"ރައްޔިތުން އޭސީސީއަށް އިތުބާރެއް ނުކުރޭ، ނަތީޖާއެއް ނުނެރެދޭ"
ނާޒިމް ވިދާޅުވީ ރާއްޖޭގައި ކޮރަޕްޝަންގެ ކަންކަން އިސްލާހުވަމުން އަންނަތަން ނުފެންނަ ކަމަށެވެ. އެއްވެސް ހައްދެއް، ހުދޫދެއް ނެތި ކޮރަޕްޝަންގެ އަމަލުރައް ހިންގާއިރު އޭސީސީއަށް ކުރެވޭ ހަމަ އެއް ކަމެއް ވެސް ނެތް ކަމަށެވެ.
އެންޓި ކޮރަޕްޝަން ކޮމިޝަން (އޭސީސީ) ހިނގަންވާ ގޮތަށް ނުހިނގާ ކަމަށާއި، އެތަނުގައި ކޮރަޕްޝަންގެ މައްސަލަތައް ހައްލު ކުރެވޭވަރުގެ ބަޔަކު ނެތް ކަމަށް ރައްޔިތުންގެ މަޖިލީހުގެ ނައިބް ރައީސް އަހުމަދު ނާޒިމް ވިދާޅުވެއްޖެ އެވެ.
އޭސީސީގެ ރައީސަކީ ރައްޔިތުންގެ މަޖިލީހުގެ ރުހުމާއެކު ރައީސުލްޖުމްހޫރިއްޔާ އައްޔަންކުރައްވާ މަގާމެއް ކަމަށް ކަނޑައަޅަން ސަރުކާރުގެ ފަރާތުން ހުށަހަޅާފައިވާ ބިލަށް މިއަދު ބަހުސް ކުރައްވަމުން ނާޒިމް ވިދާޅުވީ ރާއްޖޭގައި ބޮޑެތި ކޮރަޕްޝަންގެ އަމަލުތައް ހިންގާއިރު އޭސީސީއަށް އެ މައްސަލަތައް ނުބެލޭ ކަމަށެވެ. އަދި، އޭސީސީ ތެރޭގައި ވެސް އޮތީ ކޮރަޕްޝަން ކަމަށާއި، ސަރުކާރަށް ރައްޔިތުން ސުޕަ މެޖޯރިޓީ ދިނީ މިފަދަ ކަންކަން ރަގަޅު ކުރުމަށް ކަމަށް ނާޒިމް ވިދާޅުވި އެވެ.
ސަރުކާރުން ހުށަހަޅާފައިވާ ބިލަށް އިދިކޮޅު އެމްޑީޕީން ދެކޮޅު ހަދާތީ، އެކަމަށް ވެސް އޭނާ ވަނީ ވަރަށް ބޮޑަށް ފާޑުވިދާޅުވެފަ އެވެ. ނާޒިމް ވިދާޅުވީ، ކުރީ ސަރުކާރުން ހަމަ އެގޮތަށް ސިވިލް ސާވިސް ކޮމިޝަންގެ ރައީސް، ރައީސުލްޖުމްހޫރިއްޔާ އައްޔަނު ކުރައްވާ ބޭފުޅެއްގެ ގޮތަށް ހެދުމަށް ގާނޫނު ބަދަލުކޮށްފައިވާ ކަމަށެވެ. އެ ކޮމިޝަނަކީ 27،000 މުވައްޒަފުން ބަލަހައްޓާ ތަނެއް ކަމަށާއި، ކޮމިޝަންގެ ރައީސަކީ ޖުޑިޝަލް ސާވިސް ކޮމިޝަން (ޖޭއެސްސީ) އަށް ވެސް އައްޔަނު ކުރެވޭ ބޭފުޅެއް ކަމަށެވެ.
"އެހެންވީމަ ސިވިލް ސާވިސް ކޮމިޝަނުގެ ރައީސް އެ މަގާމަށް ބޭނުންވީމާ އައްޔަނުކޮށް، ޖުޑިޝަލް ސާވިސް ކޮމިޝަނަށް އެބޭފުޅަކު ފޮނުވާ، އެބޭފުޅާ ބޭނުންވާ ގޮތަކަށް ކަންތައް ކުރެއްވުމަށް ގާނޫނު ބަދަލުކުރެއްވީމާ، މި ސަރުކާރުން އެންޓި ކޮރަޕްޝަން ކޮމިޝަންގެ ރައީސް މިގޮތަށް ބަދަލުކުރުމަކީ އަޅުގަނޑު ގަބޫލުކުރާ ގޮތުގައި ފާޑުކިޔެން އޮތް ކަމެއް ނޫން،" ނާޒިމް ވިދާޅުވި އެވެ.
ކުރީ ސަރުކާރުން މަގާމުތަކަށް ނަގާފައި ތިބީ ޕްރޮފެޝަނަލް ބޭފުޅުން ނޫން ކަމަށް ތުހުމަތު ކުރައްވައި ނާޒިމް ވިދާޅުވީ، އެ ސަރުކާރުގައި އިލެކްޝަން ކޮމިޝަންގެ ރައީސް ދުއާދު ތައުފީގު އެކަހެރިކުރައްވައި ކޮމިޝަންގެ ތިން މެންބަރަކު އެތަން ހައިޖެކް ކުރެއްވި ކަމަށެވެ.
"އެމްޑީޕީގެ ފަރާތުން ކޮމިޝަންތަކަށް ނަން ފޮނުވައިގެން ލާފަ ތިބި ބޭފުޅުންނަކީ ޕްރޮފެޝަނަލް ބޭފުޅުން ނޫން ކަމަށް ދެންނެވީ މިދެންނެވި ގޮތަށް ކަންކަން ކޮށްފަ އޮތީމަ،" ނާޒިމް ވިދާޅުވި އެވެ.
ނާޒިމް ވިދާޅުވީ ރާއްޖޭގައި ކޮރަޕްޝަންގެ ކަންކަން އިސްލާހުވަމުން އަންނަތަން ނުފެންނަ ކަމަށެވެ. އެއްވެސް ހައްދެއް، ހުދޫދެއް ނެތި ކޮރަޕްޝަންގެ އަމަލުރައް ހިންގާއިރު އޭސީސީއަށް ކުރެވޭ ހަމަ އެއް ކަމެއް ވެސް ނެތް ކަމަށެވެ. އެހެންކަމުން އެ ބިލަށް އޭނާ ތާއީދު ކުރައްވާ ކަމަށް ވިދާޅުވި އެވެ.
ކޮމެންޓް
Republic of Maldives