ނޭނގި ޔާރު ވަކިވީ – އެޕިސޯޑް 72
ދެމީހުން ވެސް ހައިރާން ކަމާއި އެކުގައި ދެލޯ ބޮޑު ކޮށްގެން އެކެއް އަނެކެއްގެ މޫނަށް ބަލަން ހުރެވުނެވެ. އަޔާޒްގެ ފަރާތުން އައިސްދާނެ ސުވާލަކަށް ލީޒާ ހުރީ ވަރަށް ބޮޑަށް ޖެހިލުން ވެފައެވެ.
- އެޕިސޯޑް 72 –
"ލީ.. ލީޒާ.."
އަޔާޒް ހައިރާން ކަމާއެކުގައި ބަލަަން ހުރީ ލީޒާގެ މޫނަށެވެ. ލީޒާ އާނއެކޭ ބުނާ ފަދަ ގޮތަކަށް މަޑުމަޑުން ބޯޖަހައިލިއެވެ.
"އަޔާޒް."
ލީޒާގެ އަޑުގައި ވަނީ ހިމޭން ކަމެކެވެ.
"މީހަކަށް ފިލަނީތަ؟ ތި ވަރަށް ތަންތަން ބަލަނީ؟"
ލީޒާ ވަށައިގެން ކަޅި ހިންގާލި ތަނާ އަޔާޒް އަހައިލިއެވެ.
"ނޫން ނޫން.."
ލީޒާ ވަރަށް އަވަަސްކޮށް ޖަވާބު ދިނެވެ.
"މިކޮޅުގަ ތަ އުޅެނީ މިހާރު؟"
އަޔާޒް ގެންދިޔައީ ސުވާލަކަށް ފަހު ސުވާލެއް ކުރަމުންނެވެ. އަޔާޒް ކުރަމުން ދިޔަ ސުވާލު ތަކަށް ލީޒާ ގެންދިޔައީ ކުރުކޮށް ޖަވާބު ގެންދަމުންނެވެ. އެހެން ނޫނީ ވެސް އަޔާޒް އަކީ ލީޒާއާ ވާހަކަދައްކާ މީހެއް ނޫނެވެ. ޝަރާގެ އެންމެ ގާތް ރަޙްމަތްތެރިޔާގެ ގޮތުގައި އެގެއަށް ގޮސް އުޅޭ އިރު ވެސް، އަޔާޒް އަކީ ލީޒާއަށް އެއްވެސް ސަމާލު ކަމެއް ދޭ މީހެއް ނޫނެވެ. ވާހަކަ ވެސް ދައްކަނީ ޙާލަކުން ފަހަރަކު އެވެ.
ނަމަވެސް މިއަދު އަޔާޒް ތަފާތެވެ. ސުވާލަކަށް ފަހު ސުވާލެއް އޮއްސަމުން ދިޔައެވެ. ހީވަނީ އަހަން ބޭނުންވާ ސުވާލު ކުރަން ނުކެރިގެން ބޭކާރު ސުވާލު ތަަކެއް ކުރާހެންނެވެ. ނަމަވެސް ލީޒާ އެއްވެސް ކަމެއް އަޔާޒަށް ފާހަގަ ވިޔަ ނުދޭން މަސައްކަތް ކުރަމުން ދިޔައެވެ.
ލީޒާގެ މޫނުމަތިން ވެސް އަޔާޒަށް ހާސް ކަމާއި ނުތަނަވަސްކަން ފެނުނެވެ. ހިތާމަ އާއި ގިލަންވެރިކަން ފެނިގެން ދިޔައެވެ. ނަމަވެސް އެ ސުވާލު އަހަން އަޔާޒަށް ނުކެރުނީއެވެ. އެއީ ދާއިން އާއި ލީޒާގެ ވަރަށް އަމިއްލަ ކަމަކަށް ވެދާނެތީއެވެ.
"އަހަރެންގެ ވައިފް ވެސް ޕްރެގް.. އަހަރެން ވެސް ބައްޕަ އަކަށް ވަނީ.."
