އަލީ ހަމީދުގެ ކުންފުންޏަށް 44 މިލިޔަން ދިން މައްސަލަ ފުލުހަށް ހުށަހަޅަނީ

ރައްޔިތުންގެ މަޖިލީހުގެ އިސްދޫ ދާއިރާގެ ކުރީގެ މެންބަރު އަލީ ހަމީދުގެ ނޯތު ކޯސްޓް ކޮންސްޓްރަކްޝަނަށް ނިމިދިޔަ އެމްޑީޕީ ސަރުކާރުން 44 މިލިއަން ރުފިޔާގެ އެޑްވާންސެއް ދިނުމަށްފަހު, އެއްވެސް މަސައްކަތެއް ނުކުރި މައްސަލަ މާލިއްޔަތު ކޮމެޓީން ފުލުހަށް ހުށަހަޅަން މިއަދު ފާސްކޮށްފި އެވެ.

މިއީ އާސަންދައިން ހޮސްޕިޓަލެއް އެޅުމަށް އެކުންފުންޏާއެކު ހެދި އެއްބަސްވުމެކެވެ. ނަމަވެސް އޭރު އާސަންދައިގެ މާލީ ހާލަތު ހުރި ގޮތުން މަޝްރޫއު މަޑުޖައްސައިލީ އެވެ. 

އާސަންދައިގެ ހޮސްޕިޓަލެއް އެޅުމަށް ފުރަތަމަ އަލީ ހަމީދުގެ ނޯތު ކޯސްޓް ކޮންސްޓްރަކްޝަނާއެކު އާސައިންދައިން އެއްބަސްވުން ހެދީ 2016 ވަނަ އަހަރު އެވެ. ހަ ބުރީގެ އެ ހޮސްޕިޓަލު އެޅުމަށް ދެ ކުންފުނީގެ މެދުގައި އެއްބަސްވީ 61 މިލިއަން ރުފިޔާ އަށެވެ. ނަމަވެސް އޭގެ އަނެއް އަހަރު މަޝްރޫއު މަޑުޖައްސައިލީ އެވެ.

ފަހުން އެމްޑީޕީ ސަރުކާރުގައި ނޯތު ކޯސްޓުގެ ފަރާތުން ސެޓްލްމެންޓް ކޮމެޓީއަށް ބަދަލު ހޯދަން އެދުމުން، ރައީސް އޮފީހުން ވަނީ އަލުން އެ ކުންފުންޏާ އެ މަސައްކަތް ހަވާލުކޮށްފަ އެވެ. ދެވަނަ ފަހަރު އެ މަސައްކަތް ހަވާލުކުރީ 147 މިލިއަން ރުފިޔާ އަށެވެ. އެ މަޝްރޫއުގެ އެޑްވާންސް ޕޭމެންޓުގެ ގޮތުގައި 2023 ވަނަ އަހަރު އާސަންދައިން ވަނީ ދެ ފަހަރެއްގެ މަތިން 44 މިލިއަން ރުފިޔާ އެ ކުންފުންޏަށް ދީފަ އެވެ. 

މަޖިލީހުގެ މާލިއްޔަތު ކޮމެޓީން ވަނީ އެ މަޝްރޫއުގެ ތަފްސީލު ހޯދަން އާސަންދައިގައި އެދިފަ އެވެ. އާސަންދައިން ކޮމެޓީއަށް ފޮނުވި ސިޓީގައި ބުނެފައި ވަނީ، މަޝްރޫއުގެ މަސައްކަތް މަޑުޖެހިފައި އޮންނާތީ ނޯތު ކޯސްޓާއެކު އެތައް ފަހަރެއްގެ މަތިން ބައްދަލުކޮށް މަޝްވަރާކޮށްފައިވާ ކަމަށާއި ނަމަވެސް، މަސައްކަތް ކުރިއަށް ނުދާ ކަމަށެވެ.

ކޮމެޓީގެ މިއަދުގެ ބައްދަލުވުމުގައި އެ މައްސަލަ ފުލުހަށް ހުށަހަޅަން ހުށަހެޅުއްވީ ދިއްގަރު ދާއިރާގެ މެންބަރު އަހުމަދު ނާޒިމެވެ. ކޮމެޓީގެ އަޣުލަބިއްޔަތުން އެ ހުށަހެޅުން ވަނީ ފާސްވެފަ އެވެ.