ސިނގިރޭޓުން ޑިއުޓީ ބޮޑުކޮށްގެން ގެއްލުން ވާނީ ގޭބިސީތަކަށް: އިދިކޮޅު މެންބަރުން

ދުންފަތުގެ ބާވަތްތައް ހާއްސަކޮށް، ސިނގިރޭޓުގެ ޑިއުޓީ ބޮޑުކުރުމުގެ ސަބަބުން ގެއްލުން ވެގެންދާނީ އެބާވަތްތައް ބޭނުންކުރާ ފަރާތްތަކުގެ ގޭބިސީތަކަށް ކަމަށް އިދިކޮޅު ބައެއް މެންބަރުން ވިދާޅުވެއްޖެ އެވެ.

ރައްޔިތުންގެ މަޖިލީހަށް ސަރުކާރުގެ ފަރާތުން ހެންވޭރު އިތުރު ދާއިރާގެ މެންބަރު އަހުމަދު އައިފާން ހުށަހަޅުއްވާފައިވާ ދުންފަތް ކޮންޓްރޯލް ކުރުމާ ބެހޭ ގާނޫނަށް އިސްލާހު ގެނައުމުގެ ބިލަށް މިއަދު ވަނީ ބަހުސްކުރަން ފަށާފަ އެވެ.

މި ބިލަށް ބަހުސްކުރައްވަމުން ހިތަދޫ ދެކުނު ދާއިރާގެ މެންބަރު އިބްރާހިމް ނާޒިލް ވިދާޅުވީ އާންމު ގޮތެއްގައި ދުންފަތުގެ އިސްތިއުމާލު ކުރަނީ ގޭބިސީތަކަށް އާމްދަނީ ވައްދައިދޭ ފަރާތް ކަމަށެވެ. ވޭތުވެދިޔަ މާޒީއަށް އިޝާރާތް ކުރައްވަމުން ނާޒިލް ވިދާޅުވީ އަގަށް ބަދަލު ގެނައިނަމަވެސް، ދުންފަތުގެ އިސްތިއުމާލު ކުރާ މީހާ އެކަން ހުއްޓާލާނެ ކަމަށް ނުބެލެވޭ ކަމަށެވެ. އަދި އިތުރު އާމްދަނީއެއް ހޯދަން މަސައްކަތް ވެސް ނުކުރާ ކަމަށެވެ.

"ކުއްލި ގޮތަކަށް ސަރުކާރުން މިގެނެވުނު ބަދަލާއެކީގަ އަޅުގަނޑަކަށް ނުފެނޭ އެއްގޮތަކަށް ވެސް އާންމު ސިއްހަތަކަށް މީގެތެރެއިން ރަގަޅު ފައިދާތަކެއް ބޮޑުކޮށް ކުރެވޭތަނެއް. އެޔާއިދިކޮޅަށް ގޭބިސީތަކަށް ބޭނުންވާ މިފަދަ ތަރުކާރީއާ އެހެނިހެން ރަގަޅު ކާނާ ލިބުމުގަ ބޮޑުތަނުން ދަތިވެގެންދާތަން ފެންނާނެ ކަމަށް އަޅުގަނޑަށް ލަފާކުރެވޭ،" ނާޒިލް ވިދާޅުވި އެވެ.

މިފަދަ ފިޔަވަޅެއް އަޅަން ނިންމިއިރު، މިކަމާ ދޭތެރޭގައި ކިހާވަރަކަށް ވިސްނައި، މަޝްވަރާކޮށްފައިވޭތޯ ނާޒިލް ސުވާލު ކުރެއްވި އެވެ. އޭނާ ވިދާޅުވީ އިގުތިސޯދީ ގޮތުން ނާޒުކު ހާލަތެއްގައި ގައުމު އޮއްވައި މިފަދަ ތަކުލީފަކާ ދިމާލަށް ދިއުމަކީ ރަގަޅު ގޮތް ނޫން ކަމަށެވެ. އަދި، އެއީ ކޮމެޓީ މަރުހަލާގައި މަޝްވަރާ ކުރުން މުހިންމު ކަމެއް ކަމަށް ވެސް އޭނާ ވިދާޅުވި އެވެ. 

ވޭޕް މަނާކޮށް އެކަމަކު ސިނގިރޭޓުން ނަގާ ޑިއުޓީ ބޮޑުކުރަން ނިންމާފައިވާތީ ސަރުކާރުގެ ނިޔަތާ ގުޅޭ ގޮތުން ކެންދޫ ދާއިރާގެ އެމްޑީޕީ މެންބަރު މައުރޫފް ޒާކިރު ވެސް ވަނީ ސުވާލު އުފައްދާފަ އެވެ. އޭނާ ތުހުމަތު ކުރައްވާފައި ވަނީ ސަރުކާރުން މަސައްކަތް ކުރަނީ ޓޮބޭކޯ ފްރީ ގައުމަކަށް ރާއްޖެ ހަދަން ނޫން ކަމަށާއި، ބޭނުންވަނީ އާމްދަނީ އިތުރުކުރަން ކަމަށެވެ.

"ޓޮބޭކޯ އެތެރެ ކުރުން ހުއްދަ، ވޭޕް އެތެރެ ކުރުން މަނާކޮށް، ސިނގިރޭޓުގެ ޑިއުޓީ އިންތިހާޔަށް ބޮޑުކުރީމާ އަޅުގަނޑުމެންނަށް އެނގިގެން މިދަނީ ހަމައެކަނި މަގުސަދަކަށް ވެގެން މިއުޅެނީ ދައުލަތަށް ލިބޭ އާމްދަނީ އިތުރުކުރުން. ހަގީގަތަކީ ދިވެހި ރައްޔިތުން ސިނގިރޭޓާ ދުރުކުރުން ނޫންކަން. އާމްދަނީ މިވަގުތު ދައުލަތަށް ހޯދެން އޮތީ ކޮން ގޮތަަކަށްތޯ ބަލައި، އޮތް ކޮންމެ މަގެއް އިހުތިޔާރު ކުރަމުން ދަނީ،" މައުރޫފް ވިދާޅުވި އެވެ.

ސިނގިރޭޓުން ނަގާ ޑިއުޓީ ބޮޑުކުރަން ސަރުކާރުން ނިންމާފައިވާއިރު، ސަރުކާރު މެންބަރުން ވަނީ އެކަމަށް މަރުހަބާ ކިޔާފަ އެވެ. ގިނަ މެންބަރުން ގަބޫލު ކުރަނީ އަގު ބޮޑުވުމުން ބޭނުން ކުރާ މީހުން މަދުވެގެން ދާނެ ކަމަށެވެ. މިއަދު ބަހުސްގައި މެންބަރުން ވަނީ އެކަން ފާހަގަވެސް ކޮށްފަ އެވެ.