އަޔާޒް ކުއްލިއަކަށް ހުރެފައި ބުނި ޖުމުލައިން ލީޒާގެ ދެލޯ ބޮޑު ވެގެން ދިޔައެވެ. ލީޒާ އުރައިގެން ހުރި އަޔާާޒްގެ ދަރިފުޅަށް ބަލައިލުމާ އެކުގައި ލީޒާއަށް ބަލައިލެވުނީ އަޔާޒްގެ މޫނަށެވެ. ލީޒާ މަސައްކަތް ކުރަމުން ދިޔައީ އަކްޔަންގެ މޫނު އަޔާޒަށް ނުދައްކާ ވޭތޯއެވެ. އެއީ އެ ތުއްތު މޫނުން ވެސް އަޔާޒަށް އެއީ އަޔާޒްގެ ދަރިއެއްކަން އެނގިދާނެތީއެވެ.
ޝަރާގެ ރުހުމާއި ނުލައި އެއްވެސް ކަމެއް އަޔާޒަށް އަންގަން ލީޒާ ބޭނުން ނުވަނީއެވެ. ނަމަވެސް އަޔާޒްގެ ވާހަކަތައް މިހާރު ޝަރާގެ ގާތުގައި ދައްކަން މާ ލަސްވަމުން ދާކަން ވެސް ލީޒާ ޤަބޫލު ކުރެއެވެ. ނަމަވެސް އެންމެ ރަނގަޅު ވަގުތު ހުރިހާ ކަމެއް ދާނީ ރަނގަޅަށް ކަމަށް ލީޒާ ޤަބޫލު ކުރެއެވެ. އެހެންވެ މާތް ﷲއަށް ވަކީލު ކޮށްލައިގެން ހުންނަނީއެވެ.
"ކިހިނެއްވީ؟ ހައިރާން ވީތަ؟"
ލީޒާގެ ފަރާތުން ލިބުން ހައިރާން ކަމާއި ހިމޭން ކަމުގެ ސަބަބުން އަޔާޒް އަހައިލިއެވެ.
"އަލަކަށް ނޫނެއްނު ބައްޕަ އަކަށް ވަނީ! ޝަރާ..."
ލީޒާއަށް ކެތެއް ނުވިއެވެ. ނަމަވެސް ލީޒާގެ ޖުމުލަ ފުރިހަމަ ކުރާކަށް އަޔާޒް ބޭނުމެއް ނުވިއެވެ.
"ނޫން ނޫން... ޕްލީޒް.. ތި ވާހަކަ ނުދައްކާ! އެއީ މާޒީ..."
އަޔާޒްގެ ވާހަކަތަކުން ލީޒާ ކޮންމެވެސް ވަރަކަށް ހިތްހަމަ ނުޖެހުނެވެ.
"އޯކޭ.."
ލީޒާ ހިނގައިގަތީ ކުރިއަށެވެ. ލީޒާގެ ހަރަކާތް ތަކުން ލީޒާ އެ ދިޔައީ ރުޅި އައިސްގެންކަން އަޔާޒަށް ރޭކާލިއެވެ.
***
މުޅީން އައު ދުވަހަކަށް ދުނިޔެއަށް އިރު މަރުޙަބާ ކިޔައިފިއެވެ. އަޔާޒް އޮތީ އެނދުގައި ޖައްސާލައިގެން ފުން ޚިޔާލެއްގައެވެ. އޭނާގެ ޚިޔާލު ތަކުގައި ވަނީ ޝަރާއެވެ. ލީޒާ ފެނުމުން އަޔާޒް އަސްލު އަހަން ބޭނުން ވެފައި ހުރީ ޝަރާގެ ވާހަކައެވެ. ޝަރާ ކޮބައިތޯއެވެ! ޝަރާގެ ޙާލަކީ ކޮބައި ތޯއެވެ! ޝަރާ ވަކިވެގެން ދިޔަ ފަހުން ޝަރާގެ އެއްވެސް ޚަބަރެއް އަޔާޒަކަށް ނުލިބެއެވެ. ހޯދާކަށް އަޔާޒް ނޫޅެއެވެ.
