ޔޫކުރެއިނަށް ޑްރޯނު ފޯރުކޮށްދޭ އެމެރިކާ ކުންފުންޏަކަށް ޗައިނާގެ ދަތިކުރުމުގެ ފިޔަވަޅުތަކުން އަސަރުކޮށްފި

ޔޫކުރެއިނުގެ އަސްކަރިއްޔާއަށް ޑްރޯނު ފޯރުކޮށްދޭ އެމެރިކާގެ އެންމެ ބޮޑު ޓްރޯން އުފައްދާ ކުންފުނި ސްކައިޑިއޯއާ ދެކޮޅަށް ޗައިނާއިން އެޅި ދަތިކުރުމުގެ ފިޔަވަޅުތަކުގެ ސަބަބުން ސަޕްލައި ޗެއިނުގެ މައްސަލަތައް ކުރިމަތިވެ ޑްރޯނު އުފެއްދުމުގައި އެ ކުންފުންޏަށް ބޮޑެތި ދަތިތަކެއް ކުރިމަތިވާން ފަށައިފި އެވެ. 

ޗައިނާއިން އެޅި ދަތިކުރުމުގެ ފިޔަވަޅުތަކުގެ ތެރޭގައި މުހިއްމު ކޮމްޕޯނެންޓުތައް ނުވަތަ ބައިތައް އެ ކުންފުންޏަށް ވިއްކުން މަނާކުރުން ހިމެނެ އެވެ. ނަތީޖާއެއްގެ ގޮތުން ސްކައިޑިއޯއިން އަންނަނީ ޗައިނާ ކުންފުނިތަކުން ފޯރުކޮށްދެމުން އައި ބައިތައް އެހެން ގޮތްގޮތުން ލިބޭތޯ މަސައްކަތްކުރަމުންނެވެ. އެގޮތުން އެ ކުންފުންޏަށް ބޭނުންވާ ހުރިހާ ބެޓަރިއެއް މީގެ ކުރިން ގަންނަމުން އައީ ޗައިނާ ކުންފުންޏަކުން ނަމަވެސް ބެޓަރި އެހެން ދިމާލަކުން ލިބޭތޯ އެ ކުންފުނިން މިހާރު އަންނަނީ މަސައްކަތްކުރަމުންނެވެ. 

އަދި މިހާރު ދިމާވެފައިވާ ދަތިތަކުން އަރައިގަތުމުގައި އެމެރިކާ ސަރުކާރުގެ އެހީތެރިކަމަށް އެ ކުންފުނިން އެދިފައިވެ އެވެ. އެ ކުންފުނީގެ ސީއީއޯ އެޑަމް ބަރައިވަނީ ފާއިތުވި ހަފުތާގައި އެމެރިކާގެ ޑެޕިއުޓީ ސެކްރެޓަރީ އޮފް ސްޓޭޓް ކާޓް ކޭމްޕްބެލްއާ ބައްދަލުކުރައްވައިފަ އެވެ. އަދި ވައިޓްހައުސްގެ އިސް މަސްއޫލުވެރިންނާއެކު މަޝްވަރާކުރައްވައިފަ އެވެ. 

އެމެރިކާގެ ސަޕްލައި ޗެއިންތަކަށް ޗައިނާއިން ލޮޅުން އަރުވައިލާ ޖާސޫސީ މައުލޫމާތު އެއްކުރުމުގައި ޔޫކުރެއިން އަސްކަރިއްޔާއަށް ނުހަނު މުހިއްމު ޑްރޯން ޓެކްނޮލޮޖީ ފޯރުކޮށްދިނުމަށް ޗައިނާއިން ދަތިކުރަމުންދާތީ އެމެރިކާގެ މަސްއޫލުވެރިން ތިއްބެވީ ކަންބޮޑުވެވަޑައިގެންނެވެ. 

