"ޔާމީން ވަގަށް ނަގާފައި ހުރި ފައިސާ ދީފިނަމަ އިތުރު ލޯނެއް ނަގާކަށް ނުޖެހޭނެ"

ކުރީގެ ރައީސް އަބްދުﷲ ޔާމީން ވެރިކަން ކުރެއްވިއިރު ވަގަށް ނަގާފައިވާ ފައިސާ ދައުލަތާ ހަވާލުކޮށްފިނަމަ، އިތުރު ލޯނެއް ނުނަގައި ގައުމުގެ ކަންކަން ހަމަޖެހިގެން ދާނެ ކަމަށް އިނގުރައިދޫ ދާއިރާގެ މެންބަރު އަދި ޕީއެންސީގެ ޕީޖީ ލީޑަރު އިބްރާހިމް ފަލާހު ވިދާޅުވެއްޖެ އެވެ.

އޭސީސީގެ ރައީސަކީ ރައްޔިތުންގެ މަޖިލީހުގެ ރުހުމާއެކު ރައީސުލްޖުމްހޫރިއްޔާ އައްޔަންކުރައްވާ މަގާމެއް ކަމަށް ކަނޑައަޅަން ސަރުކާރުގެ ފަރާތުން ހުށަހަޅާފައިވާ ބިލަށް މިއަދު ބަހުސް ކުރައްވަމުން ފަލާހު ވިދާޅުވީ، އެ ބިލާ ދެކޮޅަށް އިދިކޮޅު ފަރާތްތަކުން ވާހަކަ ދައްކަމުން ދަނީ އެ ފަރާތްތަކުގެ ވެރިކަންތަކުގައި ކޮށްފައި ހުރި ވައްކަންތައް ފަޅާއަރައިފާނެތީ ކަމަށެވެ. ފަލާހު އިޝާރާތް ކުރެއްވީ ނިމިދިޔަ އެމްޑީޕީ އަދި ކުރީގެ ރައީސް ޔާމީންގެ ސަރުކާރަށެވެ.

ފަލާހު ވިދާޅުވީ ގައުމު އިގްތިސޯދީ ގޮތުން އުނދަގޫ ހާލަތަކަށް މިއަދު ގޮސްފައި މިވަނީ ކުރީ ސަރުކާރުތަކުން އަމަލުކޮށްފައިވާ ގޮތުން ކަމަށެވެ. ކުރީ ސަރުކާރުތަކުގެ ތެރެއިން ފަލާހު އެންމެ ބޮޑަށް ފާޑުވިދާޅުވީ ރައީސް ޔާމީންގެ ވެރިކަމަށެވެ. 

"10،000 ރުފިޔާއަށް ހިންގަން ޖެހޭ ޕްރޮޖެކްޓެއް، އޭރުގަ ހުރި ވެރިމީހާ [ރައީސް ޔާމީން] ޖީބަށް ލާން 10 ލާފަ ޕްރޮޖެކްޓަށް 10 ލީމަ 20 ވާނެ. އެކަންކަން ފެންނަން އެބަހުރި އިއްޒަތްތެރި ރައީސް، ރައީސް ޔާމީން ހާއްސަކޮށް ފާހަގަކޮށްލެވޭ،" ފަލާހު ވިދާޅުވި އެވެ.

އޭނާ ވިދާޅުވީ ވަރަށް ޅަ އުމުރުގައި ސަރުކާރަށް ހިދުމަތް ކުރައްވަން ރައީސް ޔާމީން ފެއްޓެވި ނަމަވެސް ސަރުކާރުގައި ވަޒީފާއެއް އަދާކޮށްގެން މިއަދު އުޅުއްވާ މުއްސަނދި ދިރިއުޅުން ނޫޅެވޭނެ ކަމަށެވެ. އެމަނިކުފާނު ހިންގަވާ ވިޔަފާރިއެއް ރަޖިސްޓްރީކޮށްފައި ނެތް އިރު މީރާއަށް ޓެކްސްއެއް ވެސް ނުދައްކާ ކަމަށެވެ.

