ސަޕްލިމަންޓަރީ ބަޖެޓާއެކު ޑެފިސިޓު 18 ބިލިއަނަށް އަރާނެ
2024 ވަނަ އަހަަރަށް ފާސްކުރި ބަޖެޓުގައި ޑެފިސިޓު ހުންނާނެކަމަށް އަންދާޒާކުރީ 14 ބިލިއަން ރުފިޔާގަ އެވެ. ނަމަވެސް ސަޕްލިމަންޓަރީ ބަޖެޓާއެކު އަންނަ ބަދަލާއެކު ޖުމްލަ 18 ބިލިއަން ރުފިޔާއަށް ޑެފިސިޓު އަރާނެ އެވެ.
މި އަހަރަށް ލަފާކޮށް ފާސްކުރި ދައުލަތުގެ ބަޖެޓުގެ ތެރެއިން ހަރަދުތައް ހަމަނުޖެއްސޭނެކަމަށް ސަރުކާރަށް ފެންނާތީ ކުރިއަށް އޮތް މަސްތަކުގައި ހަރަދުތުކުރާނެ ގޮތުގެ ތަފުސީލުތަކާއެކު މިއަދު ފިނޭންސް މިނިސްޓްރީން ރައްޔިތުންގެ މަޖިލީހަށް ހުށަހެޅި ސަޕްލިމެންޓަރީ ބަޖެޓާއެކު ދައުލަތުގެ ބަޖެޓު ޑެފިސިޓު 18 ބިލިއަން ރުފިޔާއަށް އަރާނެ ކަމަށް ލަފާކޮށްފި އެވެ.
މިއަދު ރައްޔިތުންގެ މަޖިލީހަށް ސަޕްލިމަންޓަރީ ބަޖެޓު ހުށަހަޅުއްވަމުން ދެއްވި ބަޔާނުގައި ފިނޭންސް މިނިސްޓަރު މޫސާ ޒަމީރު ވިދާޅުވީ މި އަހަރު ހުށަހަޅާ ބަޖެޓުގައި ހިމެނޭ ކަންކަމަށް ބޭނުންވާ ފައިސާ ހޯދަން ރާވާފައިވަނީ ޕްރޮޖެކްޓުތައް ހިންގުމަށް ލިބޭ ލޯނުތަކާއި ރާއްޖޭގެ ފަރާތްތަކުން ލޯނު ހޯދައިގެންނާއި ޓްރެޝަރީ ބިލުތައް ވިއްކައިގެން ކަމަށެވެ.
ޒަމީރު ވިދާޅުވި ގޮތުގައި ސަޕްލިމަންޓަރީ ބަޖެޓު ފައިނޭންސްކުރުމަށް ޖުމްލަ 4 ބިލިއަން ރުފިޔާ ހޯދަންޖެހޭނެ ކަމަަށެވެ. އޭގެ ތެރެއިން ބޭރުން ހޯދަންޖެހޭނީ އެއް ބިލިއަން ރުފިޔާ ކަމަށާއި، ރާއްޖޭގެ އެތެރެއިން ހޯދަންޖެހޭނީ ތިން ބިލިއަން ރުފިޔާ ކަަމަށެވެ.
ސަޕްލިމަންޓަރީ ބަޖެޓުގައި ހިމެނޭ ކަންކަން
- ސަބްސިޑީ: 1.02 ބިލިއަން ރުފިޔާ
- ޕީއެސްއައިޕީ: 2.0 ބިލިއަން ރުފިޔާ
- ކުއްލި ހާލަތްތަކަށް: 650 މިލިއަން ރުފިޔާ
- ދަރިވަރުންގެ ލޯނުތަކަށް: 458.4 މިލިއަން ރުފިޔާ
- މެޑިކަލް ކޮންޒިއުމަބަލްސްއަށް: 200 މިލިއަން ރުފިޔާ
- ބޭސްފަރުވާގެ އެހީތެރިކަން: 262 މިލިއަން ރުފިޔާ
- މުސާރައާއި އުޖޫރައަށް: 24.4 މިލިއަން ރުފިޔާ
- ޖުމްލަ: 5.1 ބިލިއަން ރުފިޔާ
ޒަމީރު ވިދާޅުވި ގޮތުގައި މި އަހަަރު ފާސްކުރާ ސަޕްލިމަންޓަރީ ބަޖެޓާއެކު ދައުލަތުގެ ޖުމްލަ ބަޖެޓު 55 ބިލިއަން ރުފިޔާއަށް އަރާނެ އެވެ. މި އަހަރަށް ފާސްކުރީ 49.8 ބިލިއަން ރުފިޔާގެ ބަޖެޓެކެވެ. ސަޕްލިމަންޓަރީ ބަޖެޓަކީ 5.1 ބިލިއަަން ރުފިޔާގެ ބަޖެޓެކެވެ.
އަދި ސަޕްލިމަަންޓަރީ ބަޖެޓުގެ އާމްދަނީއާއި ހިލޭ އެހީގެ ގޮތުގައި ޖުމްލަ 34 ބިލިއަން ރުފިޔާ ލިބޭނެ ކަމަށް ލަފާކުރެވޭ ކަމަަށް ވިދާޅުވުމާއެކު ޒަަމީރު ފާހަގަކުރެއްވި ގޮތުގައި ސަޕްލިމަންޓަރީ ބަޖެޓުގެ ޑެފިސިޓު ޖުމްލަ ހަތަރު ބިލިއަން ރުފިޔާއަށް އަރާނެ އެވެ.
2024 ވަނަ އަހަަރަށް ފާސްކުރި ބަޖެޓުގައި ޑެފިސިޓު ހުންނާނެކަމަށް އަންދާޒާކުރީ 14 ބިލިއަން ރުފިޔާގަ އެވެ. ނަމަވެސް ސަޕްލިމަންޓަރީ ބަޖެޓާއެކު އަންނަ ބަދަލާއެކު ޖުމްލަ 18 ބިލިއަން ރުފިޔާއަށް ޑެފިސިޓު އަރާނެ އެވެ. އެއީ ގައުމީ އުފެއްދުންތެރިކަމުގެ ނިސްބަތުން %16 އެވެ.
ކޮމެންޓް
Republic of Maldives