އެއާޕޯޓު ފީއާއެކު ޓޫރިޒަމް ޓެކްސްތައް ބޮޑުކުރަން ފާސްކޮށްފި
މި ބަދަލާއެކު އެއާޕޯޓުން ފުރާ މީހުންގެ އަތުން ނަގާ ޓެކްސް ވެސް ބޮޑުވާނެ އެވެ. މި ބަދަލާއެކު ޖުމްލަ އާމްދަނީ 4.9 ބިލިއަން އިތުރުވާނެ ކަމަށް ސަރުކާރުން އަންދާޒާ ކުރެ އެވެ.
އެއާޕޯޓަކުން ބޭރަށް ފުރާ ފަސިންޖަރުންގެ އަތުން ނަގާ ފީ ބޮޑުކުރަން ހުށަހެޅި ބިލާއެކު ޓީޖީއެސްޓީ އަދި ގްރީން ޓެކްސް ދެގުނައަށް ބޮޑު ކުރަން މަޖިލީހުން ފާސްކޮށްފި އެވެ.
ސަރުކާރުން ވަނީ އަންނަ އަހަރު އާމްދަނީ އިތުރު ކުރުމުގެ ގޮތުން ހުށަހެޅި ގޮތަށް މި ބަދަލު ފާސް ކުރުމާއެކު ޓެކްސްތައް ބޮޑުވުމުން ޓޫރިޒަމް ސިނާއަތުގެ ބައެއް ފަރާތްތަކުން ކަންބޮޑުވުން ފާޅުކުރި އެވެ. ނަމަވެސް ސަރުކާރުން ވަނީ މި ބަދަލާއެކު ޓޫރިޒަމް ސިނާއަތަށް ދަތި ނުވާނެ ކަމަށް ބުނެފަ އެވެ.
މި ބަދަލާއެކު ޓެކުހަށް އަންނާނެ ބަދަލު
- ޖުލައި މަހުން ފެށިން ޓީޖީއެސްޓީ 16 ޕަސެންޓުން 17 ޕަސެންޓަށް
- ގެސްޓްހައުސްތަކުން (50 ކޮޓަރިއަށް ވުރެ މަދު) 3 ޑޮލަރުން 6 ޑޮލަރަށް
- ރިސޯޓް ސިޓީ ހޮޓާ އަދި 50 ކޮޓަރި އަށް ވުރެ ގިނަ ޓޫރިސްޓުންނަށް ހިދުމަތް ތަކުން 6 ޑޮލަރުން 12 ޑޮލަަރަށް
ސަރުކާރުން ހުށަހެޅި މި ބިލްތަކަށް ހުށަހަޅާފައިވާ އިސްލާހުތަކަށް މާލިއްޔަތު ކޮމެޓީ އަދި އިގްތިސޯދީ ކޮމެޓީ ގުޅިފައިވާ ސަބްކޮމެޓީން ގެނެސްފައިވަނީ އެންމެ ބަދަލެކެވެ. އެ ބަދަލަކީ އަންނަ އަހަރުގެ ޖޫން މަހުން ފެށިގެން ނަގާ ގޮތަށް ބަދަލު ކުރުމެވެ.
ޓެކުހަށް ގެނައި މި ބަދަލުތަކުގެ އިތުރުން ރާއްޖޭގެ އެއާޕޯޓަކުން ބޭރަށް ފުރާ ފަސިންޖަރުންގެ އަތުން ނަގާފީ ބޮޑުކުރަން ވެސް ވަނީ ނިންމާފަ އެވެ. މި ބަދަލު ގެނެސްފައިވަނީ ސަރުކާރުން ހުށަހެޅި ގޮތަށެވެ.
ފުރާ މީހުންގެ ފީއަށް އަންނާނެ ބަދަލު
- އިކޮނޮމީ ކްލާހުން ފުރާ ބިދޭސީންގެ އަތުން ނަގާ ފީ - 30 ޑޮލަރުން 50 ޑޮލަރަށް
- އިކޮނޮމީ ކްލާހުން ފުރާ ދިވެހިންގެ އަތުން ނަގާ ފީ - ބޮޑެއް ނުކުރާނެ
- ބިޒްނަސް ކްލާހުން ފުރާ މީހުންގެ އަތުން ނަގާ ފީ - 60 ޑޮލަރުން 120 ޑޮލަރަށް
- ފަސްޓް ކްލާހުން ފުރާ މީހުންގެ އަތުން ނަގާ ފީ - 90 ޑޮލަރުން 240 ޑޮލަރަށް
- ޖެޓުގައި ފުރާ މީހުންގެ އަތުން ނަގާ ފީ - 120 ޑޮލަރުން 480 ޑޮލަރަށް
ސަރުކާރުން ވަނީ އަންނަ އަހަރުގެ ބަޖެޓުގައި އާމްދަނީގެ ގޮތުގައި 39.9 ބިލިއަން ރުފިޔާ ލިބޭނެ ކަމަށް އަންދާޒާކޮށްފައިވެ އެވެ. އާމްދަނީ އިތުރު ކުރުމުގެ ފިޔަވަޅުތަކާއެކު 4.9 ބިލިއަން ރުފިޔާ މި އަހަރު ލިބޭނެ ކަމަށް އަންދާޒާކޮށްފައިވެ އެވެ.
ކޮމެންޓް
Republic of Maldives