އިމިގްރޭޝަން ގުރައިދޫއަށް | ގަވާއިދާ ހިލާފަށް އުޅުނު 39 ބިދޭސީއެއް ބެލުމުގެ ދަށަށް

މޯލްޑިވްސް އިމިގްރޭޝަނުން ހާއްސަ އޮޕަރޭޝަނެއް ކ.ގުރައިދޫގައި ހިންގައި ގަވާއިދާ ހިލާފަށް އުޅުނު 39 ބިދޭސީއަކު އެ އިދާރާގެ ބެލުމުގެ ދަށަށް ގެންގޮސްފި އެވެ. 

ގުރައިދޫގައި ހިންގި އޮޕަރޭޝަނަކީ ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ކުރަމުންދާ މަސައްކަތުގެ ތެރެއިން، ރޭއްޖޭގެ އަތޮޅުތަކުގައި އުޅެމުންދާ ބިދޭސީން ބަލައި ފާސްކުރުމަށް އޮކްޓޯބަރު 24 ވަނަ ދުވަހު ފެށި ހާއްސަ ސިލްސިލާ މަސައްކަތްތަކުގެ ތެރެއިން ކުރިއަށްގެންދިޔަ ފުރަތަމަ އޮޕަރޭޝަނެވެ. 

ފުލުހުންނާއި އިމިގްރޭޝަން ގުޅިގެން ކުރިއަށްގެންދިޔަ އޮޕަރޭޝަނުގައި އިމިގްރޭޝަނުގެ 20 އޮފިސަރަކާއި ފުލުހުންގެ ނުވަ އޮފިސަރެއް ބައިވެރިވި އެވެ. އަދި ގުރައިދޫ ކައުންސިލުންވެސް އޮޕަރޭޝަނުގައި ބައިވެރިވެ އެހީތެރިކަން ފޯރުކޮށްދިނެވެ. 

ގަވާއިދާ ހިލާފަށް އުޅޭ ބިދޭސީންނާއި، ކުދި އަދި މެދުފަންތީގެ ވިޔަފާރިތައް ގަވާއިދުގެ އިމުން ބޭރުގައި ހިންގަމުންދާ ބިދޭސީން ދެނެގަނެ އެމީހުންނާމެދު ފިޔަވަޅު އެޅުމަށް ހިންގި މި އޮޕަރޭޝަނުގައި ކޮންޓްރޯލާ ޖެނެރަލް އޮފް އިމިގްރޭޝަން މުހައްމަދު ޝަމްއާން ވަހީދާއި ޑެޕިއުޓީ ކޮންޓްރޯލާ އަހްމަދު އަޝްފާަން ބައިވެރިވެވަޑައިގެންނެވި އެވެ. 

ހެނދުނު 10:30 އިން ހަވީރު 5:30 އަށް ގުރޫޕުތަކަކަށް ބަހާލައިގެން ކުރިއަށްގެންދިޔަ އޮޕަރޭޝަނުގައި 42 ތަނެއް ބަލައިފާސްކޮށް، 106 ބިދޭސީއެއް ޗެކުކުރިކަމަށް އިމިގުރޭޝަނުން ބުނެފައިވެ އެވެ. އަދި އެގާރަ ބިދޭސީއަކަށް ހާޒިރުވާން އަންގައި ލިޔުން ދިނެވެ. 

އިމިގްރޭޝަނުން ބުނި ގޮތުގައި ގަވާއިދާ ހިލާފަށް އުޅޭ ބިދޭސީންނަށް ވަޒީފާދިން ފަސް ދިވެއްސަކަށް ލިޔުމުން ނަސޭހަތްތެރިވެފައިވެ އެވެ. އަދި ގުރައިދޫގައި ގަވާއިދާ ހިލާފަށް ވިޔަފާރިކޮށް މަސައްކަތްކުރަމުންދިޔަ 39 ބިދޭސީއަކު ދެނެގަނެ އިމިގްރޭޝަނުގެ ބެލުމުގެ ދަށަށް ގެންގޮސްފައިވެ އެވެ. 

އަތުލައިގަތް ބިދޭސީންގެ ތެރޭގައި ބަންގުލަދޭޝް، ލަންކާ، އިންޑިޔާ މީހުންގެ އިތުރަށް ނައިޖީރިއާ މީހަކުވެސް ހިމެނޭކަމަށް އިމިގްރޭޝަނުން ބުންޏެވެ. 

އަތޮޅު ތެރޭގައި އިމިގްރޭޝަންގެ ހަރަކާތްތައް ފުޅާކުރަން ނިންމާފައިވަނީ ގަވާއިދާ ހިލާފަށް އުޅޭ ބިދޭސީން ދެނެގަނެ ފިޔަވަޅުއެޅުމަށް މާލޭގައި އިމިގްރޭޝަނުން ހިންގަން ފެށި އޮޕަރޭޝަންތަކާއެކު ބިދޭސީން އަތޮޅު ތެރެއަށް ގޮސް، އަތޮޅުތެރޭގައި އުޅޭ މިންވަރު އިތުރުވެފައިވަނިކޮށެވެ.