އަންނަ އަހަރަށް ގާތްގަނޑަކަށް 64 ބިލިއަން ރުފިޔާގެ ބަޖެޓެއް

އަންނަ އަހަރަށް ލަފާކޮށް ގާތްގަނޑަކަށް 64 ބިލިއަން ރުފިޔާގެ ބަޖެޓެއް ހުށަހަަޅަން ފިނޭންސް މިނިސްޓްރީން ތައްޔާރު ވެއްޖެ އެވެ. 

އަންނަ އަހަރަށް ލަފާކޮށް ހުށަހަޅާ ބަޖެޓުގެ މައުލޫމާތު ފިނޭންސުން ރަސްމީކޮށް މިހާތަނަށް އާއްމުކޮށްފައެއް ނުވެ އެވެ. 

އަންނަ އަހަރުގެ ބަޖެޓުގެ މައުލޫމާތު މާދަމާ ފިނޭންސް މިނިސްޓަރު މޫސާ ޒަމީރު ރައްޔިތުން މަޖިލީހަށް ހުށަހަޅުއްވާނެ އެވެ. 
ނަމަވެސް "މިރާ" އަށް އެނގިފައިވާ ގޮތުގައި އަންނަ އަހަރުގެ ބަޖެޓު ސައިޒަކީ 64 ބިލިއަން ރުފިޔާ އެވެ.  

ފިނޭންސުން އާއްމު ކުރި ފިސްކަލް ސްޓްރެޓަކީ ރިޕޯޓުގައިވާ ގައި ވެސް ވަނީ މި އަދަދަށް އަންނަ އަހަރުގެ ބަޖެޓު އެރުން ގާތް ކަމަށް އަންދާޒާކޮށްފަ އެވެ. އަންނަ އަހަރު ބަޖެޓު 63.9 ބިލިއަން ރުފިޔާގައި ހުންނާނެ ކަމަށް އެ ރިޕޯޓުގައި އަންދާޒާކޮށްފައިވެ އެވެ. އަދި ހަރަދު ހުންނާނެ ކަމަށް ފިސްކަލް ރިޕޯޓުގައި ވަނީ 57 ބިލިއަން ރުފިޔާގަ އެވެ. މެދުރާސްތާގައި ހަރަދު އިތުރުވާނެ ކަމަށް ބެލެވެނީ 1.8 ޕަސެންޓެވެ. 

މެދުރާސްތާގައި އަންނަ އަހަރު ލިބޭނެ ކަމަށް އަންދާޒާކޮށްފައިވަނީ 41 ބިލިއަން ރުފިޔާގެ އާމްދަނީ އެކެވެ. އަދި ބޭސްލައިން އާމްދަނީއަކީ 35 ބިލިއަން ރުފިޔާ އެވެ. މީގެ އިތުރުން ޓެކްސް ނޫން ގޮތްގޮތުން ލިބޭނެ ކަމަށް އަންދާޒާ ކުރެވެނީ 7.8 ބިލިއަން ރުފިޔާ އެވެ. 

މިއަހަރަށް ފާސްކޮށްފައި ވަނީ 49.8 ބިލިއަން ރުފިޔާގެ ބަޖެޓެކެވެ. ނަމަވެސް މިދިޔަ ބުރާސަފަތި ދުވަހު ފިނޭންސް މިނިސްޓްރީން ވަނީ 5.1 ބިލިއަން ރުފިޔާގެ ސަޕްލިމެންޓްރީ ބަޖެޓެއް މަޖިލީހަށް ހުށަހަޅާފަ އެވެ.