ވަކީލުން ނަގަން ނިޝާނާއި ފަޒްލޫނަށް 10 ދުވަސް
ދީނީ ދެ އިލްމުވެރިންގެ މައްޗަށް އުފުލާފައި ވަނީ ޓެރަރިޒަމް އަމަލެއް ހިންގަން ހިތްވަރު ދިނުމުގެ ކުށުގެ ދައުވާ އެވެ. އެ ކުށުގެ އަދަބަކީ 10 އަހަރާއި 15 އަހަރާ ދެމެދުގެ މުއްދަތަށް ޖަލަށްލުމެވެ.
ޖޫން 21، 2022 ގައި ބޭއްްވި ޔޯގާ އިވެންޓް ހުއްޓުވުމުގައި އުފެދުނު ހަމަނުޖެހުންތަކާއި ގުޅިގެން ދައުވާ އުފުލާފައިވާ ދެ އިލްމުވެރީން ކަމަށްވާ ޝައިހު އާދަމް ނިޝާނާއި ޝައިހު ފަޒްލޫން މުހައްމަދަށް ވަކީލުން އައްޔަނު ކުރަން 10 ދުވަހުގެ މުއްދަތެއް ކްރިމިނަލް ކޯޓުން ދީފި އެވެ.
ދެ އިލްމުވެރިންގެ މައްޗަށް އުފުލި ދައުވާ
- ޓެރަރިޒަމް އަމަލެއް ހިންގަން ހިތްވަރު ދިނުމުގެ ކުށުގެ ދައުވާ
- ކުށުގެ އަދަބަކީ 10 އަހަރާއި 15 އަހަރަށް ޖަލަށްލުން
މި މައްސަލައިގެ ޝަރީއަތުގެ އަޑުއެހުމެއް މިއަދު ފުރަތަމަ ފަހަރަށް ބާއްވާފައިވާއިރު، ކޯޓުގައު ދެ ބޭފުޅުން ވެސް ވިދާޅުވެފައި ވަނީ ކޯޓުން ލިޔުންތަކެއް ހަވާލު ކޮށްފައިވާ ކަމަށެވެ. އެކަމަކު ދައުވާއަށް ޖަވާބުދާރީވާން ބޭނުންފުޅު ވަނީ ވަކީލަކާއެކު ކަމަށެވެ. އެ ގޮތަށް ދެ ބޭފުޅުން އެދި ވަޑައިގަތުމުން ގާޒީ ހުސެއިން ފާއިޒް ރަޝާދު ވަނީ ވަކީލުން އައްޔަނު ކުރަން ދެ ބޭފުޅުންނަށް ވެސް 10 ދުވަހުގެ މުއްދަތު ދީފަ އެވެ. އަދި އޭގެ ފަހަށް ހައްގުތައް ވެސް ކަށްވަރުކޮށްދެއްވި އެވެ.
ގާޒީ ހުސެއިން ފާއިޒް ރަޝާދު މިއަދުގެ އަޑު އެހުމުގެ މަޖިލީސް ރޫޅައި ލެއްވި އިރު ދެން އަޑުއެހުމެއް ބާއްވަވާނެ ދުވަހެއް ގާޒީ ހާމަ ކުރައްވާފައެއް ނުވެ އެވެ.
ޔޯގާ ދުވަހު ހިންގި ހަމަނުޖެހުމުގައި ދެ އިލްމުވެރިންނާއެކު 19 މީހަކަށް ވަނީ ދައުވާ ކޮށްފަ އެވެ. ޝަރީއަތް ހިންގަނީ އެކި މީހުން ވަކިންނެވެ.
ކޮމެންޓް
Republic of Maldives