"އެހެންނަމަވެސް އަޅުގަނޑުމެން ލޯ ކުރިމައްޗަށް އެބަ ފެނޭ އެމަނިކުފާނު ކުރައްވާހާ ވިޔަފާރި. އެހެރެ އަރަނީ 4000 އަކަފޫޓުގެ ގެއެއް 15 ބުރިޔަށް. މި ޕާކު ކުރިމަތީގަ އެ ހަދަނީ. ބައެއް މީހުން އެގެއަށް ވޮޑުމުލާ ވެސް ކިޔާ. އަނެއްބައި މީހުން އެހެން ނަންވެސް ކިޔާ. އަޅުގަނޑުމެން ވެސް މިއުޅެނީ އެ ސަރުކާރުގެ ކިބައިން ސަލާމާތް ނުވެގެން. މަގުމަތިން ވެސް ދުއްވެނީކީ ނޫން. އަޅުގަނޑުމެންނަކަށް އެއްޗެއް ލިބުނީކީއެއް ނޫން. ވަގަށް އަޅުގަނޑުމެން ނެގި އެއްޗެއް ފެނުނީއެއް ނޫން،" ފަލާހު ވިދާޅުވި އެވެ.

ރައީސް ޔާމީން ރާއްޖޭގައި އަދި ރާއްޖޭން ބޭރުގައި ހުޅުވާފައި ހުރި އެކައުންޓްތަކުގައި ވަރަށް ފައިސާ އެބަހުރި ކަމަށާއި އަދި ގެކޮޅުގައި ވެސް އެވަރަށް ފައިސާ ހުންނާނެ ކަމަށް ފަލާހު ތުހުމަތު ކުރެއްވި އެވެ. އޭނާ ވިދާޅުވީ އެއްގޮތަކަށް ވެސް މިއުޅެނީ އޭސީސީއަށް ރައީސުލްޖުމްހޫރިއްޔާ ބޭފުޅުން އައްޔަނު ކޮށްފާނެތީ ނޫން ކަމަށާއި، މިއުޅެނީ ވައްކަން ކޮށްގެން ހޯދާފައި ހުރި ފައިސާ ދައުލަތަށް ނަގައިފާނެތީ ކަމަށެވެ.

"އެމްޑީޕީން މި ދައްކާ ވާހަކަތަކަކީ އެމްޑީޕީން އެކަނި ވިސްނުމަކަށް ނޫން އެވާހަކަ ދައްކަނީ. ރޭގަ އެބޭފުޅުން، ރައީސް ޔާމީނާ އަދި އެމްޑީޕީގަ ވެސް ވައްކަންކޮށްފަ ތިބި ބޭފުޅުން، އެބޭފުޅުންނަށް ލައިދީފަ ހުންނާނީ މިއަދު ވާހަކަ ގެންނަވާނީ މިހެންނޭ، މިކަން ކޮށްފިއްޔާ ވަގަށް ނަގާފަ ހުރި ލާރިކޮޅު ފަހަރެއްގަ މިތަންތަނުން ނަގައިގެން ގެންގޮސްފާނެއޭ،" ފަލާހު ވިދާޅުވި އެވެ.

ފަލާހު ވިދާޅުވީ އެމްޑީޕީ ސަރުކާރުގައި އޭނާ އަދި އިތުރު ފަރާތްތައް ވައްކަމުގެ މައްސަލަތަކުގައި "ބައްދާލަން" މަސައްކަތް ކޮށްފައިވާ ކަމަށެވެ. ނަމަވެސް ނުކުރާ ކަމެއްގެ ތުހުމަތު ނޭޅުވޭނެ ކަމަށާއި ދެން ވެސް އުޅުއްވާނީ ވައްކަން ކޮށްގެން ނޫން ކަމަށެވެ. އަދުގެ ރައީސުލްޖުމްހޫރިއްޔާއަކީ ވެސް ވައްކަން ކުރައްވާނެ ބޭފުޅެއް ނޫން ކަމަށް އޭނާ ތަކުރާރުކޮށް ވިދާޅުވި އެވެ.