ރާއްޖޭގެ ރަށެއްގައި ފުރަތަމަ ފަހަރަށް އެރަށަށް ޒިޔާރަތްކުރުމުގެ އަހަރެއް ހަމަޖައްސައި އެކަން އިފްތިތާހު ކޮށްފި

ކުރިޔަށް އޮތް ފަސް އަހަރުދުވަހުގެ ތެރޭގައި ތަންފީޒުކުރާ ދަރަވަންދޫގެ ސްޓްރެޓީޖިކް ޕްލޭނުގައިވާ، ފަތުރުވެރިކަމާބެހޭ ލަނޑުދަޑިތައް ހާސިލުކުރުމަށާއި، ފަތުރުވެރިންގެ މެދުގައި މަގުބޫލު މަންޒިލަކަށް ދަރަވަންދޫ ހެދުމަށްޓަކައި -- ދަރަވަންދުއަށް ޒިޔާރަތްކުރުމުގެ އަހަރު 2025 އިފްތިތާހު ކުރުމަށް ހާއްސަ ޖަލްސާ މިރޭ ދަރަވަންދޫގައި ބާއްވައިފި އެވެ.

މި ހަފްލާ ގައި ދަރަވަންދު އަށް ޒިޔާރަތް ކުރުމުގެ އަހަރު 2025 ގެ ލޯގޯއާއި ތީމް ލަވަ ތައާރަފުކޮށް، ދަރަވަންދުއަށް ޒިޔާރަތްކުރުމުގެ އަހަރަށް ކަނޑައެޅި އެމްބެސެޑަރުން އާންމު ކޮށްފައިވެ އެވެ.

އަދި މިއަހަރާ ބެހޭ ގޮތުންނާއި ދަރަވަންދުއާބެހޭ ގޮތުންނާއި، ފާހަގަކޮށްލެވޭނޭ ފަދަ ގޮތަކަށް މިފަދަ އަހަރެއް ފާހަގަކުރުމާ ބެހޭ ގޮތުން އެކި ފުރައިގެ އެކި ގިންތީގެ މީހުން ފާޅުކޮށްފައިވާ ޝުއޫރުތައް އިއްވުންވެސް މި ހަފުލާގައި އޮތެވެ.

ހާއްސަ ގޮތެއްގައި، ދަރަވަންދުއަށް އަށް ފަހަރު ޒިޔާރަތްކޮށްފައިވާ، އޮސްޓްރޭލިޔާގެ މިސް އެމެންޑާ އާއި އެމެރިކާގެ މިސް ކިމް، ދަރަވަންދުއާބެހޭ ގޮތުން ފާޅުކޮށްފައިވާ ހަނދާނުން ފޮހެލަން ދަތި ތަޖުރިބާތަކާއި އުފާވެރި އިހްސާތަކާ ބެހޭ ޝުއޫރުތައް ހާމަކޮށްދީފައިވާ ވީޑިއޯއެއްވެސް މި ހަފްލާގައި އާންމު ކުރެވުނެވެ. 

ރަށުގެ ރައްޔިތުންނާއި ފަތުރުވެރިންނާއި ހާއްސަ މެހްމާނުންނަށް ދައުވަތު އަރުވައިގެން ބޭއްވި މި ހާއްސަ ހަފުލާ ގައި، މަރްހަބާ ދެންނެވީ ދަރަވަންދޫ ކައުންސިލްގެ ރައީސް އަލީ ސާމިހް އެވެ. 

ދަރަވަންދުއަށް ޒިޔާރަތް ކުރުމުގެ އަހަރު 2025ގެ ފަންނީ ކޮމިޓީގެ ފަރާތުން ވާހަކަ ދެއްކެވީ، ފަތުރުވެރިކަމުގެ ދާއިރާއަށް މީހުން ބިނާކުރުމުގައި މަގްބޫލުކަން ހޯއްދަވާފައިވާ މޯޓިވޭޝަނަލް ސްޕީކާ ހުސައިން އަފީފު އެވެ.

މި އުފާވެރި ހަފްލާ ނިންމާލީ، މުޅި ރާއްޖޭގެ އެންމެހައި ރައްޔިތުންނަށާ ދުނިޔޭގެ ހުރިހާ ކަންކޮޅުތަކެއްގައި ތިބި ފަތުރުވެރިންނަށް އޮތްކަން ހާމަކޮށްދިނުމާ އެކު، އެހުރިހާ ފަރާތްތަކަށް ދައުވަތު އަރުވަމުން، ބޮޑުބެރުގެ ފޯރިގަދަ ލަވަތަކާ އެކުގަ އެވެ.

ދަރަވަންދުއަށް ޒިޔާރަތްކުރުމުގެ އަހަރެއް ފާހަގަކުރަން ދަރަވަންދޫ ކައުންސިލުން ނިންމީ ދަރަވަންދޫ އަކީ ސާފު މޫދުގައި ރީތި ނަލަ މުރަކަތަކުން ޖަރީވެފައިވާ ބަލައި ފޫހިނުވާހައި ރީތި މޫދު މަޑިތަކާއި މާސިންގާ ފެހުރިއްސާއި ވެލާ ކަހަނބުން ފުރިފައިވާ އަދި ޔުނެސްކޯގެ ބައޮސްފިއާ ރިޒާވްގައި ހިމަނާފައިވާ މަޝްހޫރު ހަނިފަރުގެ ކައިރީގައި އޮތް ރަށަކަށްވެފައި ގުދްރަތީ މި ރީތިކަމާއި، މުއްސަނދިކަމާއި ނަލަކަމުގެ ބޭނުން ހެޔޮގޮތުގައި ހިފައިގެން ދަރަވަންދޫގެ ވިޔަފާރި ކުރިއެރުވުމަށެވެ. އަދި ރައްޔިތުންގެ ކިބައިގައި ޒަމާނުއްސުރެ އަށަގެންފައިވާ މެހްމާންދާރީ އަދާކުރުމުގެ ރޫޙު އާލާކޮށް ދިރުވައި، މުޅި ރަށަށް ތަނަވަސްކަމާއި ތިޔާގިކަން ހޯދުމުގެ ގޮތުންނާއި ރާއްޖޭގެ ފަތުރުވެރިކަން ކުރިއެރުވުމުގެ ގޮތުންނެވެ.

ދަރަވަންދޫ ކައުންސިލުން، ދަރަވަންދުއަށް ޒިޔާރަތްކުރުމުގެ އަހަރު ފާހަގަ ކުރަމުން ދަނީ، ވަރަށް ގިނަ ފަރާތްތަކެއްގެ ބައިވެރިކޮށްގެން، ވަރަށް ގިނަ ފަރާތްތަކެއްގެ އެއްބާރުލުމާ އެކުގަ އެވެ.

ހާއްސަ ގޮތެއްގައި ދަރަވަންދޫގެ ފަތުރުވެރިކަން ކުރިއެރުވުމަށް ފަށާފައިވާ މި މަސައްކަތަށް ވަރަށް ގިނަ ފަރާތްތަކުން ތަރުހީބު ދީ ސްޕޮންސާ ދީފައިވާކަން ކައުންސިލުން ޝުކުރުވެރިކަމާއެކު ފާހަގަ ކޮށްފައިވެ އެވެ.