އެއާ އަރަބިޔާ ރާއްޖެއަށް | ޝާރުޖާ މެދުވެރިކޮށް ދުނިޔެއާ ގުޅާލައިފި

ޝާރުޖާއަކީ ޔޫއޭއީގެ ހަތް ސަހަރުގެ ތެރޭން އެންމެ މުހިންމު އެއް ސަރަހެވެ. ދުނިޔޭގެ ގިނަ ކަނެކްޓިވިޓީ އާއި ވިޔަފާރީގެ ފުރުސަތުތަކެއް އޮތް ޝާރުޖާއާ ރާއްޖެއާ ދެމެދު މިއަދު ވަނީ އެއާ އަރަބިޔާގެ ސީދާ ދަތުރުތައް ފަށާފަ އެވެ.

އެއާ އަރަބިޔާގެ ފުރަތަމަ ފްލައިޓަށް މަރުހަބާ ކިޔަން ވެލާނާ އިންޓަނޭޝަނަލް އެއާޕޯޓް (ވީއައިއޭ) ގައި މިއަދު ބޭއްވި ކުލަގަދަ ރަސްމިއްޔާތުގައި ޔޫއޭއީން ރާއްޖެއަށް ކަނޑައަޅާފައިވާ ޑެޕިއުޓީ އެމްބެސަޑަރު ހަސަން ވަހީދު އާއި އެއާ އެރޭބިއާގެ ޔޫއޭއީގެ އޭރިއާ މެނޭޖަރު ޝަހްޒަދް ނަގްވީގެ އިތުރުން އެމްއޭސީއެލްގެ ސީއީއޯ / މެނޭޖިން ޑިރެކްޓަރު އިބްރާހިމް ޝަރީފް މުހައްމަދާއި އެ ކުންފުނީގެ އިސްވެރިން ބައިވެރިވެވަޑައިގަތެވެ.

މި ރަސްމިއްޔާތުގައި އެމްއޭސީއެލްގެ ސީއީއޯ / މެނޭޖިން ޑިރެކްޓަރު އިބްރާހިމް ޝަރީފް ވިދާޅުވީ ވެލާނާ އިންޓާނޭޝަނަލް އެއާޕޯޓާއި ޝާރްޖާއާއި ދެމެދު ސީދާ ދަތުރުތައް ފެށުމަކީ މެދުއިރުމަތީގެ އިތުރުން ދުނިޔޭގެ ގިނަ ސިޓީތަކާއި ރާއްޖެ އާއި ދެމެދު ފަސޭހައިން ދަތުރުކުރެވޭނެ މަގު ހުޅުވިގެންދާނެ ކަމެއް ކަމަށެވެ.

އަދި މިގޮތަށް އުފެދޭ އިތުރު ކޮންމެ ކަނެކްޝަނަކާއިއެކު ސަރަހައްދީ ވައިގެ ދަތުރުފަތުރާއި ދުނިޔޭގެ މި ސިނާއަތުގައިވެސް ވެލާނާ އިންޓާނޭޝަނަލް އެއާޕޯޓްގެ މަގާމު ރަނގަޅު ވެގެން ދާނެ ކަމަށެވެ.

މި ދަތުރުތަކާ ބެހޭ ގޮތުން އެއާ އަރަބިޔާގެ ގްރޫޕް ޗީފް އެގްޒެކެޓިވް އޮފިސަރު އާދިލް އަލް އަލީ ވިދާޅުވީ ރާއްޖެއަށް ދަތުރު ފެށުމަކީ އެ އެއާލައިނަށް ލިބިގެން ދިޔަ ކުރިއެރުމެއް ކަމަށެވެ. މި ދަތުރުތަކުގެ ސަބަބުން ދުނިޔެ މަތީގެ ސުވަރުގޭގެ ގޮތުގައި މަޝްހޫރުވެފައިވާ ދިވެހިރާއްޖެ ތަޖުރިބާ ކުރުމުގެ ފުރުސަތު އެއާލައިންގެ ކަސްޓަމަރުންނަށް ލިބިގެންދާނެ އެވެ. 

"ޝާރުޖާ މެދުވެރިކޮށް ދުނިޔޭގެ 100 އަށް ވުރެ ގިނަ މަންޒިލްތަކާ ރާއްޖެ ގުޅިގެންދާނެ. މި ރޫޓުން ދައްކުވައިދެނީ އަގުހެޔޮ އަދި އަގުހުރި ވައިގެ ދަތުރުތައް ފޯރުކޮށްދިނުމާއި އާ މަންޒިލްތައް އެންމެންނަށް ފަސޭހަކޮށްދިނުމަށް އަޅުގަނޑުމެން ދެމި ތިބޭނަން،" އާދިލް އަލް އަލީ ވިދާޅުވި އެވެ.  

އެއާ އަރަބިޔާގެ އިން މި ދަތުރުތަކުގައި ބޭނުން ކުރާނީ އެއާބަސް އޭ320 މަތިންދާ ބޯޓެވެ. މިއީ ދަތުރުވެރިންނަށް އަރާމު މަތިންދާ ބޯޓެވެ. މި ފްލައިޓުގައި އިން ފްލައިޓް ސްޓްރީމިން އާއި އިން ފްލައިޓް ހިދުމަތް ލިބޭނެ އެވެ. 

މި ފްލައިޓް ރާއްޖެއަށް ފަށާފައިވާއިރު މި އެއާލައިންގެ ރާއްޖޭގެ ޖީއެސްއޭއަކީ ލެޓްސްގޯ މޯލްޑިވްސް އެވެ. 

އެ ކުންފުނީގެ ސީއީއޯ މުހައްމަދު ރިޔާޒު ވިދާޅުވީ މި ދަތުރުތަކާއެކު އެއާ އަރަބިޔާގެ ސަބަބުން ދުނިޔޭގެ އެކި ހިސާބުތަކަށް ދަތުރު ކުރަން ބޭނުންވާ ދިވެހިންނަށް ހެޔޮ އަގުގައި ދަތުރު ކުރުމަށްއާ ދޮރެއް ހުޅުވިގެންދާނެ ކަމަށެވެ. 

"އަގުހެޔޮ، އާއިލާއާ ރައްޓެހި ދަތުރުފަތުރަށް އެއާ އަރަބިއްޔާވާނެ. އަޅުގަނޑުމެން ގަބޫލުކުރާ ގޮތުގައި މި ޕާޓްނާޝިޕްގެ ސަބަބުން ދަތުރުފަތުރުގެ އާ ފުރުސަތުތަކެއް އުފެދި، ދުނިޔޭގެ އެންމެ މަތީ މަންޒިލެއްގެ ގޮތުގައި ރާއްޖެ  އިތުރަށް ވަރުގަދަ ވެގެންދާނެ،" ރިޔާޒު ވިދާޅުވި އެވެ.  

އެ ކުންފުނީގެ ސީއޯއޯ ބައްސާމް އާދަމް އިތުރަށް ވިދާޅުވީ އެއާ އަރަބިއްޔާގެ އާ ރޫޓަކީ ހަމައެކަނި ޓޫރިސްޓުންނަށް ހުޅުވޭނެ ފުރުސަތެއް ނޫން ކަމަށާ މިއީ ދިވެހިންނަށް ވެސް ލިބިގެންދާނެ ފުރުސަތަކަށް ވާނެ އެވެ. އަދި ރާއްޖެ މަތީ ފަންތީގެ މަންޒިލެއްގެ ގޮތުގައި އޮތުމަށް ވެސް މި އެއާލައިން މުހިންމު ރޯލެއް ކުޅޭނެ އެވެ.