ފަލަސްތީނަށް ފައިސާ ފޮނުވިކަން ކަށަވަރު ކޮށްދީފި
ފަލަސްތީނާ އެކު ދިވެހީން" ނަމުގައި ކުރިއަށް ގެންދިޔަ ޓެލަތޯނަށް ވަނީ 19 މިލިއަނަށް ވުރެ ގިނަ ރުފިޔާ ހަދިޔާ ކޮށްފަ އެވެ.
"ފަލަސްތީނާ އެކު ދިވެހީން" ނަމުގައި ކުރިއަށް ގެންދިޔަ ޓެލަތޯނަށް ދިވެހީން ހަދިޔާކުރި ފައިސާ ފަލަސްތީން ރައްޔިތުންނަށް އެހީވާ ފަންޑާ ހަވާލުކުރިކަން ޔަގީން ކޮށްދީ އެކަމާ ގުޅޭ ލިޔެކިޔުންތައް ދިވެހި ސަރުކާރުން ހާމަކޮށްފި އެވެ.
"ފަލަސްތީނާ އެކު ދިވެހީން" ނަމުގައި ކުރިއަށް ގެންދިޔަ ޓެލަތޯނަށް ދިވެހީން ވަނީ 19 މިލިއަނަށް ވުރެ ގިނަ ރުފިޔާ ހަދިޔާ ކޮށްފަ އެވެ.
ފޮރިން މިނިސްޓްރީން ވަނީ ޓެލެތޯނުން ލިބުނު ފައިސާ ޔުނައިޓެޑް ނޭޝަންސް ރިލީފް އެންޑް ވާރކްސް އޭޖެންސީ ފޯ ޕަލަސްތީނިއަން ރެފިއުޖީޒް (އަންރުވާ) އަށް ފޮނުވުމާ ގުޅޭ ތަފްސީލްތައް ހިމަނާ ބަޔާނެއް ނެރެފަ އެވެ. އެ ބަޔާނުގައި ބުނީ ޓެލެތޯނުން ލިބުނު ފައިސާ ޔުނައިޓެޑް ނޭޝަންސް ރިލީފް އެންޑް ވާރކްސް އޭޖެންސީ ފޯ ޕަލަސްތީނިއަން ރެފިއުޖީޒް (އަންރުވާ) އަށް އޮގަސްޓް 20، 2024 ގައި ފޮނުވާފައިވާ ކަމަަށެވެ.
އަދި ބުނީ ޓެލެތޯނަށް ލިބުނު ފައިސާ އަދަދު ވަނީ އޮޑިޓް ފާމްއެއް ކަމުގައިވާ ކްރޯ މޯލްޑިވްސް އެލްއެލްޕީ އިން ކޮންފާމް ކޮށްފައި ކަމަށެވެ.
ދިވެހި ސަރުކާރުން މިހާރު ދަނީ ދިވެހި ރައްޔިތުން ހަދިޔާ ކުރި ފައިސާ ހަރަދުކުރާނެ ކުރު މުއްދަތުގެ އަދި ދިގު މުއްދަތުގެ ޕްރޮގްރާމްތަކާއި ޕްރޮޖެކްޓުތަކާ ގުޅޭގޮތުން އަންރުވާއާއެކު މަޝްވަރާކުރަމުން ކަމަށް ވެސް ބުންޏެވެ.
އަދި މި ބަޔާނާއެކު ރާއްޖޭގެ މަރުކަޒީ ބޭންކުން އަންރުވާއަށް ފައިސާ ޖަމާކުރިކަމުގެ "ޑެބިޓު އެޑްވައިޒު" ގެ ކޮޕީއާއި "އަންރުވާ ފޯ ޕަލަސްތީން" އެކައުންޓަށް ރާއްޖެއިން ފޮނުވި ފައިސާ ލިބިފައިވާކަން ކަށަވަރުކޮށްދީ ޖޭޕީމޯގަން ބޭންކުން އިޝޫ ކޮށްފައިވާ ޓްރާންސެކްޝަން ތަފްސީލްތައް ވަނީ ހާމަކޮށްފަ އެވެ.
އެ ތަފްސީލް ސަރުކާރުން މި ހާމަކުރީ ޓެލެތޯން ފަައިސާ ފޮނުވިކަން ކަަށަވަރު ކޮށް ދިނުމަށް އެދި މަޖީލިހަށް ފޮރިން މިނިސްޓަރު މޫސާ ޒަމީރު ހާޒިރުކުރުމަށް ހުށައަޅާފައި ވަނިކޮށެވެ.
ކޮމެންޓް
Republic of Maldives