ނަމަވެސް ލީޒާ ޝަރާގެ ވާހަކަދެއްކި އިރަށް ލީޒާ ހުއްޓުވާލެވުނީ ކީއްވެ ކަމެއް އަޔާޒަކަށް ވެސް ނޭނގެއެވެ. އަޔާޒް ކިތަންމެހާ ވެސް ޝަރާގެ ޚަބަރެއް ބަލަން މީހާރު ބޭނުން ވެއެވެ. ޝަރާގެ ޙާލަކީ ކޮބައިތޯ ބަލައިލަން ބޭނުން ވެއެވެ. ޝަރާ ކޮންމެ ގޮތަކަށް ކަންތައް ކުރިޔަސް، އަޔާޒްގެ ހިތުގައި ޝަރާއަށް އޮތް ލޯތްބަކަށް އެއްވެސް ބަދަލެއް ނާދެއެވެ.
އަޔާޒްގެ ފަރާތުން ޝަރާއަށް ނުލިބެނީ ކޮން ލޯތްބެއް ހެއްޔެވެ؟ ޝަރާ އަޔާޒަށް ބޭވަފާތެރިވީ ކީއްވެގެން ހެއްޔެވެ؟ ޝާރާ އެކަމާ އެއްބަސްވެ، ހުރިހާ ކަމެއް ދެލޯ ކުރިމަތިން ފެނިފައި ވާތީ އިތުރަށް މީހެއް ދައްކާ، އެއްވެސް ވާހަކައެއް އަހާކަށް ވެސް، ވިސްނާކަށް ވެސް އަޔާޒް ބޭނުމެއް ނުވެއެވެ. ނަމަވެސް އަޔާޒަށް ނުވިސްނި އޮތް ކަމަކީ ފެންނަ ކޮންމެ ކަމަކީ ޙަޤީޤަތަކަށް ނުވެދާނެ ކަމެވެ. ލޮލަށް ފެންނަ ކަމެއްގެ ފަހަތުގައި ފޮރުވިފައި އެތައް ކަމެއް އޮވެދާނެ ކަމެވެ.
***
އަޔާޒްއާ ދިމާވެގެން ކަންތައް ވެގެން ދިޔަ ގޮތް އަކުރުން އަކުރަށް ދާއިންގެ ގާތުގައި ލީޒާ ކިޔާ ދިނެވެ. ދާއިން އެއްވެސް ވަރަކަށް އަޔާޒް ކުށެއް ނުކުރެއެވެ. އެއީ ކަމުގެ ޙަޤީޤަތް އަޔާޒަށް ނޭނގޭތީ ކަމުގައި ދާއިން ބުންޏެވެ. ނަމަވެސް އެކަމުގައި ލީޒާގެ ޚިޔާލު ކޮންމެވެސް ވަރަކަށް ދާއިންއާ ތަފާތެވެ. ލީޒާ ޤަބޫލު ކުރާ ގޮތުގައި މިކަމުގައި އަޔާޒްގެ ކުށް ބޮޑެވެ.
ދާއިން ހޮސްޕިޓަލްގައި މިވަގުތު ހުރި އިރު، ލީޒާ އިނީ ގޭގައެވެ. ދާއިން އާއި ލީޒާ ވަނީ ހިތްވަރު ގަދަކޮށް، ޝަރާއަށް ހެޔޮ ދުޢާ ކޮށް، ދެމީހުން ބަލިކަށި ނުވުމަށް ދެމީހުން ދެމީހުންނަށް ވަރުގަދަ އަޒުމެއް ކަނޑައަޅާފައެވެ. ނަމަވެސް ދެލޮލުން ކަރުނަ އަޅާ ނުރޮއި ކަމަކު، އެދެމީހުންގެ ހިތް މިހާރު ވެސް ދަނީ ރޮމުންނެވެ. ޝަރާގެ ޙާލަތު އިތުރަށް ގޯސް ނުވެ، ހިފެހެއްޓިފައިވާތީ ލީޒާ ގެންދިޔައީ ގިނަ ވަގުތު މާތްﷲއަށް ކުއްތަންވެ، ދުއާ ކުރުމުގެ ވަގުތު ގިނަ ކުރަމުންނެވެ. (ނުނިމޭ)
ކޮމެންޓް
Republic of Maldives