ސަޕްލިމެންޓަރީ ބަޖެޓާމެދު ޔާމީން | އިގުތިސާދީ ސަބަބެއް ނެތި ދަޅަދައްކަން ހުށަހެޅި ބަޖެޓެއް
ޔާމީން އެންމެ ބޮޑަށް ފާހަގަކުރެއްވީ މި އަހަރުގެ ބަޖެޓުގައި ޕީއެސްއައިޕީއަށް ހިމެނި ނުވަ ބިލިއަނެއްހައި ރުފިޔާ ހަރަދުވެ ހުސްވާ މިންވަރަށް ސަރުކާރުން ތަރައްގީގެ މަޝްރޫއުތައް ރަށްރަށުގައި ހިންގާފައިނުވުމެވެ.
މި އަހަރަށް ފާސްކޮށްފައިވާ ދައުލަތުގެ ބަޖެޓަށް 5.1 ބިލިއަން ރުފިޔާ އިތުރުކުރުމަށް ސަރުކާރުން ހުށަހަޅާފައިވާ ސަޕްލިމެންޓަރީ ބަޖެޓަކީ ރައްޔިތުންނަށް ދައްކާ ދަޅައެއް ކަމުގައި ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ.
މިއަހަރަށް ފާސްކުރި 50 ބިލިއަން ރުފިޔާގެ ބަޖެޓުގެ ބޭރުން ކުރިއަށް އޮތް މަސްތަކުގައި ހަރަދުތަކެއް ކުރަންޖެހޭނެތީ ސަރުކާރުން އިއްޔެ ރައްޔިތުންގެ މަޖިލީހަށް 5.1 ބިލިއަން ރުފިޔާގެ ސަޕްލިމެންޓަރީ ބަޖެޓެއް ހުށަހަޅާފައިވެ އެވެ. ސަޕްލިމަންޓަރީ ބަޖެޓެއް ހުށަހަޅަންޖެހުނު ސަބަބުތައް ކަމުގައި ސަރުކާރުން ފާހަގަކޮށްފަައިވަނީ:
- 1.ތަރައްގީގެ ބޮޑެތި މަޝްރޫއުތަަކުގެ ދުވެލި އަވަސްވެ ޑިސްބާސްކުރާ ފައިސާ އިތުރުވުން
- 2.މި އަހަރުގެ ބަޖެޓުގައި ކުދިކުދި އަދަދުތަކުން ޖަހާފައި ހުރި މަޝްރޫއުތަކަށް ބޮޑެތި ހަރަދުތައް ކުރަންޖެހުން
- 3.ކުރީ ސަރުކާރުން މާލީ ހިސާބުތައް ބެލެހެއްޓުމުގައި ހެދި ގޯސްތައް
- 4.ބައެއް ކުންފުނިތައް މެދުވެރިކޮށް ގެންދާ މަޝްރޫއުތަކަށް
- 5.އަލަށް އުފައްދާ ޑިވެލޮޕްމެންޓު ބޭންކަށް ކެޕިޓަލް ދޫކުރަން
- 6.ސްޓޫޑެންޓު ލޯނު ދޫކުރަން ނިންމި ދަރިވަރުން އިތުރުވުމުން
- 7.ސަބްސިޑީ އިސްލާހުތައް ތަންފީޒުވަންދެން ސަބްސިޑީ ދެމުންދިއުމަށް
ރޭ ޕީޕަލްސް ނޭޝަނަލް ފްރަންޓުގައި ބޭއްވި ޖަލްސާއެއްގައި ރައީސް ޔާމީނު ވިދާޅުވީ ސަރުކާރުން ހުށަހެޅި ސަޕްލިމަންޓަރީ ބަޖެޓުގައި ހުރީ މުޅިންވެސް އޮޅުވައިލުމާއި މަކަރު ހެދުން ކަމަށެވެ. އެގޮތުން އެމަނިކުފާނު އެންމެ ބޮޑަށް ފާހަގަކުރެއްވީ ސަޕްލިމަންޓަރީ ބަޖެޓުގެ ބޮޑު ބައެއް ޕީއެސްއައިޕީ މަޝްރޫއުތަކަށް ހާއްސަކޮށްފައިވާއިރު ރަށްރަށުގައި މަޝްރޫއުތައް ނުހިނގާ ކަމެވެ.
