ނަޝީދަށް ދިން ހަމަލާ: މިއަދުގެ އަޑުއެހުން ކުރިއަކަށް ނުދިޔަ

ކުރީގެ ރައީސް މުހައްމަދު ނަޝީދު އަވަހާރަ ކޮށްލަން ދިން ބޮމުގެ ހަމަލާގެ މައްސަލައިގެ މިއަދުގެ ޝަރީއަތް ކުރިއަށް ނުގެންދެވުމުން ކެންސަލް ކޮށްލައިފި އެވެ. 

މޭ 6، 2021 ގައި ނަޝީދަށް އައިއީޑީއެއް ގޮވާލައިގެން ހަމަލާ ދިން މި މައްސަލައިގައި މިހާރު ކުރިއަށް ދަނީ ދައުލަތުގެ ހެކިންގެ ހެކިބަސް ނެގުމެވެ. މިއަދަށް ވެސް ތާވަލު ކޮށްފައި ވަނީ ހެކިބަސް ނެގުމަށެވެ. 

ގާތްގަނޑަކަށް އަށެއްކަ މަސް ފަހުން މިއަދު ބޭއްވި މި މައްސަލައިގެ އަޑުއެހުން ކެންސަލް ކޮށްލަން ޖެހުނީ ދައުވާ ލިބޭ އަލީ ހައިޝަމްގެ ދިފާއީ ވަކީލް ކޯޓަށް ހާޒިރު ނުވާތީ އެވެ. ވަކީލް މިއަދު ސަލާން ފޮނުވާފައި ވަނީ ބަލިވެ އުޅޭ ކަމަށް ބުނެ އެވެ.

ނަމަވެސް ވަކީލް ހުށަހަޅާފައިވާ މެޑިކަލް ލިޔުމާއި ސިޓީއާ ދެމެދު ފުށުއެރުންތަކެއް ހުރުމުން، ގާޒީ ސޮފްވަތު ހަބީބް ނިންމެވީ އެ ވަކީލާ ނުލައި އަޑުއެހުން ކުރިއަށް ގެންދިއުމަށެވެ. ނަމަވެސް ހައިޝަން ބުނެފައި ވަނީ އޭނާ އަޑުއެހުން ކުރިއަށް ގެންދަން ބޭނުންވަނީ ވަކީލާ އެކުގައި ކަމަށެވެ.

ދައުލަތުން ވެސް ބުނެފައި ވަނީ ވަކީލެއްގެ ފުރުސަތަކީ ދައުވާ ލިބޭ ފަރާތްތަކުގެ ހައްގެއް ކަމަށާއި، މި މަރުހަލާގައި ވަކީލުންގެ ފުރުސަތު އެފަރާތްތަކަށް ވަރަށް މުހިންމުވާނެ ކަމަށެވެ. އަދި މިއަދު ނަގަން ހަމަޖެހިފައިވާ ހެކިބަހަކީ މައްސަލަ ސާބިތު ކުރަން މުހިންމު ހެއްކެއް ކަމަށް ވެސް ދައުލަތުން ފާހަގަކޮށްފައިވެ އެވެ. އެހެންކަމުން ހައިޝަމްގެ ވަކީލު ނެތި އަޑުއެހުން ކުރިއަށް ގެންދަން ދައުލަތުން ވަނީ ދެކޮޅު ހަދާފަ އެވެ.

އަޑުއެހުން ކެންސަލް ކުރުމުގެ ކުރިން ގާޒީ ވަނީ މައްސަލަ ލަސްވާތީ ވަރަށް ބޮޑަށް ކަންބޮޑުވުން ފާޅުކުރައްވާފަ އެވެ. ވިދާޅުވީ ޖުޑިޝަލް ސާވިސް ކޮމިޝަން (ޖޭއެސްސީ) އިން ވެސް މި މައްސަލަ ލަސްވާތީ ޝަކުވާ ހުށަހަޅަމުންދާ ކަމަށެވެ. މީގެ ކުރިން ވެސް ދިފާއީ ވަކީލަކު ބަލިވެގެން ހަފްތާއަކަށް ތާވަލު ކުރި އަޑުއެހުންތައް ކެންސަލް ކުރަން ޖެހުނު ކަމަށާއި، މެޑިކަލް ބަލައިގަތުމުގައި ހަރުކަށި ވާނެ ކަމަށް ވެސް ވިދާޅުވި އެވެ.

މި މައްސަލައިގެ އަޑުއެހުމެއް މާދަމާއަށް ވެސް ވަނީ ތާވަލުކޮށްފަ އެވެ. މާދަމާ ވެސް އޮންނާނީ ހެކިބަސް ނެގުމެވެ.

ރައީސް ނަޝީދަށް ހަމަލާ ދިން މައްސަލައިގައި ދައުލަތުން ދައުވާކޮށްފައިވާ މީހުންނަކީ މއ. ފޭރުގެ މުޖާޒް އަހްމަދާއި، އ. ކޮނޑޭ، ފޮޅޭމާ، ތަހުމީން އަހްމަދާއި، ނ. މަނަދޫ ނޫރީގެ އަލީ ހައިޝަމްގެ އިތުރުން ގއ. ވިލިނގިލި ހުދުރުވާގެ، ފަހުމީ އަލީ އާއި، އއ. މާޅޮސް އަސަރީގެ، މުހައްމަދު ނާޒިމް އަދި މ. ކުދެހިގެ އިސްހާގެވެ.