މި އަހަރުގެ ބަޖެޓުގައި 39 ބިލިއަންގެ މަޝްރޫއު ހިންގުމަށް އޮތީ 3.6 ބިލިއަން

ފާއިތުވި އަހަރު ސަރުކާރު ބަދަލުވިއިރު ޖުމްލަ 39 ބިލިއަން ރުފިޔާގެ މަޝްރޫއު ކޮންޓްރެކްޓުކޮށްފައިވާއިރު އެމްޑީޕީ ސަރުކާރުން އެކުލަވައިލާ އެ ޕާޓީގެ އަޣުލަބިއްޔަތު އޮތް 19 ވަނަ މަޖިލީހުން ފާސްކުރި 2024 ގެ ބަޖެޓުގައި އެ މަޝްރޫއުތައް ހިންގުމަށް ހިމަނާފައިވަނީ އެންމެ 3.6 ބިލިއަން ރުފިޔާކަމަށް ކޮންސްޓްރަކްޝަން މިނިސްޓަރު ޑރ.އަބްދުﷲ މުއްތަލިބު ވިދާޅުވެއްޖެ އެވެ. 

މިއަދު ރައީސް އޮފީހުގައި އޮތް ނޫސްވެރިންގެ ބައްދަލުވުމެއްގައި ވާހަކަދައްކަވަމުން މުއްތަލިބު ވިދާޅުވީ ސަރުކާރު ބަދަލުވިއިރު ކޮންޓްރެކްޓު ސޮއިކުރުމަށްފަހު އެޑްވާންސް ފައިސާވެސް ދޫނުކޮށް މަޝްރޫއުތައް ފެށިގެން ކުރިއަށްދާކަން ދެއްކުމަށް ބައެއް މަސައްކަތްތައް ކުރުމަށްފަހު މަޑުޖައްސާލާފައި ހުރި ގިނަ އަދަދެއްގެ މަޝްރޫއު ހުރި ކަމަށެވެ. 

ސަރުކާރު ބަދަލުވިއިރު އެކި ކުންފުނިތަކާއެކު ކޮންތްރެކްޓު ކުރެވިފައިވާ ހުރިހާ މަޝްރޫއެއްގެ އަގަކީ 39 ބިލިއަން ރުފިޔާ ކަމަށާއި، އެގޮތަށް ކޮންޓްރެކްޓު ކުރެވިފައި ހުރި މަޝްރޫއުތަކުގެ އަދަދަކީ 322 ކަމަށް މުއްތަލިބު ވިދާޅުވި އެވެ. 

އެ 322 މަޝްރޫއުގެ ތެރެއިން 242 މަޝްރޫއަކީ ހިނގަމުން އައި މަޝްރޫއުތަކެވެ. އަދި 80 މަޝްރޫއަކީ އެއްބަސްވުމުގައި ސޮއިކުރެވި މަސައްކަތް ނުފެށި ހުރި މަޝްރޫއުތަކެވެ. އެމްޓީސީސީއާއި އާރްޑީސީއާއެކު ސޮއިކޮށްފައިވާ 190 މަޝްރޫއުގެ ތެރެއިން 63 މަޝްރޫއު ފެށުމަށް މޯބަލައިޒްވެސް ކުރެވިފައިނުވެ އެވެ. 

މިނިސްޓަރު ފާހަގަކުރެއްވި ގޮތުގައި މި 322 މަޝްރޫއު ހިންގުމަށް މި އަހަރުގެ ބަޖެޓުގައި ހިމަނާފައި އޮތީ އެންމެ 3.6 ބިލިއަން ރުފިޔާ އެވެ. މި ފައިސާއަކީ 2024 ވަނަ އަހަރު މަޝްރޫއުތައް ހިންގުމަށް ބޭނުންވާ ފައިސާގެ %15 އަދި %20 އާ ދެމެދުގެ އަދަދެެއްކަމުގައި މިނިސްޓަރު ވިދާޅުވި އެވެ. 

ގާނޫނީ ގޮތުން ހަރަދުކުރެވެނީ ބަޖެޓުގައި ހުރި އަދަދުތަކުގެ އިމުގެ ތެރޭގައިކަން ފާހަގަކުރައްވަމުން މުއްތަލިބު ވިދާޅުވީ މަޝްރޫއުތައް އެކަށީގެންވާ ގޮތުގައި ނުހިންގުނު އެންމެ ބޮޑު ސަބަބަކީ މަޝްރޫއުތައް ހިންގުމަށް ބަޖެޓުގައި ބައިކުޅަ ބައި ޖަހާފައި ހުރުން ކަމަށެވެ. 

މި އަހަރުގެ ބަޖެޓުގައި އައު އެތައް ސަތޭކަ މަޝްރޫއެއް ފެށުމަށް ހިމެނި ނަމަވެސް ބަޖެޓުގައި އައު މަޝްރޫއުތައް ފެށުމަށް އޮތީ އެންމެ 966 މިލިއަން ރުފިޔާކަމާއި، ސަރުކާރު ބަދަލުވިއިރު މިނިސްޓްރީ އޮފް ކޮންސްޓްރަކްޝަންގައި ޕެންޑިން ބިލްގެ ގޮތުގައި ބިލިއަނަކަށްވުރެ ގިނަ ރުފިޔާގެ ބިލް ހުރިކަމަށް މުއްތަލިބު ވިދާޅުވި އެވެ.