ޝަހުމްގެ ޝަރީއަތް ފަށައިފި، ފެށުން ލަސްވީ އޭނާ ފިހިގެން

ސ. ހިތަދޫ ވަރުދީގެ، އަހުސަން ބަޝީރު މަރާލި މައްސަލާގައި ގ. ކޯޒީ އިބްރާހިމް ޝަހުމްގެ މައްޗަށް ކުށް ސާބިތުވެ، އޭނާ މަރަން ހައިކޯޓުން ކުރި ހުކުމް ކަށަވަރު ކުރަން ދައުލަތުން ސުޕްރީމް ކޯޓަށް ހުށަހެޅި މައްސަލަ ދެ އަހަރު ފަހުން މިއަދު ފަށައިފި އެވެ.

ތޫނު އެއްޗަކުން އަހްސަންގެ ކަރަށް ހަމަލާދީ މަރާލީ މަޖީދީމަގާއި އަލިކިލެގެފާނު މަގު ގުޅުނު ހިސާބުން އޭނާ ހިނގާފައި ދަނިކޮށް މާޗް 16، 2011 ވަނަ އަހަރު އެވެ. އަހްސަނަށް ހަމަލާދިނުމުން އޭނާ މަރުވީ ހޮސްޕިޓަލަށް ގެންދިޔަ ފަހުން އެރޭ މެންދަމު 3:30 ހާއިރު އެވެ.

އަހުސަން މަރާލި މައްސަލާގައި ދައުލަތުން ޝަހުމްގެ މައްޗަށް އުފުލީ ގަސްދުގައި މީހަކު މަރާލުމުގެ ދައުވާ އެވެ. ދައުވާ ސާބިތުވެ، ޝަހުމް މަރަން ހުކުމް ކޮށްފައި ވަނީ ހައިކޯޓުންނެވެ. ޝަހުމް މަރަން ކުރި ހުކުމް ކަށަވަރުކުރަން ދައުލަތުގެ ފަރާތުން ސުޕްރީމް ކޯޓަށް ހުށަހެޅީ 2022 ވަނަ އަހަރުގެ ސެޕްޓެމްބަރު ކުރީ ކޮޅެވެ. އެ މައްސަލައިގެ ފުރަތަމަ އަޑުއެހުން މިއަދު ވަނީ ސުޕްރީމް ކޯޓުގައި ބާއްވާފަ އެވެ.

ޝަރީއަތް ފައްޓަވަމުން ފަނޑިޔާރުންގެ ބެންޗުގެ ރިޔާސަތުގައި އިންނެވި ފަނޑިޔާރު ޑރ. މުހައްމަދު އިބްރާހީމް ވަނީ މައްސަލަ ތާވަލުނުކުރެވި ލަސްވި ސަބަބުތައް ވިދާޅުވެދެއްވާފަ އެވެ. އެގޮތުން އެއް ކަމަކަށް ފަނޑިޔާރު ވިދާޅުވީ ޝަހުމް ފިހިގެން އޭނާ ބަލިވެ އުޅޭތީ ޝަރީއަތް ފަސްކޮށްދޭން އެދިފައިވާ ކަމަށެވެ. އަދި، ޝަހުމްގެ އާއިލާގެ ފަރާތުން އަމިއްލަ ވަކީލަކު ހަމަޖައްސަން ވަގުތު ނަގާފައި ވާތީ ވެސް މައްސަލަ ތާވަލުނުކުރެވި ލަސްވެފައިވާ ކަމަށެވެ.

މިއަދުގެ އަޑުއެހުމުގައި ދައުލަތުން ވަނީ ވަރަށް ދިގުކޮށް އިސްތިއުނާފީ ނުކުތާތައް ވިދާޅުވެ ދެއްވާފަ އެވެ. އެ ނުކުތާތަކަށް ޝަހުމްގެ ފަރާތުން ރައްދު ދޭނީ ދެން އޮންނަ އަޑުއެހުމެއްގައި ކަމަށް ރިޔާސަތުން ވަނީ ވިދާޅުވެފަ އެވެ.

ޝަހުމްގެ އިތުރުން އަހުސަން މަރާލި މައްސަލައިގައި މއ. ވީނަސްތަރި، ހަސަން ޝިމާޒުގެ މައްޗަށް ގަސްދުގައި މީހަކު މަރާލުމުގައި ބައިވެރިވުމުގެ ކުށުގެ ދައުވާ އުފުލާފައިވެ އެވެ. އެކަމަކު އެ ދެ މީހުންގެ މައްޗަށް ވެސް ކުށް ސާބިތު ނުވާ ކަމަށް 2014 ވަނަ އަހަރު ކްރިމިނަލް ކޯޓުން ވަނީ ހުކުމް ކޮށްފަ އެވެ.

އެމީހުންގެ މައްޗަށް ކުށް ސާބިތު ނުވާ ކަމަށް ކްރިމިނަލް ކޯޓުން ކުރި ހުކުމް ބާތިލުކޮށް، ދެ މީހުންގެ މައްޗަށް ކުށް ސާބިތުވާ ކަމަށް ހައިކޯޓުން ވަނީ ކަނޑައަޅާފަ އެވެ. ހައިކޯޓުން ޝަހުމް މަރަން ހުކުމް ކުރިއިރު، ޝިމާޒުގެ މައްޗަށް ކުރީ 15 އަހަރުގެ ޖަލު ހުކުމެކެވެ.

އަހްސަން މެރުމުގެ ކުށް ސާބިތުވެފައި ވަނީ މި މައްސަލަ ސާބިތުކުރުމުގައި އަހްސަން މަރު މަތީގައި ބުނި ބަހުގެ މައްޗަށެވެ. އެގޮތުން ހޮސްޕިޓަލްގައި މަރުމަތީގައި އޮވެގެން ޝަހްމު ހަމަލާ ދިން ކަމަށް އަހްސަން ބުނި ކަމަށް ބުނެ ބައެއް މީހުން ހެކިބަސް ދީފައިވެ އެވެ.