ފައިނޭންޝަލް ޓައިމްސްއަށް ލިބިފައިވާ ނޯޓެއްގައި ބްރައި ވިދާޅުވެފައިވަނީ މިއީ ޑްރޯން ސިނާއަތަށް ކަންކަން ސާފުވެގެންދާ ހިނދުކޮޅެއް ކަމަށެވެ. އަދި ސަޕްލައި ޗެއިން ހަތިޔާރެއްގެ ގޮތުގައި ބޭނުންކޮށްގެން އެ ގައުމުގެ މަސްލަހަތުތައް ޗައިނާއިން ކުރިއަރުވާނެކަމާމެދު ކުރިން އެއްވެސް ޝައްކެއް އޮތްނަމަ މިހާރު އެ ޝައްކުތައް ފިލައިފި ކަމަށް އެ ނޯޓުގައި ވިދާޅުވި އެވެ. 

"މިއީ އެމެރިކާގެ އެންމެ ބޮޑު ޑްރޯން ކުންފުނި ވާދަވެރިކަމުން ބޭރުކޮށްލައި، ޗައިނާގެ ޑްރޯން ކުންފުނިތަކުގެ މައްޗަަށް ދުނިޔެ ބަރޯސާވާ މިންވަރު އިތުރުކުރަން ރާވައިގެން އަޅާފައިވާ ފިޔަވަޅެއް،" ބަރައި ވިދާޅުވި އެވެ. 

އޮކްޓޯބަރު 11 ވަނަ ދުވަހު ޗައިނާއިން އެޅި ދަތިކުރުމުގެ ފިޔަވަޅުތައް އެމެރިކާގެ ވަރަށް ގިނަ ކުންފުނިތަކަށް އަމާޒުކޮށްފައިވެ އެވެ. އެ ފިޔަވަޅު އެޅީ އެމެރިކާއިން ޓައިވާނަށް އަސްކަރީ ޑްރޯނު ފޯރުކޮށްދިނުމަށް ނިންމުމާ ގުޅިގެންނެވެ. 

ސްކައިޑިއޯއިން އަންނަނީ ބަދީލުތައް (އަލްޓާނޭޓިވްސް) ހޯދުމަށް ޓައިވާނާއި އެހެނިހެން އޭޝިޔާ ގައުމުތަކުގެ ސަޕްލަޔަަރުންނާ މަޝްވަރާކުރަމުންނެވެ. އަދި އެމެރިކާ ސަރުކާރުން އޭޝިޔާގެ އެކުވެރި ގައުމުތަކާ މުވާސަލާތުކޮށް ސްކައިޑިއޯއަށް އެހީތެރިވެވޭނެ ގޮތްތައް ހޯދުމަށް މަސައްކަތްކުރަމުން އަންނަކަމަށް މިކަމުގެ މައުލޫމާތު ލިބިފައިވާ ފަރާތަކާ ހަވާލާދީ ފައިނޭންޝަލް ޓައިމްސް ނޫހުން ރިޕޯޓުކޮށްފައިވެ އެވެ. 

ސެން-މަޓޭއޯގައި މަރުކަޒުވެފައިވާ ސްކައިޑިއޯ ކުންފުނިންވަނީ 1،000 އަށްވުރެ ގިނަ ޑްރޯން ޔޫކުރެއިނަށް ފޯރުކޮށްދީފަ އެވެ. މި ޑްރޯނުތައް މައިގަނޑު ގޮތެއްގައި ބޭނުންކުރަމުންދަނީ ހަނގުރާމައަށް ބޭނުންވާ ޖާސޫސީ މައުލޫމާތު އެއްކުރުމަށެވެ. އަދި ރަޝިޔާއިން ހިންގާކަމަށް ތުހުމަތުވާ ހަނގުރާމައިގެ ކުށްތައް ރެކޯޑުކުރުމަށްވެސް އެ ޑްރޯނުތައް އަންނަނީ ބޭނުންކުރަމުންނެވެ.