ގެދޮރު އަޅަން ފަސް ޕަސެންޓުގައި އަންނަ ހަފުތާ ލޯނު ދޫކުރަނީ

މި ލޯނު ދޫކުރަނީ ބޭންކް އޮފް މޯލްޑިވްސް އިންނެވެ. 

ގެދޮރު އަޅަން ފަސް ޕަސެންޓުގައި ލޯނު ސްކީމެއް ތައާރަފު ކުރުމަކީ ރައީސް ޑރ، މުހައްމަދު މުއިއްޒުގެ ކެމްޕޭން ވައުދެކެވެ. މި ވައުދު ފުއްދުމުގެ ގޮތުން އަންނަ ހަފުތާގައި ގައުމީ ބޭންކްއިން ފަސް ޕަސެންޓުގައި ގެދޮރު އަޅާ ލޯނު ދޫކުރަން ފަށާނެ އެވެ.

ރާއްޖޭގެ ބޯހިޔާވަހިކަމުގެ މައްސަލައަށް ބޮޑު ހައްލެއް ލިބިގެންދާނެ ލުއި ލޯނު ޕްރޮގްރާމް "ހިޔާވަހި ފައިނޭންސިން ސްކީމް" ޕާޓްނަރަކަށް ސަރުކާރާއެކު މަސައްކަތް ކުރަނީ ގައުމީ ބޭންކްއިންނެވެ. މިއަދު ގެދޮރިވެރިކަމާއި ބިމާއި އުމްރާނީ ތަރައްޤީއާ ބެހޭ ވުޒާރާގައި ބޭއްވި ރަސްމިއްޔާތެއްގައި އެ ފަހުމުނާމާގައި ވުޒާރާގެ ފަރާތުން ސޮއިކުރެއްވީ ވަޒީރު ޑރ. އަލީ ހައިދަރު އަހުމަދެވެ. އަދި ބީއެމްއެލްގެ ފަރާތުން ސޮއިކުރެއްވީ ބީއެމްއެލްގެ ސީއީއޯ މުހައްމަދު ޝަރީފްއެވެ.

ހިޔާވަހި ސްކީމް - ހިޔާވަހި ފައިނޭންސިން ސްކީމަކީ ގެދޮރު އިމާރާތްކުރަން ބޭނުންވެފައިވާ ފަރާތްތަކަށް މާލީ އެހީތެރިކަން ދިނުމަށް ސަރުކާރުން ފަށަން މަސައްކަތްކުރާ ސްކީމެކެވެ. އެ ސްކީމްގެ ތެރެއިން ލޯނު ދޭނީ ފަސް ޕަސެންޓުގެ އިންޓްރެސްޓް ރޭޓެއްގަ އެވެ. އަދި ލޯނު އަނބުރާ ދެއްކުމަށް 25 އަހަރު ލިބޭނެ އެވެ. އެ ސްކީމްގެ ތެރެއިން ލޯނު ދޫކުރެވޭނީ ކޮންމެ ފަރާތެއްގެ ވެސް ފުރަތަމަ ގެ އިމާރާތް ކުރާށެވެ.

ހިޔާވެހި ފައިނޭންސިންގެ ތެރެއިން މުޅިން އަލަށް ގެއެއް އިމާރާތް ކުރަން އަދި އިމާރާތްކުރަން ފަށާފައިހުރި ގެއެއް ނިންމަން ވެސް ލޯނު ލިބޭނެ އެވެ.

އެ ފައިނޭންސިން ސްކީމްގެ ޕާޓްނަރަކަށް ބީއެމްއެލް ހަމަޖައްސައި ފަހުމުނާމާގައި ސޮއިކުރުމަށްފަހު ވާހަކަދައްކަވަމުން ވަޒީރު ވިދާޅުވީ ސަރުކާރުން މަސައްކަތްކުރަނީ ހަފްތާއެއްގެ ތެރޭގައި އެ ފައިނޭންސް ސްކީމް ލޯންޗުކޮށް ލޯނަށް އެދުމަށް ހުޅުވާލަންކަމަށެވެ.

އެ ސްކީމްގެ މަސައްކަތް މިހާރު ކުރިއަށްދާއިރު މީގެކުރިން ވަނީ އިތުރު ދެ ޕާޓުނަރުންނާއެކު ސޮއިކޮށްފަ އެވެ. އެގޮތުން މޯލްޑިވްސް އިސްލާމިކް ބޭންކް އަދި ހައުސިންގް ޑިވެލޮޕްމެންޓް ފައިނޭންސް ކޯޕަރޭޝަން (އެޗްޑީއެފްސީ) އާއެކު ވަނީ ސޮއިކޮށްފައެވެ.