ދިރުވާލައިގެން ކިލޯއަކަަށްވުރެ ގިނަ ކޮކެއިން އެތެރެކުރުން | އިއުތިރާފު އެއްބަސްވުމާއެކު ލުއި އަދަބެއް

ދިރުވާލައިގެން 1.4 ކިލޯގެ ކޮކެއިން ރާއްޖެއަށް އެތެރެކުރި ގާނާ މީހެއްގެ މައްޗަށް 12 އަހަރާއި ހަ މަސްދުވަހުގެ ޖަލު ހުކުމެއް ކްރިމިނަލް ކޯޓުން އިއްވައިފި އެވެ. 

އާންމު ގޮތެއްގައި މަސްތުވާތަކެތި އެތެރެކުރާ މީހުންގެ މައްޗަށް އުމުރު ދުވަހުގެ ޖަލު ހުކުމް އިއްވި ނަމަވެސް މި މައްސަލާގައި 12 އަހަރާއި ހަމަ މަހުގެ ޖަލު ހުކުމެއް އިއްވާފައިވަނީ އެ މައްސަލާގައި ދައުވާ ރައްދުވާ އައްޕިހަން ޖޭމްސްއާއި ދެމެދުގައި ހެދި އިއުތިރާފު އެއްބަސްވުމެއްގެ ދަށުން ލުއި ހުކުމެއް އިއްވުމުންނެވެ. 

މި އަހަރުގެ ޖޫން މަހުގެ 12 ވަނަ ދުވަހު ގަތަރު އެއާވޭސް ފްލައިޓަކުން ރާއްޖެ އައުމުން އައްޕިހަން ހުއްޓުވައި ކަސްޓަމްސްއިން އޭނާގެ ހަށިގަނޑު ސްކޭންކުރުމުން ހަށިގަނޑުގައި ކެވިޓީސް ހުރިކަން ފާހަގަކުރެވިގެން އައިޖީއެމްއެޗްއަށް ގެންގޮސް އޭނާ ހަށިގަނޑު ބެލިއިރު، ހަށިގަނޑުގައި ފޮރިން ބޮޑީސް ހުރިކަން ދެނެގަނެވުނެވެ. 

އެއަށްފަހު ފުލުހުންގެ ބެލުމުގެ ދަށުގައި ހުއްޓައި އޭނާ ބޮޑުކަމުދިޔަ ތަކެތީގެ ތެރެއިން 108 ބުލެޓުގެ ކޮކެއިން ފެނިފައިވެ އެވެ. އެ ތަކެތީގެ ބަރުދަނުގައި 1،461.0389 ގުރާމު ނުވަތަ 1.4 ކިލޯ ހުރިކަމަށް މި މައްސަލާގައި ދައުވާ އުފުލަމުން ޕްރޮސެކިއުޓާ ޖެނެރަލް އޮފީހުން ބުނެފައިވެ އެވެ. 

އައްޕިހަން ޖޭމްސްވަނީ އޭނާގެ މައްޗަށް އުފުލި ދައުވާތަކަށް އިއުތިރާފުވެ އޭނާއާއި ޕީޖީ އޮފީހާމެދު ގާއިމުކޮށްފައިވާ އިއުތިރާފުގެ އެއްބަސްވުމަށް ކޯޓުން ރިއާޔަތްކުރުމަށް އެދިފަ އެވެ. އެ އެއްބަސްވުން ބަލައިގަނެ އޭގައިވާ ގޮތަށް އަމަލުކުރަން ކޯޓުން ނިންމި އެވެ. 

އެ އެއްބަސްވުމުގެ ދަށުން އޭނާގެ މައްޗަށް ކަނޑައަޅާ އަދަބީ 12 އަހަރާއި ހަ މަސްދުވަހަށް ޖަލަށް ލުންކަމަށް ކޯޓުން ކަނޑައެޅި އެވެ. އަދި ތަހުގީގު މަރުހަލާގަައި ބަންދުގައި އައްޕިހަން ހޭދަކުރި ހަތަރު މަހާއި ދިހަ ދުވަސް ޖަލު ހުކުމުން ތަންފީޒުކުރަންޖެހޭ މުއްދަތުން އުނިކުރުމަށްފަހު އޭނާ ތަންފީޒުކުރަންޖެހޭނީ 12 އަހަރާއި އެއް މަހާއި 20 ދުވަސް ކަމަށް މައްސަލަ ބެއްލެވި ގާޒީ އާދަމް މުހައްމަދު ކަނޑައެޅުއްވި އެވެ.