ސަޕްލިމަންޓަރީ ބަޖެޓުގެ ހަރަދުތަކުގެ ތަފުސީލު
- ސަބްސިޑީ: 1.02 ބިލިއަން ރުފިޔާ
- ޕީއެސްއައިޕީ: 2.0 ބިލިއަން ރުފިޔާ
- ކުއްލި ހާލަތްތަކަށް: 650 މިލިއަން ރުފިޔާ
- ދަރިވަރުންގެ ލޯނުތަކަށް: 458.4 މިލިއަން ރުފިޔާ
- މެޑިކަލް ކޮންޒިއުމަބަލްސްއަށް: 200 މިލިއަން ރުފިޔާ
- ބޭސްފަރުވާގެ އެހީތެރިކަން: 262 މިލިއަން ރުފިޔާ
- މުސާރައާއި އުޖޫރައަށް: 24.4 މިލިއަން ރުފިޔާ
- ޖުމްލަ: 5.1 ބިލިއަން ރުފިޔާ
ރައީސް ޔާމީނު ވިދާޅުވެފައިވަނީ މި އަހަރު ފާސްކުރި ރެކޯޑު ބަޖެޓުގައި ޕީއެސްއައިޕީ މަޝްރޫއުތައް ހިންގުމަށް ނުވަ ބިލިއަނެއްހައި ރުފިޔާ ހިމަނާފައިވާއިރު، އެ އަދަދާ ގާތްކުރާ މިންވަރަކަށް އަތޮޅު ތެރޭގައި ތަރައްގީގެ މަޝްރޫއުތައް ހިންގިތަން ފެނިފައިނުވާ ކަމަށެވެ. އަދި ކުރިއަށް އޮތް ދެ މަސް ތެރޭގައި ދެ ބިލިއަނެއްހައި ރުފިޔާ މަޝްރޫއުތައް ހިންގުމަށް ހަރަދުކުރާނެ ގޮތެއް ފެނިވަޑައިނުގަންނަވާ ކަމަށްވެސް ވިދާޅުވި އެވެ.
"ޕީއެސްއައިޕީ ޕްރޮޖެކްޓްތަކަށް އެބަ އޮތް ނުވަ ބިލިއަނެއްހާ ރުފިޔާ ޖަހާފައި. އެ ފައިސާ ހަރަދުކުރާ ތަނެއް ނުފެނޭ ރަށްރަށަކުން. ދެން އެ ފައިސާ ހުސްވަނީ ކަމަށް ބަލާފައި އިތުރުކުރާ ދެ ބިލިއަން ރުފިޔާ. މި އޮތް ދެ މަހުން ދެ ބިލިއަން ރުފިޔާއެއް، އެ ވަރަކަށް ހަރަދުކުރާނެ ގޮތެއް ނުފެނޭ،" ޔާމީން ވިދާޅުވި އެވެ.
އިތުރަށް ޔާމީން ފާހަގަކުރެއްވީ ދިމާވާ ކުއްލި ކަންކަމުގައި ބޭނުންކުރުމަށް ކޮންޓިންޖަންސީގެ ގޮތުގައި ބޮޑު އަދަދެއް ބަޖެޓުގައި ހިމަނާފައިވާއިރު ކުރިން ފާސްކުރި ބަޖެޓުގައި ކޮންޓިންޖެންސީގެ ގޮތުގައި ހިމެނި ފައިސާ ހަރަދުވި ގޮތެއް ސަރުކާރުން ރައްޔިތުންނަށް ބުނެދޭންޖެހޭ ކަމަށެވެ.
އަދި މި އަހަރަށް ފާސްކުރި ބަޖެޓުގައި ކުއްލިއަކަށް ކުރިމަތިވާ ކަންކަމަށް ހަރަދުކުރަން ކަނޑައެޅި ފައިސާ ހަރަދުވެ ނިމެންޖެހޭ މިންވަރުގެ ބޮޑު ކަމެއް ފާއިތުވި ދިހަ މަހެއްހައި ދުވަހުގެ ތެރޭ ކުރިމަތިވެފައި ނެތްކަން ފާހަގަކުރައްވައި ރައީސް ޔާމީން ވިދާޅުވީ އެ ފައިސާ ހަރަދުވި ގޮތް ސަރުކާރަށް ބުނެނުދެވޭނެ ކަމަށެވެ.
އަދި ކުންފުނިތަކަށް ސަބްސިޑީ ދޭންޖެހިފައި އޮތް ހާލަތަކީ މަސްވެރިންނަށް ދޭ ފައިސާ ދޫކުރުން ކަމަށްވާއިރު އެކަމަށް ބޭނުންވާ އަދަދަށްވުރެ އިތުރަށް ސަޕްލިމެންޓަރީ ބަޖެޓުގައި ކުންފުނިތަކަށް ފައިސާ ދިނުމަށް ޖަހާފައި އޮތް އަދަދަކީ ސަރުކާރުގެ ސިޔާސީ މަގާމުތަކުން ވަކިކުރާ މީހުންނަށް ކުންފުނިތަކުން ވަޒީފާ ދިނުމަށް ހިމަނާފައިވާ އަދަދެއްކަމަށް ޔާމީން ތުހުމަތުކުރައްވަ އެވެ.
"މިއީކީ ރައްޔިތުންނަށް އެއްވެސް ކަމެއް ކޮށްދޭން ހުށަހަޅާ ބަޖެޓެއް ނޫން. ބަޖެޓަކަށް އެދޭކަށް ގާނޫނީ އަދި އިގުތިސާދީ އެއްވެސް ސަބަބެއް ނެތް." ރައީސް ޔާމީން ވިދާޅުވި އެވެ.
ކޮމެންޓް
Republic of Maldives