކުރެވުނު ކަމަށް ރައީސް ވިދާޅުވި އެވެ. 

"ވަރަށް ދަތި ދުވަސްތައް އައި. އެހެންނަމަވެސް، އަޅުގަނޑަށް މުހިންމީ ނަތީޖާ. ހާސިލުކުރަން ދިޔައީ ނަތީޖާ. އިރާދަކުރެއްވީތީ، އެ ނަތީޖާ ތިޔަ ބޭފުޅުންވެސް ތިޔަ ހާސިލުކުރީ.،" ރައީސް ވިދާޅުވި އެވެ. 

އެމަނިކުފާނު އިތުރަށް ވިދާޅުވެދެއްވީ ޕީއެޗްޑީ މަރުހަލާގައި ކަޑައްތުކުރެއްވި ދަތި އުދަގޫ ރާސްތާ އެވެ. އަދި ޕީއެޗްޑީ ތީސިސް ލިޔުއްވުމަށް ކުރެއްވި ދިރާސާގައި ލެބޯޓަރީގައި އެއިރު ހޭދަކުރެއްވި ވަގުތާއި ކުރެއްވި މަސައްކަތް ތަފުސީލުކޮށް ވިދާޅުވެދެއްވި އެވެ. 

" ކޮންކްރީޓް ޓެކްނޯލޮޖީގެ ދާއިރާއިން ދިރާސާއެއް ހެދީ. ރެޔާއި ދުވާލު ލެބޯޓްރީގައި އުޅެންޖެހުނީ. ވަކި ވައްތަރެއްގެ ސްޕެސިމަންތަކެއް ހަދައިގެން، އޭގެ ދަށަށް ވަދެ އޮވެ، 1.2 މީޓަރު، 1.2 މީޓަރުގެ އެލް. ޝޭޕްގެ ބްލޮކެއް ހަދައި، ވަކި ގޮތަކަށް މިކްސްކޮށްގެން ކޮންކްރީޓް ހަދައިގެން، އޭތި ވަކިގޮތަކަށް ކިޔޯ ކޮށްގެން، އޭގެ މަތީގަޔާއި، އަޑީގަޔާއި، ސަތޭކައަށްވުރެ ގިނަ އެކި ވައްތަރުގެ ޓެމްޕަރޭޗަރ މެޝަރކުރާ ޑިވައިސްތަކާއި، މޫވްމަންޓް މެޝަރކުރާ ޕޮއިންޓްސްތައް އަމިއްލައަށް، ބުރުމާއިން ތޮރުފައިގެން، ހަރުކޮށްގެން، ރެޔާއި ދުވާލު ވަކި ގަޑިތަކެއްގައި، ބިންމަތީ އޮށޯވެ އޮވެގެން، އޭގެން ރީޑިންގ ނަގައިގެން، އެތައް އަހަރެއް ހޭދަކުރީ. އެއީ، ސައިންޓިފިކް ދިރާސާއެއް. އެއަށް ވާގޮތް ބަލަންވެގެން. އޭގައި ބްލޭންކެޓެއް އަޅުވައިގެން، ހޫނުކޮށްގެން، ހޫނު މަޑުކޮށް، ހޫނު މަތިކޮށް ހެދީމަ، ދެން އެވާގޮތެއް ބަލައި، މިކަހަލަ ކަންތައްތަކެއް ކުރީ.،" ޕީއެޗްޑީ ރިސާޗު ފުރިހަމަކުރެއްވި ގޮތް ސިފަކޮށްދެއްވަމުން ރައީސް ވިދާޅުވި އެވެ. 

އެ މަސައްކަތުގައި އާއިލާވެސް މާލެއަށް ބަދަލުކުރެއްވުމަށްފަހު ދުވާލަކު މަދުވެގެން 20 ގަޑިއިރު ދިރާސާގައި ހޭދަކުރެއްވިކަން ރައީސް ފާހަގަކުރެއްވި އެވެ. އަދި ޔުނިވަސިޓީއަށް ވަޑައިގަތުމަށާއި ގެއަށް ވަޑައިގަތުމަށް ހޭދަވާ ވަގުތުވެސް ހިމެނޭހެން ދުވާލަކު ހަތަރު ގަޑިއިރަށްވުރެ އިތުރު ވަގުތެއް އެހެން ކަމެއްގައި ހޭދަނުކުރައްވައި ކުރެއްވި މަސައްކަތްޕުޅުން އެމަނިކުފާނުގެ ދިރާސާގެ ތިއަރެޓިކަލް އެނަލައިސިސްގައި ކުށެއް ނުފެނުނުކަމަށް އެކްސްޓާނަލް އެގްޒަމިނާ ވިދާޅުވިކަން ފާހަގަކުރައްވަމުން ރައީސް ވިދާޅުވީ އެ ވާހަކަފުޅުން ދެއްވަން ބޭނުންފުޅުވި މެސެޖަކީ އަމިއްލަ ނަފުސަށް އިތުބާރުކޮށްގެން ބުރަ މަސައްކަތްކުރުމުން ކާމިޔާބު ލިބޭނެކަން ކަމަށެވެ. 

"އެހެން ކަންތައްތައްވެސް ކަޑައްތު ކުރިން. އެހެންވީމާ، ޢަޒުމަކަށް ވާންވީ ކިތަންމެ ބޮޑު ޗެލެންޖެއް ކުރިމައްޗަށް އަޔަސް، އަމިއްލަ ނަފްސަށް އިތުބާރުކުރަން ފުރަތަމަ ކަމަކަށް. ޕޮޒިޓިވް ތިންކިންގގައި ކުރިޔަށް ދާން. ޕޮޒިޓިވް ތިންކިންގގައި ކުރިޔަށް ދިޔައީމާ، އިރާދަކުރެއްވިއްޔާ ﷲގެ އިރާދަފުޅާއެކީގައި ދިރިއުޅުން ކާމިޔާބުވާނެ. ތިމާގެ ކިބައިން ކަންތައްތަކެއް ޤައުމަށް ކޮށްދެވޭނެ.،" ރައީސް ވިދާޅުވި އެވެ.

އިތުރަށް ފުރަތަމަ ޑިގުރީ މަރުހަލާގައި އެމަނިކުފާނުގެ ލެކްޗަރާއެއް ދެއްވި ނަސޭހަތެއް ދަރިވަރުންނާ ހިއްސާކުރެއްވި އެވެ. ޖިއޯ ޓެކްނިކްސް ކިޔަވައިދެއްވި ޕްރޮފެސާ އެއިރު ވިދާޅުވިކަމަށް ރައީސް ވިދާޅުވީ އޭނާ ދަސްކޮށްދޭން ބޭނުންވަނީ ވިސްނާނެ ގޮތް ކަމަށެވެ. ދަރިވަރުންނަށް އަމިއްލައަށް ވިސްނަން ދަސްކޮށްދިނުން ކަމަށް މުހާޟިރު ވިދާޅުވި ކަމުގައި ރައީސް ފާހަގަކުރެއްވި އެވެ. 

ރައީސް ވިދާޅުވި ގޮތުގައި ޔުނިވަސިޓީ ތައުލީމު ހާސިލުކޮށްގެން ނުކުންނަ ދަރިވަރުންނަށް އެންމެ މުހިއްމު ހުނަރަކީ އަމިއްލަ ވިސްނުމުން ކަންކަމާމެދު ފިކުރުކުރުމުގެ ގާބިލުކަމެވެ. އެމަނިކުފާނު ވިދާޅުވީ ދަސްވެނިން ގައުމީ ފެންވަރުގައާއި ދުނިޔޭގެ ފެންވަރުގައިވެސް ކަންކަން ވަމުންދާ ގޮތާމެދު ފުންކޮށް ވިސްނަން ދަސްކުރަންޖެހޭ ކަމަށެވެ. 

"އެހެންވީމާ، ޔުނިވަރސިޓީއަކުން ނުކުންނައިރުގައި، އެމީހާގެ އަމިއްލަ ސިކުނޑިން، އެހެން މީހަކަށް އޭނާގެ ސިކުނޑި ދޫކޮށްނުލައި، އަމިއްލައަށް ވިސްނަން ދަސްކޮށްދިނުމޭ، އެޔޭ ޔުނިވަރސިޓީއަކުން ނުކުންނައިރު އެންމެ މުހިންމު އެއްޗަކީ.،" ރައީސް ވިދާޅުވި އެވެ. 

"އެހެންވީމާ، ތިޔަބޭފުޅުން ތިޔަތިއްބެވީ، ގުރެޖުއޭޓްވެފައި. އަމިއްލަ ސިކުނޑިން ވިސްނަންޖެހޭނެއޭ، މިހާރު މިވަނީ ކިހިނެއްކަން، ޤައުމީ ލެވެލްގައިވެސް، ފަރުދީ ލެވެލްގައިވެސް އަދި ބައިނަލްއަޤްވާމީ ލެވެލްގައިވެސް ކަންކަން ވާގޮތް. އެހެންމީހަކު ބުނާ އެއްޗެއް ނޫނޭ ގަބޫލުކުރާނީ. އަމިއްލަ ސިކުނޑިން ވިސްނަވާށޭ. ވިސްނަވާއިރުގައި، ކަންކަން ވާގޮތް ވަރަށް ފަސޭހައިން ފަހުމްވާނެއޭ.،" ރައީސް ވިދާޅުވި އެވެ.